Isaya
54 “Wute obwogho bw’obutseme, iwe mukali mughumba, iwe ute watabuta!
Uyitsangure n’erisumba omulenge w’obutseme, iwe ute watowa obulumi bw’eributa,
Kusangwa abana* b’oyo wabirisighanibwa ni bangyi
Kulenga abana b’omukali oyuwite omulume,”* Yehova atya.
2 “Ukanyaye omwanya w’ehema yaghu.
Usanze esyongyimba sy’ehema y’etabernakulo yaghu nene.
Isiwayikakiraya; ukakaye esyokamba sy’ehema yaghu,
Usikaye esyongondo* sy’ehema yaghu.
3 Kusangwa ukendisyakakya emipaka* yaghu oko luhande lw’amali n’olw’amalembe.
Abana baghu bakendisyatabala oko bihanda,
Kandi bakendisyikala omo miyi eyabiribya matongo.
4 Isighubaha, kusangwa siwendisyahemulwa;
Kandi isiwayowa nga wamakuta-kuta, kusangwa siwendisyaluhira busa.
Kusangwa ukendisyibirirwa erihemuka ly’omo bumbesa bwaghu,
Kandi akahemulo k’obukwa-kali siwendisyasyibukako.”
5 “Kusangwa Omubumbi waghu Mukulu ali nga mwira waghu,
Yehova w’emilondo lyo rina riwe,
Omubuyirire wa Israeli yo Mutongolya waghu,
Akendisyahulwa mo Mungu w’ekihugho kyosi.
6 Kusangwa Yehova mwakubirikira, ng’omukali oyo wabirisighanibwa n’oyukwire obulighe,*
Ng’omukali oyo walunga inyakine mulere n’enyuma sy’aho amalekeranibwa,” oMungu waghu atya.
7 “Munakusighania omo katambi kake,
Aliwe omo bughanyiri bwaghe buenene, ngendisyakukuma-kuma.
8 Omw’ihitana linene kutsibu,* munakubisa obusu bwaghe omo katambi kake,
Aliwe omo lwanzo oluteleghula olwa kera na kera, ngendisyakukangania obughanyiri,” Yehova atya, Omutongolya waghu.
9 “Eki kiri okw’ingye ng’ebiro bya Noa.
Ngoko nananalapa niti amaghetse w’oko mughulu wa Noa syendisyasyaswika ekihugho,
Kutya ngalapa* ngoko sinendisyasyakuhitanako kutse erikuhayira.
10 Kusangwa ebitwa byanganalusibwaho
N’ehitwa hyanganasuka-sukanibwa,
Aliwe olwanzo lwaghe oluteleghula silwendisyalusibwa okw’iwe,
Kutse endaghane yaghu y’obuholo siyendisyasuka-sukanibwa,” Yehova atya, oyukakukwira obulighe.
11 “Iwe mukali oyo wabiryaghalwa, oyo wabirighulukibwa omo kihunga, oyute wakiranibwa,
Ngahimba amabwe waghu omo poto eyiwatire ndeke
N’efondasyo yaghu omo mabwe w’eyakuti.
12 Ngendisyakola omunara waghu omo zabarijani,*
N’esyongyo syaghu omo mabwe awakangabasenie,*
N’emipaka yaghu yosi omo mabwe w’obughuli.
13 N’abaghala* baghu bosi bakendisyakangiriribwa na Yehova,
N’obuholo bw’abaghala* baghu bukendisyabya buenene.
14 Ukendisyahandwa ndeke-ndeke omo ritunganene.
Ukendisyabya hali okw’inuba,
Siwendisyubaha kindu kandi sihali ekikendisyaleka iwahahukya omutima.
Kusangwa eryubahya siryendisyahika hakuhi naghu.
15 Omundu amalwa naghu,
Is’ingye niryamulayira.
Owosi-wosi oyukalwa naghu, akendisyawa busana naghu.”
16 “Lebaya! Ningye nahangyika omuhesi,
Oyukabuhirira omuliro w’amakala,
Omo mubiiri wiwe akakokotaya ekyamano ky’amalwa.
Kandi n’ingye nahangyika omundu oyukaheraya busana n’erileta eriherya.
17 Sihali ekyamano ky’amalwa ekikendisyakokotibwa busana naghu ekikendisyatoka,
Kandi ukendisyakinda obuli lulimi olukendisyahangana erilwa naghu.
Oyu ni mwandu w’abaghombe ba Yehova,
N’eritunganene ryabo rikalua okw’ingye,” Yehova atya.