Eryibuka Ebihano
33 Bino by’ebinywa by’eritsumula Abaisraeli ebyo Musa, omundu w’oMungu w’ekwenene, abugha embere ahole. 2 Mwabugha ati:
“Yehova mwalua e Sinai,
Mwakoleryabo erilua e Seiri,
Olukengerwa lwiwe mulwakolerya erilua omo kiharo ky’ebitwa kye Parani,
N’amakumi w’amaelfu w’ababuyirire abya haghuma naye,
Abasuda biwe babya oko luhande lwiwe lw’amali.
3 Mwanza abandu biwe;
Ababuyirire babo bosi bali omo byala byaghu.
Babya bikere oko bisando byaghu;
Mubatsuka erihulikirira ebinywa byaghu.
4 (Musa mwatuha emighambo, ebyalayiro,
Emighambo n’ebyalayiro ebyo ni by’endeko ya Yakobo.)
5 Abiribya mwami omo Yeshuruni,*
Omughulu abakulu b’abandu bahindana haghuma,
Haghuma n’ebihanda byosi bye Israeli.
6 Rubeni abyeho, isyahola,
N’abalume biwe sibabye bake.”
7 Kandi mwabugha ebinywa ebi by’eritsumula Yuda,
Mwabugha ati:
“Yehova, hulikirira omulenge wa Yuda,
Umusubaye eyiri abandu biwe.
Ebyala biwe byabirilwira oko kiwe.
Umuwatikaye erilwa n’esyonzighu siwe.”
8 Mwabugha oko Lawi ati:
“Etumimu yaghu n’Eurimu yaghu* ni by’omundu oyuteleghula okw’iwe,
Oyo walengako e Masa.
Muwalwa naye ahali amaghetse we Meriba,
9 Omundu oyo wabugha oko baba wiwe na mama wiwe ati, ‘Sinibatsomene.’
Nibya mwatatsomana n’abaghala babo.
Mwatatsomana n’abaghala biwe-biwe,
Kundi mwasikya ebinywa byaghu,
N’endaghane yaghu.
10 Akangiriraye Yakobo y’ebihano byaghu
Kandi akangiriraye Israeli emighambo yaghu.
Aherere obukwa obukaluamo ekikumbo ekyuwene ekikakutsemesaya*
Kandi aherere obuhere obughonere oko kiherero kyaghu.
11 Yehova, tsumula akaghala kiwe,
Kandi utsemere omubiiri ogho akakola
Bunanga amaghulu* w’abakalwa naye,
Kusudi abamuponire isibasyasyahangana.”
12 Mwabugha oko Benyamini ati:
“Omwanze wa Yehova ikale buholo hakuhi naye;
Omughulu akamuteghaya omo musibo wosi,
Akendisyikala omo kati-kati k’ebitigho biwe.”
13 Mwabugha oko Yozefu ati:
“Ekihugho kiwe kitsumulawe na Yehova
Ahabawe ebindu ebyuwene by’elubula,
Ahabawe ekimi n’amaghetse awakalua omo syongununuko sy’omo kitaka,
14 Ebindu ebyuwene ebyo ryuba rikaleta
N’ebindu ebyuwene by’oko buli mwisi,
15 N’ebindu ebyuwene kutsibu by’oko bitwa bya kera*
Ebindu ebyuwene by’oko hitwa hya kera na kera,
16 N’ebindu ebyuwene by’oko kihugho n’ebyuswire mukyo,
Kandi asimawe n’Oyo wikere omo kisaka ky’amahwa.
Ebyo bibye oko mutwe wa Yozefu,
Biye oko kaghuli-ghuli k’omutwe w’oyo balusaya oko baghala babo.
17 Yozefu uwene ng’ekyana ky’ende ky’erimbere ky’obulume,
N’amahembe wiwe ali ng’amahembe w’enume y’ende y’omoli.
Akendisyakuna abandu omo mahembe ayo
Abosi eriyabahikya oko mwiso-mwiso w’ekihugho.
Ni maelfu w’amaelfu w’Abaefraimu,
N’amaelfu w’amaelfu w’Abamanase.”
18 Mwabugha oko Zabuloni ati:
“Zabuloni, uyisyandire omo syongendo syaghu,
Naghu Isakari, utsemere omo mahema waghu.
19 Bakendisyabirikira abandu oko kitwa.
Bakendisyahererayo amahere w’eritunganene.
Kandi bakendisyimya oko buteke bunene obuli omo syongetse
N’obuteke obubiseme omo mutsanga.”
20 Mwabugha oko Gadi ati:
“Atsumulawe oyukakakaya emipaka ya Gadi.
Gadi abundamire aho ng’esimba,
Iniane tayari erimatula okuboko, nibya n’erimatula akaghuli-ghuli k’omutwe.
21 Akendisyayisombolera erighabo ry’erimbere,
Kundi eyo yo yibikire erighabo ry’oyukahiraho emighambo.
Abakulu b’abandu bakendisyahindana.
Akendisyabya akakolera Yehova y’emyatsi eyitunganene,
N’erikwama ebihano biwe haghuma n’abandi Baisraeli.”
22 Mwabugha oko Dani ati:
“Dani ni kyana ky’esimba.
Akendisyaghuluka erilua e Bashani.”
23 Mwabugha oko Naftali ati:
“Yehova abiritsemera Naftali yo kutsibu
Kandi abirimutsumula kutsibu.
Wimaye oluhande lw’eyo ryuba rikalengera n’oluhande lw’eyikwa.”
24 Mwabugha oko Asheri ati:
“OMungu abiriha Asheri y’abana banene.
Abaghala babo bamukanganaye olukogho,
Atoberaye* amaghulu wiwe w’omo maghuta.
25 Ehikale hy’emilango yaghu ni hy’ekyuma n’ekwivre,*
Kandi ukendisyikala buholo omo ngebe yaghu yosi.*
26 Sihali oyuli ng’oMungu w’ekwenene wa Yeshuruni,
Oyukalaba omo lubula akayakuwatikya
Kandi oyukalaba oko bitu omo lukengerwa lwiwe.
27 Erilua kera na kera oMungu ni busaghiro,
Amaboko wiwe wa kera na kera ali eyikwa okw’iwe.
Akendisyahigha enzighu yilue embere syaghu.
Kandi akendisyabugha ati, ‘Bugha b’oho!’
28 Israeli akendisyikala buholo,
N’engununuko ya Yakobo ikendisyabya ahabiseme,
Omo kihugho ekikeramo engano n’ekirimo edivai nyihya-nyihya,
Ekihugho ekyo lubula lwakyo lukatoghaya ekimi.
29 Iwe Israeli, utsemire!
Nindi y’uli nga we,
Ekihanda ekyo Yehova asabula
Engabo yaghu eyikakuteghaya,
N’omuyali waghu w’olukengerwa lunene?
Esyonzighu syaghu sikendisyunama embere syaghu isinemusagha,
Naghu ukendisyalyata emighongo yasyo.”*