Isaya
46 Beli abiryunama, na Nebo akagholo-loka
Esyosanamu syabo siri oko syonyama, oko syonyama esikakola emibiiri,
Ng’emiheke eyikabundamiraya esyonyama esiluhire.
2 Bakagholo-loka n’eryunama haghuma;
Sibangatoka eribalya emiheke,*
Nabo ibibene-bene* bakaya omo bunyewa.
3 “Iwe kitunga kya Yakobo, nihulikirire, nenyu inywe bosi abasighere omo nyumba ya Israeli,
Inywe nabiriwatikya erilua okw’ibutwa n’eriheka eritsuka omo nda.
4 Erihika okw’ikula lyenyu ngendisyabya ini na ngye;
Ngendisyabaheka erihika omughulu mukendisyabya n’esyombwi.
Ngoko nanabirikola, ngendisyabasumba n’eribaheka n’eribalamya.
5 Mwanganisosekania nandi kutse erinilingirirania nandi kutse eribugha muti niri nga ndi,
Tutoke erisosana?
6 Hane abakahulukaya ehoro omo syongunza syabo;
Bakalenga efeza* oko bilo.
Bakaliha omuhesi inyakokotya muyo mw’omungu.
Neryo ibunama, inga, ibaramya* omungu oyo.
7 Bakasumbira omungu oyo oko bitigho;
Ibamuheka n’erimuhira aho akendibya, naye inyasighala aho.
Syalilua aho balyamuhira.
Bakamulakira, aliwe syalisubiraya;
Syangatoka erilusya owosi-wosi omo malighe wiwe.
8 Mwibuke eki, musike.
Mughaniraye kukyo ko kutsibu inywe bakola-nabi.
9 Mwibuke emyatsi ya kera kera* eyabirilaba,
Ngoko niri Mungu, sihali oghundi.
Indi Mungu, sihali oghundi oyuli nga ngye.
10 Ngabugha ebikendisyaluira omo mwatsi inyakine oko nzuko,
N’eribugha emyatsi eyiteyakoleka eyikendisyabya kera kera.
Ngabugha niti, ‘Eriyisogha* lyaghe likendisyabererera,
Kandi ngendisyakola ekyosi-kyosi ekyo nyanzire.’
11 Ngabirikira enyunyu eyikahigha erilua oko luhande lw’eyo eryuba rikasira,*
Erilua omo kihugho kya hali ngabirikira omulume eriberererya eriyisogha* lyaghe.
Nabiribugha, kandi ngendisyakolakyo.
Nabiripangakyo, kandi ngendisyaberereryakyo.
12 Munihulikirire inywe b’emitima y’erighundu,*
Inywe muli hali oko ritunganene.
13 Nabirileta eritunganene lyaghe lyo hakuhi;
Siriri hali,
Omulamo waghe syendisyamala,
Ngendisyaha e Sioni yo mulamo waghe, na Israeli olukengerwa lwaghe.”