Isaya
53 Nindi yo wabirikirirya omwatsi ogho twabugha?*
Kandi nindi yo Yehova abiribisulira amaka* wiwe?
2 Akendisyeruka ng’erisasa embere siwe,* ng’omulihi owakalua omo kitaka ekyumire.
Syawite erisosa erikangabasenie kutse olukengerwa losi-losi,
Kandi tukabya twamulangira, erilangirika liwe siriritwanzisaya.*
3 Mwaponwa kandi abandu mubayihighula okw’iye,
Omundu oyo wapangirawa* amaghali kandi mwabeghera amakoni.
Mukyabya nga mutwabiswa obusu bwiwe.*
Mwaponwa kandi mutwamulangira mo mundu oyutawite mughaso.
4 Oko kwenene, iyuwene-wene mwaheka amakoni wetu
N’eriheka amaghali wetu.
Aliwe mutwamulangira ng’omundu oyo wabirihunzwa, oyo oMungu abirisuyira, n’oyo wabirighaliranibwa.
5 Aliwe mwatsimitwa busana n’erilolo lyetu;
Mwahinolerwa busana n’ebibi byetu.
Mwasuyirwa busana n’obuholo bwetu,
Kandi mutwalamibwa busana n’ebihunze biwe.
6 Itwe bosi twabirighanga-ghanga ng’esyombuli,
Obuli mundu abirikwama enzira yiwe,
Na Yehova abirileka erilolo lyetu itwe bosi rimubyeko.
7 Mwanubibwa kandi mwaligha eryaghalibwa,
Aliwe mwatakumbula obuno bwiwe.
Mwaletwa ng’embuli eyikayakerawa,
Ng’embuli y’obukali* eyikabya bukutu embere sy’abakatwa kuyo kw’obweya,
Naye mwatakumbula obuno bwiwe.
8 Mwatwalwa* busana n’erinubibwa* n’eritswerwa butsira bulingirirania;
Neryo nindi yukendisyatsomana ehyatsi hike-hike hy’ekizazi* kiwe?
Kusangwa mwalusibwa omo kihugho ky’abaliho;
Mwahunzwa* busana n’erilolo ly’abandu baghe.
9 Mwahabwa eyisinda* haghuma n’ababi,
N’omughulu ahola mwatabwa n’abateke,*
Nomo atanakola ekibi kyosi-kyosi*
N’omo buno bwiwe mumutabanika amabehi.
10 Aliwe lyabya risonda lya Yehova* erimuhinolera, kandi mwaleka aghalawe.
Wamabiherera obuyingo* bwiwe mo buhere bw’olubanza,
Inyakendisyalola oko lubuto* lwiwe, iniakendisyayira ebiro biwe mo biri,
N’erilabira iye, ebyo Yehova asondire* bikendisyatokekana.
11 Busana n’amaghali* wiwe, akendisyatsemera* ebyo akendisyalangira.
Erilabira eriminya riwe, omutunganene, omughombe waghe,
Akendisyawatikya abandu bangyi eribya batunganene embere sy’oMungu,
Kandi akendisyaheka ebibi byabo.
12 Busana n’ekyo, ngendisyamuha erighabo omo kati-kati k’abangyi,
Kandi akendisyaghaba ebindu ebiryanyeghawa haghuma n’ab’amaka,
Kusangwa mwuta engebe* yiwe nibya n’erihika oko luholo
Kandi mwaghanzwa omo kati-kati k’abakola-nabi;
Mwaheka amalolo w’abandu bangyi,
Kandi mwabughira abakola-nabi.