Eryibuka Ebihano
20 “Wamabiyalwa n’esyonzighu syaghu, neryo iwalangira ngoko esyonzighu esyo siwite esyosabayiri* nene, emitoka minene, n’abasuda banene kukulenga, isiwasagha esyonzighu esyo, kundi Yehova oMungu waghu oyo wakulusaya e Misri ane haghuma naghu. 2 Omughulu ukendisyabya ukasonda eriyalwa, omuhereri akendisyabya akasa, neryo iniakania n’abandu. 3 Akendisyabya akababwira ati, ‘Inywe Baisraeli, muhulikirire. Mukasonda eriyalwa n’esyonzighu syenyu. Isimwahahukaya emitima. Isimwakwa obuba, erisagha, kutse erititimana busana nabo, 4 kundi Yehova oMungu wenyu anemughenda nenyu atoke erilwa n’esyonzighu syenyu, n’eribasabula.’
5 “Enyuma sy’aho, abakulu nabo bakendisyabya bakabwira abandu bati, ‘Hane oyo wabirihimba enyumba, aliwe syalingira muyo? Asube ewiwe. Bite bitya, inianganayaholera omo malwa neryo oghundi mundu iniakanzulayo. 6 Kutse hane oyo wabirihera emizabibu, aliwe syalyatsuka erirya kuyo? Asube ewiwe. Bite bitya, inianganayaholera omo malwa, neryo oghundi mundu inialyayo. 7 Hane oyo wabirilagha omumbesa ati akendimutahya, aliwe syalyamutahya? Asube ewiwe. Bite bitya, inianganaholera omo malwa, neryo oghundi mulume inialunga naye. 8 Kandi abakulu bakendisyabya bakabulya abandu bati, ‘Hane oyo wabirisagha n’erikwa obuba? Asube ewiwe, akasyaleka abaghala babo ibasagha nga ye.’* 9 Omughulu abakulu bakendisyabya bakabugha erikania n’abandu, bakendisyabya bakasombola abakomanda abakendisyabya bakasondola abandu omo malwa.
10 “Ukendisyabya wahika hakuhi n’omuyi ogho ukendilwa nagho, ukendisyabya ukababwira ebyo bangakola utoke erikola obuholo nabo. 11 Bamabiligha erikola obuholo naghu n’erikukingulira emilango yabo, abandu bosi abali omo muyi oyo ibakendisyabya baghu. Bakendisyabya bakakukolera omubiiri w’erikaswa n’erikutumikira. 12 Aliwe bamabighana erikola obuholo naghu neryo ibalwa naghu, litolere imwatimba oko muyi oyo mutoke erilwa nabo. 13 Yehova oMungu waghu akendikuwatikya erisinga omuyi oyo. Litolere iwita abalume bosi omo muyali. 14 Aliwe wanganayimirya abakali, abana, esyonyama, n’obuli kindu ekiri omo muyi oyo, obuli kindu ekyo ukendisyanyegha. Ukendisyalya ebindu by’esyonzighu syaghu ebyo ulyanyegha, ebyo Yehova oMungu waghu alyakuha.
15 “Ekyo kyo ukendisyakolera emiyi yosi eyiri hali kutsibu okw’iwe, eyite y’oko miyi y’ebihanda ebi ebiri hakuhi naghu. 16 Aliwe omo miyi y’abandu aba, eyo Yehova oMungu waghu akakuha mo mwandu, isiwasighamo omundu n’omughuma. 17 Aliwe litolere iwita n’eribughaho Abahiti, Abaamori, Abakanana, Abaperizi, Abahivi, n’Abayebusi, ngoko Yehova oMungu waghu akubwira. 18 Ukendisyakola utya bakasyakukangirirya erikola oko myatsi yabo yosi eyikita esyonye eyo bakakolera emiungu yabo, kundi ekyo ikikendileka iwakolera Yehova oMungu waghu y’erilolo.
19 “Wamabitimba oko muyi utoke erihambagho, kandi wamabilwa n’abandu b’omo muyi oyo omo biro binene, siritolere ukatsandya emiti y’omuyi oyo omw’ikondayo omo mbasa. Wanganalya oko matunda wayo, aliwe isiwakondayo. Wanganalwa n’omuti ngoko wangalwa n’omundu? 20 Omuti ogho wangatsandya musa w’omuti ogho wasi ngoko syalyasako amatunda awakalibawa. Wanganakondagho n’erikolesyagho ukahimba oluba olukenditimba oko muyi owakalwa naghu, erihika omughulu ukendihambagho.