Abalawi

25 Yehova mwasyakania na Musa oko Kitwa kye Sinai. Mwamubwira ati: 2 “Ukanaye n’Abaisareli ubwirebo uti, ‘Mukendisyabya mwahika omo kihugho ekyo ngendibaha, ekihugho ekyo kikendisyakola esabato busana na Yehova. 3 Mukendisyabya mukahera embuto omo malima wenyu omo myaka 6, n’omo myaka 6 mukendisyabya mukakolera* amalima wenyu w’emizabibu kandi mukendisyabya mukaghesa ebikera omo kihugho kyenyu. 4 Aliwe omwaka we 7, ni sabato y’eriluhuka kundu busana n’ekitaka, esabato ya Yehova. Siritolere ukahera embuto omo malima waghu kutse erikolera* amalima waghu w’emizabibu. 5 Ebilasira by’embuto eyasighala omo malima waghu omughulu w’erighesa, isiwaghesabyo; n’amatunda w’oko mizabibu yaghu eyitakolerawa,* isiwohagho. Litolere ihabya omwaka w’eriluhuka kundu busana n’ekitaka. 6 Nikwa mwanganalya akalyo akakayilasira oko kitaka omo mughulu w’esabato yakyo. Wanganalyako, iwe, abakobe baghu b’obulume n’ab’obukali, abandu abakakukolera emibiiri abo ukaliha, n’abalua ehandi abikere naghu, 7 kutya n’esyonyama sy’eka n’esyomoli esiri omo kihugho kyaghu. Ebyosi ebikera omo kihugho byanganalibwa.

8 “‘Ukendisyaghanza emyaka 7 y’esabato, emyaka 7 ngendo 7. Ebiro by’emyaka 7 y’esabato, bikendisyabya myaka 49. 9 Oko kiro kye 10 ky’omwisi we 7, ukendisyabuha engubi yo kutsibu oko kiro ky’embanulo. Mukendisyakola ekyosi-kyosi omulenge w’erihembe ry’embangale owike omo kihugho kyenyu kyosi. 10 Litolere imwahighula* omwaka owa 50 n’eritulaghania engulu y’obwiranda oko bandu bosi b’omo kihugho. Ikendisyabya Yubile busana nenyu. N’obuli mundu akendisyasubira ekitaka kiwe, n’obuli mughuma w’okw’inywe akendisyasuba omo kihanda kiwe. 11 Omwaka wa 50 oyo, akendisyabya Yubile busana nenyu. Simwendisyahera kutse erighesa emilasira y’embuto eyasighala omo malima wenyu, kutse eryoha emizabibu yenyu eyitakolerawa.* 12 Ni Yubile. Litolere iyabya nyibuyirire okw’inywe. Ebyo mwangalya lisa by’ebiryayilasira omo kihugho.

13 “‘Oko mwaka w’Eyubile oyu, obuli mundu akendisyasubira ekitaka kiwe. 14 Wamabighulya omulikyenyu y’ekindu kutse wamamughula ky’oko, isimwalimanaya. 15 Ukendisyaghula oko mulikyenyu kw’ekindu erikwamana n’emyaka eyamabilaba enyuma sy’Eyubile, naye akendisyakughulya ekindu erikwamana n’emyaka y’erighesa eyikisiya. 16 Hamabya ihakisiya emyaka mingyi, akendisyasambya ebeyi, nikwa hamabya ihakisiya emyaka mike, akendisyakimya ebeyi. Kusangwa akakughulaya emyaka y’erighesamo akalyo. 17 Omo kati-kati kenyu isihabya omundu oyukalimaya mulikyabo. Litolere ighubaha oMungu waghu, kusangwa indi Yehova Mungu waghu. 18 Mwamasikya ebihano byaghe n’erikwama emighambo yaghe, imukendisyikala mbolere omo kihugho. 19 Ekihugho ikikendisyeramo akalyo, nenyu imukendisyalya imughuta, n’eriikala mukyo mo mbolere.

20 “‘Nikwa mwanganayibwira muti: “Ikwa twamatendihera embuto n’erighesa, itukendisyalyaki omo mwaka we 7?” 21 Ngendisyabutulirako emiyisa yaghe omo myaka 6, neryo ekitaka kikendisyerya ebyo mwangalya omo myaka isatu. 22 Neryo mukendisyahera embuto oko mwaka we 8, n’erihika oko mwaka we 9 mukendisyabya imukinalya oko bya kera. Mukendisyabya imunemulya oko byalya bya kera erihika aho ebihya-bihya bikendisyerera.

23 “‘Ekitaka sikyendisyaghulibwa olosi, kusangwa ekitaka ni kyaghe. Kusangwa okw’ingye, muli b’ehandi n’ababunga. 24 Omo kihugho kyosi-kyosi ekikendisyabya kyenyu, omundu oyukaghulaya ekitaka kiwe akendisyabya n’ehamuli y’erikombolakyo.

25 “‘Omughala wenyu amabibya mwera, neryo inyaghulya oko kitaka kiwe, omutunga wiwe wa hakuhi oyukendikombolakyo,* akendisyasa n’erikombola ekyo mughala wabo aghulaya. 26 Omundu amabya isyawite oko oyo wangakombolakyo,* aliwe iniabya muteke neryo inyabana esy’erikombolakyo, 27 akendisyalebya nga kyangaluako singahi erikwamana n’emyaka eyamabilaba aho akaghuliryakyo; neryo esilabiremo, akendisyasubuliryasyo oyo aghulayakyo, neryo akendisyasubana n’ekitaka kiwe.

28 “‘Nikwa amatendibana esy’erikombolakyo, ekitaka ikikendisyasighala omo byala by’oyo aghulayakyo erihika oko mwaka w’Eyubile; neryo oko Yubile, ikikendisyamusubako, naye iniasubana n’ekitaka kiwe.

29 Omundu amabighulya enyumba eyiri omo muyi owatimbireko oluhimbo, akendisyabya inianganasyakombolayo enyuma sy’omwaka mughuma, eritsuka omughulu abughirana n’oyo waghulayo. Ehamuli y’eritasyakombolayo ikendisyabya y’omwaka mughuma owahwererere. 30 Nikwa amatendikombolayo oko mwiso w’omwaka owahwererere, enyumba eyo eyiri omo muyi owaliko oluhimbo, ikendisyabya y’oyo waghulayo omo bizazi* byosi. Siyendisyasubulibwa oko Yubile. 31 Nikwa amanyumba awali omo miyi eyitatimbireko oluhimbo, emiyi eyo ikendisyaghanzirwa oko malima w’omo kihugho ekyo. Amanyumba ayo anganatasyakombolwa. Abenyegho bakendisyasubana nagho oko Yubile.

32 “‘Amanyumba w’Abalawi awali omo miyi yabo, Abalawi bakendisyabya n’ehamuli y’omughulu wosi ey’eritasyakombolagho. 33 Omulawi amatendikombola enyumba yiwe eyo aghulaya omo muyi w’omwandu wiwe, enyumba eyo nayo, ikendisyasubulibwa oko Yubile. Kusangwa amanyumba w’omo miyi y’Abalawi wo mwandu wabo omo kati-kati k’Abaisraeli. 34 Nikwa amalima w’erilisiryamo awatimbire oko miyi yabo, syangaghulibwa; kusangwa ni mwandu wabo w’omughulu wosi.

35 “‘Omughala wenyu oyo wikere hakuhi naghu amabya mwera, neryo isyangatoka eriyibanira ebyo alaghireko, litolere iwamuwatikya, ngoko wanganawatikya omubunga kutse ow’ehandi; omughala wenyu akasyahola. 36 Isiwamwimayako endundi kutse erimulyamo amahotolo.* Litolere ighubaha oMungu waghu, omughala wenyu atoke eribyaho haghuma naghu. 37 Isiwamubweka esyofranga uti akendisyakusubuliryasyo n’endundi, kutse erimuha akalyo busana n’endundi. 38 Ingye indi Yehova Mungu wenyu oyo wabalusaya omo kihugho kye Misri nitoke eribaha ekihugho kye Kanana busana n’erikangania ngoko niri Mungu wenyu.

39 “‘Omughala wenyu oyo wikere hakuhi naghu amabibya mwera, neryo busana n’ekyo inyayighulya okw’iwe, siritolere iwamukolesya ng’omukobe. 40 Litolere iwamuwata ng’omundu oyukakukolera emibiiri oyo ukaliha, ng’omundu w’ehandi oyo wikere nenyu. Akendisyakukolera emibiiri erihika oko mwaka w’Eyubile. 41 Neryo akendisyalua ewaghu, iye, haghuma n’abana* biwe, iniasuba eyiri ekihanda kiwe. Akendisyasuba oko kitaka ky’abotata-kulu wiwe. 42 Kusangwa ni bakobe baghe abo nalusaya omo kihugho kye Misri, isibayighulaya ngoko omukobe akaghulibawa. 43 Isiwamukolera omo bukatsu, kandi litolere ighubaha oMungu waghu. 44 Abakobe baghu ab’obulume kutse ab’obukali, bakendisyabya bakalua omo bihanda ebikutimbireko; ebihanda ebyo byo wangaghulako abakobe b’obulume kutse ab’obukali. 45 Kandi mwanganaghula abakobe oko bana b’ababunga abikere omo kati-kati kenyu. Mwanganaghula kubo kw’abakobe, kandi mwanganaghula abakobe erilua oko bihanda byabo ebiryabutirawa omo kihugho kyenyu, neryo ibabya buteke bwenyu. 46 Mwanganasighirabo abana benyu mo mwandu enyuma syenyu, babye mwandu wabo w’omughulu wosi. Mwanganabakolesya eribakolera emibiiri. Aliwe isimwakolesaya abaghala benyu Abaisraeli mo bakobe.

47 “‘Nikwa omubunga kutse ow’ehandi oyo wikere omo kati-kati kenyu, amabibya muteke, neryo omughala wenyu oyo wikere hakuhi naye iniabya mwera, neryo iniayighulya oko mubunga oyo kutse omundu w’ehandi oyo wikere omo kati-kati kenyu, kutse iniayighulya oko mundu w’oko kihanda ky’omubunga oyo, 48 nomo angayighulya, akendisyabya iniakinawite ehamuli y’erikombolwa; omughuma w’oko baghala babo anganamukombola, 49 kutse omughala wabo baba wiwe kutse omughala wa mughala wabo baba wiwe anganamukombola, kutse oghundi mutunga wa hakuhi* w’omo kihanda kiwe anganamukombola.

“‘Kutse iyuwene-wene amabya iniabiribya muteke anganayikombola iyuwene-wene. 50 Iye, n’oyo wamughula bakendisyakola emighanzo erilebya eritsuka oko mwaka ayighulaya okw’iye n’omwaka w’Eyubile nga hali biro bingahi. Neryo esyofranga sy’erimughulya sikendisyakwamana n’emyaka eyo amabibugha. Ebiro ebyo akolamo omubiiri omo mughulu oyo, bikendisyalengwa ng’eby’omuhingyi oyukalihawa. 51 Hamabya ihakisiya emyaka mingyi, akendisyaliha esyofranga sy’erimukombola erikwamana n’emyaka eyikisiya. 52 Aliwe hamabya ihakisiya emyaka mike erihika oko Yubile, akendisyayighanzira ebiro, neryo inialiha esyofranga sy’erimukombola erikwamana n’emyaka eyikisiya. 53 Akendisyalola embere erimukolera omwaka oko ghundi ng’omuhingyi oyukalihawa. Kandi ukendisyakola ekyosi-kyosi omukama wiwe isyamukolera muhanda. 54 Nikwa amabya isyangatoka eriyikombola erikwamana n’emyatsi eyi, aho iniakendisyabya bwiranda oko mwaka w’Eyubile, iye n’abana* biwe.

55 “‘Kusangwa Abaisraeli ni bakobe baghe-baghe. Ni bakobe baghe abo nalusaya omo kihugho kye Misri. Ingye indi Yehova Mungu wenyu.