Isaya

32 Lebaya! Omwami akendisyatabala busana n’eritunganene,

N’abanya-mwami bakendisyatabala busana n’obulingirirania.

 2 N’obuli mughuma wa kubo akendisyabya ng’ah’eriyibisa* oko kihunga,

Omwanya w’eriyibisamo* busana n’ekibula,

Ng’ehyusi omo kihugho ekyumire,

Ng’ekitsutsu ky’olukuka lunene omo kihugho ekikungukere.

 3 Neryo ameso w’abakalangira syendisyasyalibwa,

N’amatwi w’abakowa akendisyahulikirira.

 4 Omutima w’abakakola butsira erilengekania akendisyaghanirya oko bwenge,

N’olulimi lw’abakatetemuka lukendisyabugha butsir’itwikangala kandi bwegu-bwghu.

 5 Omukiru syendisyasyahulwa mo mwenge,*

N’omundu oyutasi ekyo aliko syendisyahulwa mo w’olukengerwa.

 6 Kusangwa omukiru akendisyabugha eby’obukiru,

N’omutima wiwe akendisyapanga ebikahutalaya,

Erikanyirirya eriyisamambula* n’eribugha oko Yehova ebihengemire,

Erileka oyukwire enzala* abye inyanawirire

N’eriima oyukwire enyota y’amaghetse.

 7 Emipango y’omundu oyutesondolawa n’esyokanuni ni mibi;

Akakanyiriraya emighendere eyikit’isoni

Eryaghalya omuhanya omo mabehi,

Nibya n’omughulu omwera akabugha ekyuwene.

 8 Aliwe omundu oyukahitaya akabya n’amalengekania w’erihitya,

Kandi akakwamirira emikolere y’erihitya.

 9 Inywe bakali abatayitsomanire muhangane muhulikirire omulenge waghe,

Inywe bambesa abatayitsomanire, muhulikirire ekyo ngabugha!

10 Omo mwaka mughuma n’ebiro bike, mukendititimana inywe mutatsomene,

Kusangwa ekirimo ky’emizabibu kikendisyahwa isihali amatunda awabiryohebwa.

Mulusaye, mubye ndumbu,

Muyihange esyongyimba sy’esaki* omo mbindi syenyu.

12 Mulire imunemuyihumanga oko bikuba

Busana n’amalima aghuwene na busana n’omuliki w’omuzabibu owakahetaya ndeke.

13 Kusangwa ekihugho ky’abandu baghe kikendisyusulamo amahwa n’emisaki-saki

Akendisyusula omo manyumba wosi awalimo obutseme,

Inga, omo muyi w’eriyisyandira.

14 Kusangwa enyumba nyiri-nyiri eyikongotere yabirisighanibwa;

Omuyi w’olukanda abirilekeranibwa;

E Ofeli n’enyumba nyiri-nyiri byabiribya matongo,*

Byabiribya butseme bw’esyopunda sy’omoli,

Olulisiryo lw’ebihangulo,

15 Erihika omughulu ekirimu kikendisyutulirwa okw’itwe erilua endata,

N’embwarara iyabya lirima ly’amatunda,

N’eririrma ly’amatunda iryalangirwa mo musitu.

16 Neryo obulingirirania bukendisyikala omo mbwarara,

N’eritunganene rikendisyikala omo ririma ly’amatunda.

17 Eritunganene ly’ekwenene rikendisyaluiramo obuholo,

Inga, eritunganene ry’ekwenene likendisyaleta eritulera n’embolere eby’erikota.

18 Abandu baghe bakendisyikala omo mwanya w’obuholo,

N’omo bwikalo obuli mbolere n’omo ah’erilukira ahatulere.

19 Aliwe amatsuku* akendisyaterya omusitu wosi,

N’omuyi akendisyaterera ahisi owosi.

20 Mutsemire inywe mukabiba embuto oko misike y’amaghetse wosi,

Inywe mukatuma* enume y’ende n’epunda.”