Yeremia
17 “Erilolo rya Yuda rihandikire omo kalamu k’ekyuma.
Rihandikire oko kibambali ky’omutima wabo omo mutwe-mutwe w’ediama
Rihakindikire n’oko mahembe w’ebiherero byabo.
2 Omughulu abana babo banemulengekania oko biherero byabo n’oko miti yabo mibuyirire:*
Hakuhi n’omuti owaboghire, oko hitwa hiri-hiri.
3 Oko bitwa ebiri omo biharo binene-binene.
Busana n’erilolo eryo ukakola omo biharo byaghu byosi,
Ngendileka obuteke bwaghu, ebindu byaghu byosi by’obughuli,
—Emyanya yaghu y’endata ibyapurwa.
4 Omw’anza ryaghu ukendileka omwandu ogho nakuha.
Kandi ngendileka iwakolera esyonzighu syaghu omo kihugho ekyo utasi
Kundi wabirileka ekinigha kyaghe ikyaka ng’omuliro.*
Kikendisyabya ikinemwaka mughulu wosi.”
5 Yehova ati:
Kandi oyo omutima wiwe akaleka erikwama Yehova.
6 Omundu oyo akendisyabya ng’omuti owali iwiwene omo mbwarara.
Syendisyalangira ekibuya kyosi-kyosi kikasa,
Aliwe akendisyikala omo myanya eyitemo maghetse eyiri omo mbwarara,
Omo kihugho ekirimo munyu eyo mundu ate angikala.
7 Omundu* oyukayiketera Yehova atsumulawe
Oyukahira amaha wiwe omo Yehova.
8 Omundu oyo akendisyabya ng’omuti owaherire hakuhi n’amaghetse,
Ogho emirihi yagho yihikire omo lusi.
Omundu oyo syendisyowa ekihuhania omughulu kikendisyasa,
Aliwe ebiti biwe bikendisyabya ibinaboghire.
N’omo mwaka w’ekipwa* syendisyahangya-hangya,
Kandi syendisyaleka erihetya amatunda.
9 Omutima ni mutebya kutsibu kulenga ekindi kindu kyosi-kyosi kandi si w’eriyiketera.*
Nindi yo wangaminyagho?
10 Ingye Yehova, ngatsopolaya omutima,
Ngatsopolaya amalengekania w’emwisi-mwisi,*
Nitoke eriha obuli mundu ekyo atolere busana n’emikolere yiwe,
Busana n’ebyo akakola.
11 Omundu oyukabana obuteke b’omo bwibi,*
Ali ng’engwali eyikakuma-kuma amayaya ogho yitalyania.
Obuteke bwiwe bukendisyamuhwako iniane omo kati-kati k’amaisa wiwe,
N’oko mwiso, akendisyalangirwa mo mukiru.”
12 Eritsuka oko mwanzo, ekitumbi ky’obwami ky’olukengerwa ky’oMungu kiri endata.
Eyo yo yiri ahabuyirire hetu.
13 Yehova, amaha we Israeli,
Abosi abakakulekeranaya bakendisyahemuka.
Amena w’abakaleka erikukwama* akendisyahandikwa omo lututu,
Kundi mubalekerania Yehova, engununuko y’amaghetse w’engebe.
14 Yehova, nilamaye, neryo ngendilama.
Unisabule, neryo ngendisabuka.
Kundi n’iwe ngapipa.
15 Bino byo bandu balebe bakanibwira:
“Busanaki ekinywa kya Yehova sikyekyabererera?
Kisi, kibererere!”
16 Aliwe ingye, sindinataleka eribya mulisya n’erikukwama,
Kandi sindinatanza ekiro ky’obuhanya kikahika.
Unasi ndeke-ndeke ebyosi ebyo nabugha;
Ebyosi ebyo byabya ighunalangire!
17 Isiwanisaghisaya.
N’iwe busayiro bwaghe omo kiro ky’obuhanya
18 Abakaniaghalaya bahemuke,
Aliwe ingye isinahemuka.
Bakwe obuba,
Aliwe ingye isinakwa obuba.
Ubaletere ekiro ky’obuhanya,
Kandi ubatundule n’eritoghotyabo olosi.*
19 Yehova mwakanibwira ati: “Ghenda, uyimane oko mulango w’abaghala b’abandu, ogho bami be Yuda bakingiriramo n’erihulukiramo, kandi wimane oko milango yosi ye Yerusalema. 20 Ubabwire uti, ‘Muhulikirire ekinywa kya Yehova, inywe bami be Yuda, inywe bandu bosi be Yuda, n’inywe bikalani bosi be Yerusalema, inywe mukalaba omo milango eyi! 21 Yehova ati: “Muyilandeko, isimwaheka omuzigo wosi-wosi ekiro ky’Esabato n’erilabyagho omo milango ye Yerusalema. 22 Isimwalusaya omuzigo wosi-wosi omo manyuma wenyu ekiro ky’Esabato; kandi isimwakola omubiiri wosi-wosi. Muyire ekiro ky’Esabato mo kibuyirire, ngoko nabwira abotata-kulu wenyu. 23 Aliwe mubatowa, mubatategha okutu, kandi omo righundu mubaghana eryowa n’erikungwa.”’
24 “‘“Aliwe mwamabisikya ndeke-ndeke ebyo ngababwira,” Yehova atya, “kandi mutetingirya omuzigo wosi-wosi omo milango y’omuyi ono omo kiro ky’Esabato, kandi mwamabiyira ekiro ky’Esabato mo kibuyirire omw’itendikola omubiiri wosi-wosi ekiro ekyo, 25 neryo abami n’abakulu abakikala oko kitumbi ky’obwami kya Daudi ibakendisyalaba omo milango y’omuyi ono ibane omo mitoka n’oko syosabayiri,* abami n’abakulu abo, abandu be Yuda n’abikalani be Yerusalema; n’omuyi ono iniakendisyabya inianikeremo abandu mughulu wosi. 26 Kandi abandu ibakendisyalua omo biharo bye Yuda, omo biharo ebitimbire oko Yerusalema, omo kiharo kya Benyamini, omo kihugho ky’eyikwa, omo kiharo ky’ebitwa, ne Negebu.* Bakendisyaleta omo nyumba ya Yehova mw’amahere w’eryokererya, awandi mahere, ebihembo by’akalyo, obubani, n’amahere w’eriha ewasingya.
27 “‘“Aliwe mwamatendisikya ebyo ngababwira, mwamatendiyira ekiro ky’Esabato mo kibuyirire, mwamabiheka emizigo n’erilabyayo omo milango ye Yerusalema ekiro ky’Esabato, aho ingendihisya emilango ye Yerusalema, n’omuliro iniakendihisya ehileberyo hye Yerusalema ehyo mundu ate angahikamo bweghu-bweghu, n’omuliro oyo syendisyalima.”’”