Yoeli
2 “Mubuhire omo rihembe mwe Sioni!
Mughusire omulenge w’amalwa omo kitwa kyaghe kibuyirire!
Abikalani bosi b’oko kihugho batitimane,
Kundi ekiro kya Yehova kinemwasa! Kiri hakuhi!
2 Ni kiro ky’omwirimya n’eky’obulime-lime,
Ni kiro ky’ebitu n’eky’omwirimya munene,
Ng’ekyakakala ky’omo tututu ekikayitsatsanga oko bitwa.
Hali ekihanda ekirimo abandu banene kandi eky’amaka;
Eritsuka kera, sihehatabya ekihanda ekiri ng’ekyo,
Kandi sihendisyabya ekindi ekiri ng’ekyo
Omo bizazi* byosi ebikendisyasa.
3 Embere syakyo, hali omuliro owakatsandaya
N’enyuma wakyo, yiri ekirimi ekikatimaya.
Ekihugho ekiri embere syakyo kiri ng’eririma rye Edeni,
Aliwe enyuma wakyo hali embwarara eyitemo kindu
Sihali ekyangabala.
4 Kisosire esyosabayiri,*
Abandu ba mukyo bakatibita ng’esyosabayiri esikaya oko malwa.
5 Efuyo eyo bakakola bakalaba oko syosingyi sy’ebitwa yiri ng’efuyo y’emitoka y’amalwa,
Yiri ng’erihutangika ry’omuliro munene owakatimaya ebiti.
Bali ng’abandu b’amaka abayipangire busana n’amalwa.
6 Bakendisyaleka abandu ibahangya-hangya,
Obuli busu bukendisyatumba.
7 Bakatibita ng’abasuda,
Bakasamba oko luhimbo ng’abasuda,
Obuli mughuma wa kubo akaghenda lima-lima,
Sibalilua omo syonzira syabo.
8 Sibalihumirana,
Obuli mundu akakwama enzira yiwe.
Hamabya oyukawa ahisi omo bindu by’amalwa,
Abandi sibalilua omo myanya yabo.
9 Bakaghenda omo muyi mo luba, bakalaba oko syombimbo ibanemutibita.
Bakasamba oko manyumba, bakalaba omo madirisa ng’omwibi.
10 Ekihugho kikatitimana n’oluluba lukalabamo omusiki embere syabo.
Eryuba n’omughenda byabiribya mwirimya,
N’esyongununu sisikikoleraya.
11 Yehova akendisyabugha omo mulenge muli embere sy’abasuda biwe, kundi abasuda biwe ni banene kutsibu
Kundi oyukakola ekyo akabugha ali n’obutoki.
Ekiro kya Yehova ni kikulu kandi kikasaghisaya.
Nindi yo wangavumiliakyo?”
12 “Nibya na lino, munisubire n’omutima wenyu wosi,” Yehova atya,
“mukole amafungo, mulire, n’eribya omo bulighe.
13 Isimwatulanga esyongyimba syenyu, aliwe mutulange emitima,
Kandi musubire Yehova oMungu wenyu,
Kundi ni w’obulighe, akaghanyira, syalihitana luba-luba, kandi ni w’olwanzo lunene oluteleghula.
Neryo syendibaletera obuhanya.*
14 Nindi yo wasi? Kwa muhwa anganayisubako n’eribindula amalengekania wiwe,*
Neryo iniabatsumula
Neryo imwanganatasyaherera Yehova oMungu wenyu y’obuhere bw’akalyo n’ekihembo ky’obwabu.
15 Mubuhire omo rihembe mwe Sioni!
Mubwire abandu muti bakole amafungo, mubwire abandu muti bakole omuhindano munene.
16 Muhindanaye abandu,* muyire endeko mo nyibuyirire.
Muhindanaye abasyakulu,* muhindanaye abana n’esyomekeke.
Omulunga mulume alue ekati wiwe,
N’omulunga mukali alue omo kyumba kiwe ky’obulunga.
17 Omo kati-kati k’ebaraza n’ekiherero,
Abahereri, abakakolera Yehova, balire n’eribugha bati:
‘Yehova, ukwire abandu baghu b’obulighe!
Isiwaleka abandu bakapokya omwandu waghu
Omw’ileka ebihanda bikatabala.
Ukendilighira uti abandu babughe bati: “OMungu wabo ali hayi?”’
18 Yehova akendisyateya ekihugho kiwe n’omuhwa
N’erikwira abandu biwe b’obulighe.
19 Yehova akendisyasubirya abandu biwe ati:
‘Ngendibatumira engano, edivai nyihya-nyihya, n’amaghuta,
Mukendisyabenda.
Sinendisyasyalighira abandu b’ebihanda bakabapokya.
20 Ngendisyatwala ow’oko luhande lw’endata hali okw’inywe;
Ngendisyamupanza-panzira omo mbwarara eyumire kandi eyitemo kindu
Ngendisyatibitya abasuda biwe abakabya embere* n’eriyabakolya eyiri engetse y’oko luhande lw’eyo ryuba rikasira*
Ngendisyatibitya abasuda biwe abakabya enyuma n’eriyabakolya eyiri engetse y’oko luhande lw’eyo ryuba rikalengera.*
Ekikumbo ekituwene ekikamuluako kikendisyeruka.
Eribeha erikamuluako rikendisyabya irinemweruka,
Kundi oMungu akendisyakola emyatsi mikulu-mikulu.’
21 Iwe kihugho, sighusaghe!
Utseme n’eriyisyandira, kundi Yehova akendisyakola emyatsi mikulu-mikulu.
22 Inywe syonyama sy’emoli, simusaghe!
Kundi emyanya y’erilisiryamo y’omo mbwarara yikendisyabyamo ebiti
N’emiti ikendisyahetya amatunda;
Omuti w’esyotini n’omuti w’emizabibu bikendisyahetya kutsibu.
23 Inywe baghala ba Sioni, mutseme n’eriyisyandira busana n’emyatsi eyo Yehova oMungu wenyu akendisyakola!
Kundi akendisyabaha embula y’erimbere-mbere omo lulengo olutolere,
Kandi akendisyabaletera embula nene,
Embula y’erimbere-mbere n’embula y’omwiso-mwiso, nga kera.
24 Ebihumbiro bikendisyusulako engano eyerire
N’ebikamiro bikendisyusulamo edivai nyihya-nyihya n’amaghuta.
25 Kandi ngendisyabasubulirya ebyalibawa omo myaka mingyi
N’esyongyike esiriko ebipupa, esyongyike esiteko ebipupa, esyongyike esikalya kutsibu, n’esyongyike esikatsandaya
Ni bugha ambu abasuda banene abo natuma omo kati-kati kenyu.
26 Mukendisyalya, n’eryughuta,
Kandi mukendisyapipa erina rya Yehova oMungu wenyu,
Oyukendisyabakolera emyatsi y’eriswekera.
Abandu baghe sibendisyasyahemuka.
27 Mukendisyaminya ngoko niri omo kati-kati k’Abaisraeli,
Kandi ngoko ingye Yehova oMungu wenyu, sihali oghundi!
Abandu baghe sibendisyasyahemuka.
28 Enyuma sy’aho, ngendisyutulira ekirimu kyaghe oko bandu b’emihanda yosi*
Neryo abana benyu b’obulume n’abana benyu b’obukali bakendisyabugha obuminyereri;
Abasyakulu benyu bakendisyalota esyonzoli,
N’abalwana benyu bakendisyalangira esyonzoli.
29 Kandi nibya oko biro ebyo, ngendisyutulira ekirimu kyaghe
Oko bakobe baghe b’obulume n’oko bakobe baghe b’obukali.
30 Kandi ngendisyakola ebitiko-tiko elubula n’oko kihugho;
Hakendisyabya omusasi, omuliro, n’esyonduyi sy’omuki.
31 Eryuba rikendisyabya mwirimya n’omughenda akendisyabya musasi,
Embere ekiro kikulu kya Yehova kandi ekikasaghisaya kihike.
32 N’obuli mundu oyukendisyabirikira erina rya Yehova akendisyasabulwa.
Kundi oko Kitwa kye Sioni n’omo muyi we Yerusalema mukendisyabya abakendisyabala, ngoko Yehova anabugha,
Abakendisyabala obo Yehova akabirikira.”