Emibiiri y’Abakwenda
4 Omughulu Petro na Yohana babya bakabugha n’abandu, abahereri, omwimaniri w’ehekalu, n’Abasadukayo, mubalw’ibasa. 2 Babya bahitene kundi abakwenda babya bakakangirirya abandu n’eribwirabo burora-rora ngoko Yesu abirilubuka. 3 Mubahambabo, n’erihirabo omo muliki erihika ekiro ekikwamire, kundi ryabya iryabiribya righolo-gholo. 4 Aliwe, abandu bangyi abahulikirira ebinywa byabo mubikirirya. Abandu abikiriraya, mubabya hakuhi 5 000.
5 Ekiro ekikwamire, abasondoli babo, abasyakulu, n’abahandiki, mubahindana e Yerusalema 6 haghuma n’omuhereri mukulu Ana, Kayafa, Yohana, Aleksanda, n’abosi ababya b’omo kihanda ky’omuhereri mukulu. 7 Mubimania Petro na Yohana omo kati-kati kabo, n’eribabulya bati: “Mukakola emyatsi eyi omo butoki bwandi kutse omo rina ryandi?” 8 Neryo Petro iniabiryusulamo ekirimu kibuyirire, mwababwira ati:
“Inywe basondoli b’abandu n’abasyakulu, 9 mwamabya imwanzire eriminya munabwire omwatsi owuwene ogho tulyakolera ekirema eki, kandi mwamabya imwanzire eriminya ngoko kiryalama, 10 inywe bosi n’abandu bosi be Israeli, muminye ngoko omulume oyu imene hano embere syenyu iniabirilama omo rina rya Yesu Kristo Omunazareti, oyo mwakongomerera oko muti, aliwe oyo Mungu alubukaya. Alyalama erilabira iye. 11 Yesu oyo, ‘ry’eribwe eryo inywe bahimbi mwalangira nga siriwite mughaso, aliwe ryabiribya ribwe rikulu ry’oko ngonde.’* 12 Kandi sitwangasabulwa erilabira oghundi mundu wosi-wosi, kundi oko kihugho sikuli erindi rina eryo Mungu abirisombola omo kati-kati k’abandu eryangatusabula.”
13 Neryo mubabya babilangira Petro na Yohana bakabugha butubaha, n’erilangira ngoko babya bandu abatasoma kanene, kandi abe kawaida, mubasweka. Mubafumbula ngoko Petro na Yohana ibakabya haghuma na Yesu. 14 Omughulu babya bakasamalira omulume oyo walamibawa, inianimene hakuhi nabo, mubatasunga eky’eribugha. 15 Neryo mubabwirabo bati balue omo kyumba ky’Esanhedrini,* neryo bamasighala omo kasyakulu. 16 Mubabugha bati: “Tukendiyira abandu abo bo tuti? Ni kwenene, babirikola ekitiko-tiko, n’abakalani bosi be Yerusalema, babirilangirakyo. Sitwangaghana omwatsi oyo. 17 Neryo omwatsi oyo akasyaminywa n’abandu bangyi, tusaghisayebo n’eribwirabo tuti isibanatasyabwira n’omundu n’omughuma oko rina eryo.”
18 Neryo mubabirikirabo n’eribwirabo bati isibasyasyabugha n’ahake kutse erikangirirya omo rina rya Yesu. 19 Aliwe, Petro na Yohana mubasubiryabo bati: “Kyamabya ikyuwene embere sy’oMungu eribahulikirira, omo mwanya w’erihulikirira oMungu, n’inywe mukendiminya. 20 Aliwe itwe, sitwangaleka eribugha oko myatsi eyo twalangira n’eryowa.” 21 Neryo kandi babere babitasyasaghisyabo, mubaboholabo kundi mubatasunga ekyangaleka ibabaha amalipizi, kandi busana n’erisagha abandu, kundi abosi babya ibanemupipa oMungu busana n’omwatsi owabya. 22 Omulume oyo walamibawa omo kitiko-tiko abya n’emyaka minene oko 40.
23 Petro na Yohana mubabya babiboholwa, mubaghenda eriyasungana n’abandi bigha* n’erikaniryabo ebyo abakulu b’abahereri n’abasyakulu bababwira. 24 Mubabya babyowa omwatsi oyo, abosi haghuma mubalakira oMungu bati:
“Iwe Mukama Mukulu Oko Bosi, iwe wahangyika olubula n’ekihugho, engetse n’ebyosi ebirimo, 25 kandi n’iwe, erilabira ekirimu kibuyirire, muwabwira tata-kulu wetu Daudi, omughombe waghu, uti: ‘Busanaki ebihanda byabirihumayira n’abandu bakalengekanaya oko myatsi mitya-mitya? 26 Abami b’ekihugho babirimana omo myanya yabo n’abatabali babirihindana ng’omundu mughuma busana n’erilwa na Yehova* kandi busana n’erilwa na Kristo* wiwe.’ 27 Oko kwenene, Herode na Pontio Pilato, haghuma n’abandu b’ebihanda n’abandu be Israeli, babiriyikuma-kumira omo muyi ono busana n’erilwa n’omughombe waghu mubuyirire Yesu, oyo wahirako amaghuta, 28 batoke erikola ebyo wabya iwabiribugha kera. Ebyala byaghu byo byakola omwatsi oyo kandi mwakoleka kundi wabya wanzire iniakoleka. 29 Nikwa lino, Yehova,* langira ngoko bakatusaghisaya, kandi uwatikaye abakobe baghu eribya bakabugha ekinywa kyaghu n’obutubaha, 30 kandi ighunemukingula ebyala byaghu utoke erilamya n’erikola ebitiko-tiko n’emyatsi eyikaswekaya erilabira erina ry’omughombe waghu mubuyirire Yesu.”
31 Neryo mubabya babisaba kutsibu,* aho babya bahindene muhalaba omusiki. Neryo abosi mubusulamo ekirimu kibuyirire, neryo mubabya bakabugha ekinywa ky’oMungu n’obutubaha.
32 Kandi abandu bangyi abikiriraya babya n’amalengekania maghuma,* sihabya n’omundu n’omughuma w’okw’ibo oyo wabya akabugha ati ebindu biwe ni biwe iyuwene; aliwe babya bakahira ebindu byosi byo haghuma. 33 Kandi omo butoki bunene, abakwenda mubataleka erihubirya ngoko Omukama Yesu abirilubuka, n’olukogho lwabya okw’ibo bosi omo lulengo lunene. 34 Oko kwenene, sihabya n’omughuma w’okw’ibo oyo wabya abulire kindu kilebe; kundi abosi ababya n’amalima kutse n’amanyumba, mubaghulyagho n’erileta esyofranga esiryalua oko ebyo balyaghulaya, 35 n’erileterasyo abakwenda. Neryo ibikaghabawa erikwamana n’ebyo obuli mundu alaghireko. 36 Ng’eky’erileberyako, ye Yozefu, oyo kandi abakwenda babya bakahulamo Barnaba (ni bugha ambu, “Omughala w’Erikirania”), Omulawi we Kipro, 37 abya iniawite eririma. Mwaghulyaryo, neryo amaletera abakwenda b’esyofranga esyalua kuryo.