Isaya
55 Mwase, inywe bosi mukwire enyota, mwase ahali amaghetse!
Inywe mutawite oko syofranga, mwase, mughule n’erirya!
Inga, mwase, mughule edivai n’amasabu butsira franga kandi butsira eriliha.
2 Busanaki mukabera eriliha esyofranga oko kate kalyo,
Kandi busanaki mukahereraya esyofranga syenyu* oko bityughutaya?
3 Muteghe amatwi, mwase eyo niri.
Muhulikirire, neryo mukendibyaho,*
Neryo naghe ngendikola nenyu endaghane ya kera na kera
Erikwamana n’olwanzo oluteleghula olo nalagha Daudi.
Endaghane eyo ni y’ekwenene.*
4 Mulebaye! Nabirimuyira mo mwimiri busana n’ebihanda
Omusondoli kandi omukulu* busana n’ebihanda.
5 Hulikirira! Ukendisyabirikira ekihand ekyo utasi,
N’ab’ekihanda ekite kyatakuminya bakendisyasa eyo uli
Busana na Yehova oMungu waghu, Omubuyirire wa Israeli.
Kusangwa akendisyakuhamya.
6 Musondaye Yehova inyakinasungika.
Mumubirikire inyakine hakuhi.
7 Omundu mubi aleke enzira yiwe
N’oyukakola ebituwene aleke amalengekania wiwe mabi;
Asube oko Yehova, naye akendimughanyira,
Asubire oMungu wetu, kusangwa akendimubuyira.*
8 “Kusangwa amalengekania waghe si malengekania wenyu,
N’esyonzira syenyu si nzira syaghe,” Yehova atya.
9 Kusangwa ngoko ekyanya kiri endata yo hali oko kihugho,
Esyonzira syaghe ko siri sitya endata oko syenyu
N’amalengekania waghe ali endata yo hali oko malengekania wenyu.
10 Kusangwa ngoko embula n’enzururu bikanalua endata
Kandi sibirisubula bite byaheherya ekihugho, eriyirakyo kilasaye n’erihetya
Eriha embuto oko yukabiba n’akalyo oko oyukalya,
11 Ekinywa ekikalua omo buno bwaghe ko kikendisyabya kitya.*
Sikyendisyanisubako butsira ekyo kyamakola,
Aliwe kikendisyaberererya ekyosi-kyosi ekyo ngayisunza,*
Kandi kikendisyatoka ndeke-ndeke ebyo ngatumakyo niti kikole.
12 Kusangwa mukendisyahuluka n’obutseme,
N’erisubulibwa omo buholo.
Ebitwa n’ehitwa bikendusyuta obwagho bw’obutseme embere syenyu
N’emiti yosi y’omoli ikendisyabanda oko byala.
13 Ekilaghu kikendisyalasa omo mwanya w’omusaki-saki,
N’omuti w’omuhadasi akendisyalasa omo mwanya w’ekyatsinge.
N’ekyo kikendisyakumayirya* erina lya Yehova,
Ekiminyikalo kya kera na kera ekitendisyaluaho.