Isaya
52 Ubuke! Ubuke! Wambale akaghala iwe Sioni!
Wambale esyongyimba syaghu esighambire iwe Yerusalema, omuyi owabuyirire!
Kusangwa oyutabanibwe n’oyuterire sibendisyasyingira ewaghu.
2 Iwe Yerusalema, yikunguteko olututu, hangana, wikale.
Ubohole* esyokamba esiri oko bikya byaghu, iwe munyewa, mumbesa we Sioni.
3 Kusangwa bino byo Yehova akabugha:
“Mumwaghulibwa butsira franga,
Kandi mukendisyakombolwa butsira franga.”
4 Yehova, Omukama Mukulu oko Bosi ati:
“Oko nzuko, abandu baghe mubandaghalira e Misri bamikalayo mo babunga;
Neryo e Asiria muyanubyabo isihali ekikaleka.”
5 Yehova ati: “Neryo hano nikoleki?
Kusangwa abandu baghe mubahekwa oko busa.
Abakatabala kubo bakalola embere erisumba emilenge y’erikinda,” Yehova atya,
“Kandi mughulu wosi, omo musibo wosi, erina lyaghe siririsikibawa.
6 Busana n’ekyo abandu baghe bakendisyaminya erina lyaghe;
Busana n’ekyo, oko kiro ekyo bakendisyaminya ngoko n’ingye ngabugha.
Inga, n’ingye!”
7 Ebisando by’oyukaleta engulu mbuya bighambire oko bitwa,
Oyukatulaghanaya obuholo,
Oyukaleta engulu mbuya y’omwatsi oghuwene,
Oyukatulaghanaya omulamo,
Oyukabwira Sioni ati: “OMungu waghu abiribya Mwami!”
8 Hulikirira! Abateya baghu bakasumba emilenge.
Bakuta obwogho bw’obutseme bo haghuma,
Kusangwa Yehova akendisyabya akuma-kuma e Sioni, bakendisyalangira ekyo kyo ndeke-ndeke.*
9 Inywe bisambukalirya bye Yerusalema, mutsange-tsange, mute obwogho bw’obutseme bo haghuma,
Kusangwa Yehova abirikirania abandu biwe; abirikombola e Yerusalema.
10 Yehova abiriswikula okuboko kwiwe okubuyirire embere sy’ebihanda byosi;
Esyonduli syosi sy’ekihugho sikendisyalangira emibiiri y’erilamya* y’oMungu wetu.
11 Museghere, museghere, mulue eyo. Isimwatula oko kyosi-kyosi ekiterire!
Mulue mugho, mubye imunerire,
Inywe muhekire ebindu bya Yehova.
12 Kusangwa simwendisyaghenda mukahahukya emitima,
Kutse simwendisyatibita,
Kusangwa Yehova akendisyababera embere,
N’oMungu wa Israeli akendisyabya muteya wenyu w’enyuma.
13 Mulebaye! Omughombe waghe akendisyakola n’amenge.
Akendisyasumbirwa endata,
Akendisyasumbirwa endata n’erihamibwa kutsibu.
14 Ngoko hanabya abangyi abamutungerera ibanaswekire
—Kusangwa erilangirika liwe ryabya iryabiritsanda kulenga ery’oghundi mundu wosi-wosi
N’erisosa liwe erikangabasenie lyabya iryabiritsanda kulenga ery’abandu—
15 Neryo kw’anemwendisyasisirya atya ebihanda bingyi.
Abami bakendisyabula eky’eribugha* embere siwe,
Kusangwa bakendisyalangira ekyo bate batabwirwa
N’eriyiteghererya ekyo bate batowa.