Emibiiri y’Abakwenda
5 Neryo omulume oyukahulawamo Anania, n’omukali wiwe ye Safira, nabo mubaghulya eririma ryabo. 2 Aliwe, omulume mwabisa oko syofranga esyalua oko ririma. Omukali wiwe abya inianasi. Omulume mwatwalira esindi sy’abakwenda. 3 Aliwe, Petro mwamubwira ati: “Anania, busanaki wabirileka Sitani akukune eriteba butsir’isagha ekirimu kibuyirire n’eribisa esindi franga esiryalua oko ririma? 4 Embere ughulaye eririma, sirilue ryaghu kwe? Kandi wanganakolesirye esyofranga esyo ngoko wanzire wabighulya eririma, kobite bitya? Busanaki mughukalengekanaya erikola omwatsi mubi oyo? Abandu bo utalyateba, aliwe oMungu.” 5 Abere abyowa ebinywa ebyo, Anania mwawa ahisi n’erihola. Abandu bosi mubabya babyowa omwatsi oyo, mubasagha kutsibu 6 Neryo abalwana mubahangana, bamamuhirako esyongyimba, bamamuheka n’eriyamuta.
7 Habere habilaba esyosaha ng’isatu, omukali wiwe mwasa, isyasi ekyabere. 8 Petro mwamubulya ati: “Terimbwira, kwenene-kwenene, esi sy’esyofranga esiryalua oko ririma?” Omukali mwamusubirya ati: “Inga, syenesyo!” 9 Neryo Petro mwamubwira ati: “Busanaki inywe babiri mwabirilighirana erisonda eriteba ekirimu kya Yehova?* Lebaya! Abakabiyata omulume waghu bane oko mulango, naghu bakakuheka.” 10 Aho n’aho mwawa ahisi oko bisandu bya Petro, n’erihola. Abalwana abayata mulume wiwe babere babisubula, bameya n’omukali iniabirihola. Neryo mubamuheka n’eriyamuta hakuhi n’omulume wiwe. 11 Endeko yosi n’abandu bosi abowa emyatsi eyo mubakwa obuba bunene.
12 Kandi abakwenda mubabya bakakola ebitiko-tiko bingyi n’emyatsi mingyi eyikaswekaya omo kati-kati k’abandu. Kandi abosi babya bakahindana ahali Ebaraza ya Solomona. 13 Nomo abandi bandu babya bakasagha eriyighunga kubo, abandu mubataleka eribugha kubo ko ndeke. 14 N’ekikatsemesaya kutsibu, emighanzo y’abikiriraya Omukama muyalola embere erikanyirira. Omo mighanzo eyo mwabya abalume bangyi n’abakali bangi. 15 Nibya abandu ibakaleta abakoni omo syonzira nene-nene, n’erihirabo oko hikingo hike-hike, n’emikeka, bakalengekania bati Petro akendibya abilaba, ekitsutsu kiwe ikyanatahika oko baghuma ba kubo. 16 Kandi abandu bangyi ibakalua omo miyi eyitimbire oko Yerusalema, ibanahekire abakoni, n’abandu abakaghalibawa n’ebirimu ebituwene. Neryo abosi mubalamibwa.
17 Aliwe busana n’eritsuro, Omuhereri mukulu n’abosi ababya haghuma naye, ababya omo kasomo k’Abasadukayo, mubahangana omo buhitane. 18 Neryo mubahamba abakwenda n’erihirabo omo ngomo y’abandu bosi. 19 Aliwe omo kiro, omumalaika wa Yehova* mwakingula emilango y’engomo. Mwabalusyamo n’eribabwira ati: 20 “Mughende omo hekalu, kandi simuleke eribwira abandu b’emyatsi yosi eyilebirye engebe eno.” 21 Mubakwama obusondoli obo, bamingira omo hekalu, omo tututu, bamatsuka erikangirirya.
Omuhereri mukulu n’ababya haghuma naye mubabya babihika, bamabirikira abomo Sanhedrini,* n’abasyakulu b’omo Israeli. Neryo mubatuma abandu eriyaronda abakwenda omo ngomo. 22 Aliwe, omughulu abateya b’ehekalu bahikayo, mubateya omo ngomo m’omundu. Neryo mubasubula, bamabwira abalyabatuma bati: 23 “Mutukeghaya engomo iyinakingire ndeke-ndeke n’abateya ibanimene oko milango. Aliwe, mutukabya twabikingulayo, mututiteyamo mundu.” 24 Omughulu omwimaniri w’ehekalu n’abahereri bakulu bowa ebinywa ebyo, mubasweka kutsibu n’eribula omwatsi oyo ng’akendighenda ati. 25 Aliwe, omundu mulebe mwasa, n’eribabwira ati: “Abandu abo mulyahira omo ngomo bane omo hekalu. Banemukangirirya abandu.” 26 Neryo omwimaniri w’ehekalu mwaghenda n’abateya biwe, amayenda abakwenda, aliwe butsira mwagha kundi babya ibabirisagha bati abandu bakendibaghusako amabwe.
27 Neryo mubabaleta embere sy’Esanhedrini.* Neryo Omuhereri mukulu mwabatondesya. 28 Mwababwira ati: “Mutukababwira tuti isimwanatasyapima erikangirirya omo rina eryo. Ibwa mwabirisulya omo Yerusalema mw’amakangirirya wenyu! Mwanzire imwahira omusasi w’omundu oyo okw’itwe.” 29 Petro n’abandi bakwenda mubasubirya bati: “Tutolere itwasikya oMungu kulenga abandu. 30 OMungu w’obo tata-kulu betu mwalubukya Yesu, oyo mwita n’oyo mwahanika oko muti. 31 OMungu abirimusambirya oko luhande lwiwe lw’amali, n’erimuyiramo Musondoli Mukulu n’Omusabuli, abandu be Israeli batoke eribindula emitima yabo n’erighanywirwa amalolo wabo. 32 Kandi tuli bimiri* b’emyatsi* eyo, itwe n’ekirimu kibuyirire, eky’oMungu akaha abakamwowa.”
33 Mubabya babyowa emyatsi eyo, mubahitana kutsibu n’erisonda eribughaho abakwenda. 34 Aliwe, Omufarisayo mughuma, oyukahulawamo Gamalieli, mwahangana omo Sanhedrini.* Abya mukangirirya w’Emighambo oyusikibwe n’abandu bosi. Mwabugha ati bahulukaye abandu abo omo katambi kake. 35 Neryo mwabugha ati: “Balume be Israeli, mulebaye ndeke ekyo mukasonda erikolera abalume aba. 36 Munasi ngoko sihalihalaba biro bingyi, hanabya mulume mughuma oyukahulawamo Teuda. Abya iniakayilangiramo w’omughaso. Abandu hakuhi 400 mubingira omo kyama kiwe. Aliwe, babere babimwita, abandu bosi ababya omo kyama kiwe mubapanzikana n’ekyama kiwe kyamahweraho. 37 Enyuma sy’aho, omughulu w’erihandikisya abandu, muhahuluka ye Yuda Omugalilaya, naye mwayikurirako abandu. Omulume oyo naye mubamwita, n’abosi ababya bakamukwama mubapanzikana. 38 Neryo busana nebyo, ngababwira niti simuyingiraye omo myatsi y’abandu aba. Mulekebo. Kundi omwatsi oyu kutse omubiiri oyu amabya ini w’abandu, iniakendihwa. 39 Aliwe, amabya ini w’oMungu, isimwangatoka eribughagho. Kandi ibwa, imwanganayeya imunemulwa n’oMungu.” 40 Mubakwama erihano rya Gamalieli, bamabirikira abakwenda, bamahunzabo, n’eribwirabo bati isibasyasyabugha omo rina rya Yesu, neryo bamaboholabo.
41 Neryo abakwenda mubalua embere sy’Esanhedrini* ibanatsemire, kundi mubalangira ikitolere erihemulwa busana n’erina rya Yesu. 42 Kandi obuli kiro omo hekalu, n’oko buli nyumba, mubataleka erikangirirya n’eritula engulu mbuya eyilebirye Kristo Yesu.