Isaya
43 Neryo lino, Yehova,
Oyo wakuhangyika, iwe Yakobo, oyo wakubumba iwe Israeli, ati:
“Sighubahe, kusangwa nabirikukombola.*
Nabirikubirikira oko rina lyaghu.
Uli waghe.
2 Omughulu ukendisyalaba omo maghetse, ngendisyabya inine naghu,
N’omughulu ukalaba omo syonyusi, sisyendisyakubwaghirako.
N’omughulu ukalaba omo muliro, siwendisyahya,
Kutse ekirimu ky’omuliro sikyendisyakubeba.
3 Kusangwa indi Yehova Mungu waghu,
Omubuyirire wa Israeli, Omulamya waghu.
Nabiriha e Misri eribya ndihi busana naghu,
E Etiopia ne Seba omo mwanya waghu.
4 Kusangwa muwabya w’obughuli omo meso waghe,
Muwasikibwa, naghe nabirikwanza.
Neryo ngendiha abandu omo mwanya waghu
N’erihingania ebihanda busana n’engebe yaghu.*
5 Isighubaha, kusangwa nine haghuma naghu.
Ngendileta abana baghu erilua eyo eryuba likasira
N’erikuhindania haghuma erilua eyo eryuba likalengera.
6 Ngendisyabwira oluhande lw’endata niti, ‘Lwikabo!’
N’oluhande lw’eyikwa niti, ‘Sighukakirayebo.
Mulete abaghala baghe erilua ehali, n’abali baghe erilua oko nduli sy’ekihugho,
7 Obuli mundu oyukahulawa omo rina lyaghe
N’oyo nahangyika busana n’olukengerwa lwaghe,
Oyo nabiribumba n’erihangyika.’
8 Muhulukaye abandu abali ng’esyondimetime, nomo banawite ameso,
N’abatsiha, nomo banawite amatwi.
9 Ebihanda byosi biyihindanaye haghuma,
N’ebitunga by’abandu bihindane haghuma.
Nindi okw’ibo oyo wangatoka eritula omwatsi oyu?
Kutse banganaleka itwowa emyatsi y’erimbere?
Balete abimiri* babo erikangania ngoko basingene,
Kutse bowe n’eribugha bati, ‘Ni kwenene!’”
10 “Muli bimiri* baghe,” Yehova atya,
“Inga, omughombe waghe oyo nabirisombola,
Imwatoka eriniminya n’erinikirirya*
N’erilangira ngoko sindibinduka, nina ngye.
Enyuma syaghe sihetabya oghundi Mungu,
N’embere syaghe sihehatabya ghundi.
11 Ingye indi Yehova; sihali oghundi mulamya ate ini na ngye.”
12 “Ningye natulagho n’erilamya n’eribugha
Omughulu omo kati-kati kenyu habya isihali omungu w’ehandi.
Neryo muli bimiri baghe,” Yehova atya, “naghe niri Mungu.”
13 Kandi erilua kera na kera siniribinduka;
Kandi sihali oyo wangatoka erisaghula ekindu kyosi-kyosi omo byala byaghe.
Omughulu ngakola omwatsi mulebe, nindi yo wangakakirya?”
14 Yehova, Omutongolya wenyu, Omubuyirire wa Israeli ati:
“Busana n’endundi yenyu ngendisyatuma omundu e Babiloni n’eriterya emihomo y’esyongyo,
N’Abakaldea bakendisyayilakira omo bulighe omo mato wabo.
15 Indi Yehova, Omubuyirire wenyu, Omuhangyiki wa Israeli, Omwami wenyu.”
16 Bino byo Yehova akabugha,
Oyukahira omo ngetse mw’enzira
N’embalo omo maghetse awaghungire,
17 Oyukahulukaya engurubani y’amalwa* n’esabayiri,
Omulondo w’abasuda haghuma n’esyombangyi sy’amalwa, ati:
“Bakendisyaghotsera kandi sibendisyahangana.
Bakendisyahwerekerera, ibakutuka ng’orutambi olukaka.”
18 “Simwibuke emyatsi ya kera,
Kandi isimwabera erighanirya oko byabirilaba.
19 Mulebaye! Ngakola omwatsi muhya-muhya;
Nibya lino anemuhuluka.
Simulilangiragho kwehi?
Ngendihira omo mbwarara mw’enzira
N’esyonyusi omo lukwesese.
20 Esyonyama sy’omoli esiri omw’irungu sikendisyanyisikya,
Esyombwa sy’omoli* n’esyombuni,
Kusangwa ngaleta omo mbwarara mw’amaghetse
N’esyonyusi omo lukwesese
Erinywisya abandu baghe, abasombolwa baghe,
21 Abandu abo nayihangyikira
Batoke eritulaghania eripipa lyaghe.
22 Nikwa siwetanilakira, iwe Yakobo,
Kusangwa nabirikuluhya, iwe Israeli.
23 Simutaniletera esyombuli busana n’obuhere bwenyu bw’eryokererya
Kutse eriniha olukengerwa omo syohongo syenyu.
Sinitabakasa niti muniletere ekihembo,
Kutse eribaluhya omw’ibasaba obubani.
24 Mumutanighulira akane* oko syofranga syenyu,
Kandi mumutanyughutya omo bisabu by’amahere wenyu.
Omo mwanya w’ekyo, mwabirinihekya obulito bw’amalolo wenyu
N’eriniluhya omo bibi byenyu.
25 Ingye, ningye ngasangula ebibi byenyu* busana n’erina lyaghe,
Kandi sinendiibuka amalolo wenyu.
26 Munyibukaye; tusitakane;
Inywe mutonde erikangania ngoko musingene.
27 Ye tata-kulu wenyu w’erimbere mwahalya,
N’esyombuyi* syenyu syabiriyisamambula okw’ingye.
28 Neryo ngendisyatsandya abanya-mwami b’ahabuyirire,
Kandi ngendiha Yakobo okw’iheribwa
N’erileka Israeli owe ebitsumi.