Ebaruha oko Abanya Roma

13 Ritolere itwe bosi itwasikya* abakulu abakatutabala. Omundu syangabya n’obukulu oMungu atitamulighira. OMungu yukabaha obukulu buke obo bali nabo. 2 Tutitasikya obukulu bwabo, itukalwa n’oMungu. Abakaghana erisikya abakulu abo, oMungu akendisyabaha amalipizi. 3 Abakakola ebibuya sibalisagha abatabali. Aliwe, abakakola ebibi bo bakasaghabo. Wamabya isiwanzire erisagha abakulu, ukole ebibuya. Wamabikola utya, ibakendikupipa. 4 Ni baghombe b’oMungu kundi ebyo bakakola, bakakolabyo busana n’endundi yenyu. Aliwe, wamakola ebituwene, aho tu kumbe iwasagha. Babirihabwa obukulu kandi babirihamulwa eriha amalipizi abakakola ebituwene. Ni baghombe b’oMungu abakaha amalipizi oyukakola ebituwene.

5 Ni ky’omughaso eribasikya kundi ekyo kikakubalaya okw’ihitana ryabo. Kandi kikaleka iwabya n’obunya-mutima* obuwene. 6 Kandi ekyo kyo kikaleka imwaliha ebitasi,* kundi ni baghombe b’oMungu abakabya ibanemukolera abandu bosi. 7 Uhe obuli mundu y’ekyo atolere erihabwa. Ulihe ebitasi* oko bakasaba ebitasi. Ulihe esyofranga esyo eleta ikakusaba. Oyukasaba erisikibwa, iwamusikya. N’oyukasaba erikengwa, umukenge.

8 Sighubyemo edeni y’omundu n’omughuma. Aliwe, edeni eyo wangabya nayo ye y’eryanza abandi. Oyukanza omulikyabo akabya iniamabikola ebyosi ebiri omo mighambo. 9 Kundi Emighambo yikabugha yiti: “Isiwasingira, isiwita, isiwiba, isiwayitsutsa ebindu bya bene,” n’ebindi byalayiro byosi ebiri omo Mighambo, biri omo kyalayiro kino: “Wanze omulikyenyu ngoko uyanzire.” 10 Olwanzo silulikolera abandi bo muhanda. Kwesi oyukanza omulikyabo akabya iniamabikola ebyosi ebiri omo Mighambo.

11 Ritolere imwakola ekyo kundi munasi ngoko endambi y’erilua omo tughotseri yabirihika. Erisabulwa ryetu riri hakuhi kutsibu kulenga omughulu twikiriraya. 12 Bukisiya ibwakya, ekyakakala kikisiya ikyasa. Neryo tuleke erikola emyatsi y’omwirima, kandi twambale ebindu by’amalwa eby’ekyakakala. 13 Tubye n’emibere eyitolere, ng’abandu abakakola emyatsi omo ritungyi ryape. Isitwakola esyofete esilabiryeho kateho. Isitwatamira, isitwakola oburaghane kutse emyatsi eyikita esisoni. Isitwalwa kutse eribya n’eritsuro. 14 Aliwe, mukwame ndeke-ndeke emibere y’Omukama Yesu Kristo, kandi isimwapanga eriberererya esyongumbu sy’omubiri.