Isaya
10 Obulighe oko bakahiraho ebighenderwako ebikaghalaya,
Abakabera eriteghekania emighambo eyikakolobokaya,
2 Eryima abera erisingana lyabo,
Eryima abandu baghe b’ahisi obulingirirania,
Kandi bakanyegha abakwa-kali
N’erinyegha ebindu by’abana abatawite abise!*
3 Mukendisyakolaki oko kiro ky’eritswera,*
Omughulu eritswera likendisyasira hali?
Mukendisyatibita eyirindi eriyamusaba obuwatikya,
Kandi mukendisyasigha obuteke* bwenyu bo hayi?
4 Sihali ekindi ky’erikola kite erisunama omo bandu b’omuliki
Kutse eriwa omo kati-kati k’ebinda eby’abandu abalyitawa.
Busana n’ebyosi ebi, erihitana liwe siririryumbya,
Nikwa ebyala biwe bikinasumbire busana n’erihunza.
5 “Ehee! Omuasiria,
Omutso w’erikangania erihitana lyaghe
N’omwigho owali omo byala byabo busana n’erihaya lyaghe!
6 Ngendimutuma oko kihanda ekikayisamambula,
Oko bandu ababirinyaghalirania;
Ngendimulayira anyeghe ebindu bingyi n’erihunga ebindu bingyi
N’erilyatangirabo ng’ebyondo by’omo syonzira.
7 Aliwe syendisyanza erikola atya
N’omutima wiwe syendisyapanga erikola atya;
Kusangwa omo mutima wiwe muli erihwerekererya,
Eriherya ebihanda bingyi, butsira bike.
8 Kusangwa akabugha ati,
‘Abanya-mwami baghe abosi si bami?
9 E Kalno siyiri nge Karkemishi?
E Hamati siyiri nge Arpadi?
E Samaria siyiri nge Damasko kwehi?
10 Ebyala byaghe byabirihamba amami w’emiungu eyitawite mughaso,
Eyo esyosanamu syayo esibatsire syabya nyingi kwilaba esye Yerusalema ne Samaria!
11 Neryo sinendikolera ne Yerusalema n’esyosanamu syayo
Ngoko nabirikolera e Samaria n’emiungu yayo eyitawite mughaso kwehi?’
12 “Yehova akendibya abibugha omubiiri wiwe wosi oko Kitwa kye Sioni ne Yerusalema, akendisuyira* omwami we Asiria busana n’omutima wiwe w’epono na busana n’ameso wiwe w’erighundu n’aw’emiyiheko. 13 Kusangwa akabugha ati,
‘Ngendikola eki omo maka w’ebyala byaghe
N’omo menge waghe, kusangwa niwite amenge.
Ngendilusya emipaka* y’ebitunga by’abandu
N’erihunga obuteke bwabo,
Kandi ngendikinda abikalani ng’embangyi.
14 Ng’omundu oyukakolaya ebyala by’omo lutu,
Ebyala byaghe bikendikuma-kuma ebindu by’ebihanda;
Kandi ng’oyukakuma-kuma amayaya awabirisighanibwa,
Ngendikuma-kuma ekihugho kyosi!
Sihali oyukendipupya-pupya* ebipupa biwe kutse erikumbula obuno bwiwe kutse eritswira.’”
15 Embasa yanganayihamya oko yukakonda muyo kwehi?
Omusumeno anganayihamya oko yukasegha mugho kwehi?
Omutso anganatsingya-tsingya oyukasumbagho?
Kutse omwigho anganasukya oyutakolirwe omo muti kwehi?
16 Neryo Yehova w’emilondo, Omukama w’ekwenene,
Akendileta akabonde oko banenehire biwe,
N’eryakya omuliro owakaghulumira eyikwa oko lukengerwa lwiwe.
17 Ekyakakala kya Israeli kikendisyabya muliro,
N’Omubuyirire wiwe iniabya kirimi ky’omuliro;
Omuliro akendisyaghulumira n’erihisya ebiti biwe n’ebisaka biwe by’amahwa omo kiro kighuma.
18 Akendisyaherya kotse-kotse* olukengerwa lw’omusitu wiwe n’olw’eririma liwe ly’amatunda;
Kikendisyabya ng’omughulu omukoni akaghenda akahwerekerera.
19 Emisighalira y’emiti y’omusitu wiwe
Ikendisyabya mike kutsibu n’omulwana inianganatondogholayo.
20 Oko kiro ekyo, emisighalira ya Israeli
N’ababala ab’enyumba ya Yakobo
Sibendisyasyaghemera oko oyo wahunzabo;
Nikwa bakendisyayeghemerya oko Yehova,
Omubuyirire wa Israeli, omo butaleghula.
21 Emisighalira misa yo ikendisyasubula,
Emisighalira ya Yakobo, yo ikendisyasuba oko Mungu Omutoki.
22 Kusangwa, iwe Israeli,
Abandu baghu nomo bangabya ng’omutsanga w’omo ngetse,
Emisighalira misa ya kubo yo ikendisyasubula.
Eriherya ryabisohwa,
N’obulingirirania* bukendisyayitulika kubo.
23 Inga, eriherya eryo Omukama Mukulu oko Bosi, Yehova w’emilondo abirisoha,
Rikendikolwa omo kihugho kyosi.
24 Neryo Yehova w’emilondo, Omukama Mukulu oko Bosi ati: “Bandu baghe abikere e Sioni, simubahe busana n’Omuasiria oyo wabya akabahunza omo mutso n’erisumba omwigho wiwe erilwa nenyu ngoko e Misri yakola. 25 Kusangwa hakisiya katambi kake erihitana iryahika oko nduli; obuhitane bwaghe bukendilolera okw’iheribwa lyabo. 26 Yehova w’emilondo akendisyahungya olufimbo akamulakya, ng’omughulu akinda e Midiani oko ribwe rye Orebu. N’omutso wiwe akendisyabya oko ngetse, kandi akendisyasumbagho ngoko anakolera e Misri.
27 Oko kiro ekyo omuheke wiwe akendisyalua oko kitigho kyaghu,
N’omuketo* wiwe oko ngoto yaghu,
N’omuketo akendisyatwika busana n’amaghuta.”
28 Abirihika e Aiyati;
Abirilaba e Migroni;
Akabika emiheke yiwe ye Mikmashi.
29 Babirilaba oko kisokero;
Bakaghotsera e Geba;
E Rama ikatitimana, e Gibea ya Sauli yabiritibita.
30 Ulake n’eryahira, iwe mwali we Galimu!
Uhulikirire, iwe Laisha!
Iwe Anatoti, nzama!
31 Madmena abiriyibatsira kughulu.
Abikalani be Gebimu babirisonda ah’eribisama.
32 Munabwire musa-musa akendiimana e Nobu.
Akahungaya engume yiwe oko kitwa kya mwali we Sioni,
Akatwa ke Yerusalema.
33 Lebaya! Yehova w’emilondo, Omukama w’ekwenene,
Akatwa emitahi n’olukanda lunene;
Emiti miri-miri yinemukondwa,
N’emiti eyiyimolekire ikawa oko kitaka.
34 Akatema ehisaka hy’omusitu omo kindu ky’ekyuma,*
Ne Lebanoni ikendisyawa omo byala by’ow’amaka.