Isaya
49 Inywe bitsira, munihulikirire,
N’enyu inywe bihanda bya hali, muteghe okutu.
Yehova mwanibirikira embere nibutawe.*
Abiryahula erina lyaghe inikine omo nda ya mama waghe.
2 Mwayira obuno bwaghe ng’omuyali owatwire;
Abirinibisa omo kitsutsu ky’ebyala biwe.
Mwaniyira mo musoha* owaghusungulire;
Mwanibisa omo lubo lwiwe.
3 Mwanibwira ati: “Uli mughombe waghe, iwe Israeli,
Oyo ngendisyakangania olukengerwa lwaghe erilabira iye.”
4 Nikwa munabugha niti: “Nabirinubira busa.
Munakolesya akaghala kaghe oko mwatsi owategho, oko busa.
Aliwe oko kwenene, eritswera lyaghe liri haghuma na Yehova,*
N’ekihembo kyaghe kiri haghuma n’oMungu waghe.
5 Na lino, Yehova oyo wanibumba eritsuka omo nda eribya mughombe wiwe,
Abiribugha ati nisubaye Yakobo okw’iye,
Israeli ahindanibawe embere siwe.
Ngendihalambwa omo meso wa Yehova,
N’oMungu waghe akendisyabya inyabiribya kaghala kaghe.
6 Naye mwabugha ati: “Sikitosire eribya ighuli mughombe waghe
Busana n’erisubya ebihanda bya Yakobo
Na busana n’erisubulya abateghibawa ba Israeli.
Aliwe kandi nabikuherera eribya kyakakala ky’ebihanda,
Omulamo waghe atoke erihika oko nduli sy’ekihugho.
7 Yehova Omutongolya wa Israeli, Omubuyirire wiwe, akabugha oko oyughonerwe, oyo ebihanda biponire,* omughombe w’abatabali ati:
“Abami bakendisyalangira n’erihangana,
N’abanya-mwami bakendisyunama
Busana na Yehova, omutaleghula,
Omubuyirire wa Israeli, oyo wabirikusombola.”
8 Yehova ati:
“Oko Mughulu w’olukogho, munakusubirya;
N’oko kiro ky’omulamo, munakuwatikya;
Munabya ngakuteya nitoke erikuherera mo ndaghane oko bitunga by’abandu,
Eritasyakokotya ekihugho,
Eribawatikya erisighalya emyandu yabo eyabiribya kima,
9 Eribwira abali omo muliki uti: ‘Muhuluke!’
N’abali omo mwirimya uti: ‘Muyikanganaye!’
Bakendisyalisiribwa oko musike w’esyonzira,
Emisike-misike* y’ehiyira hyosi ehyabirilyatangirwa ikendisyabya bulisiryo bwabo.
10 Sibendisyakwa enzala kutse enyota,
Kutse ekihuhania ekikalire kutse eryuba sibyendisyahisyabo.
Kusangwa Oyukabakwira obulighe akendisyabasondola,
Kandi akendisyasondolabo hakuhi n’esyonunga sy’amaghetse.
11 Ngendisyayira ebitwa byaghe byosi mo nzira,
N’esyonzira syaghe nene-nene sikendisyasumbwa.
12 Mulebaye! Aba bakalua hali-hali,
Kandi mulebaye! aba bakalua oko luhande lw’endata n’oko luhande lw’eyo eryuba likalengera.
N’aba bakalua omo kihugho kye Sinimu.
13 Iwe lubula, wute obwogho bw’obutseme, naghu iwe kihugho utseme.
Ebitwa bitsange-tsange ibinemusumba emilenge y’obutseme.
Kusangwa Yehova abirikirania abandu biwe,
Kandi akakwira abandu biwe abakaghalawa b’obulighe.
14 Aliwe Sioni mwabya akabuga ati:
“Yehova abirinisighania, kandi Yehova abirinibirirwa.
15 Omukali anganibirirwa omwana wiwe oyukanyonya*
Kutse eritendikwira obulighe omwana oyo walua omo nda yiwe?
Abakali aba nomo bangibirirwa, ingye sinendisyakwibirirwa n’ahake.
16 Lebaya! Nabirikuhandika oko bighanza by’ebyala byaghe.
Esyombimbo syaghu sine embere syaghe mughulu wosi.
17 Abana baghu bakanguha erisubula.
Abakusambula n’erikutsandya bakendisyalua ewaghu.
18 Usumbe ameso ulebaye eyi n’eyi.
Abosi bahindene haghuma.
Banemwasa eyo uli.
Yehova ati: “Kwenene-kwenene ngoko nineho,
Ukendisyambalabo ibo bosi ngoko omundu akanambala amapambo,
Kandi ukendisyayikundika b’oko ngoko omuheruki akanakola.
19 Emyanya yaghu nomo yanatsandibawa n’erisighala bihuma n’ekihugho kyaghu nomo kyanabya bisambukalirya,
Lino kikendibya kike oko bikereyo,
N’abakutoghotaya* bakendisyabya hali.
20 Abana* abakendisyabutwa enyuma sy’eriholerwa n’abandi bana baghu, bakendisyabughira omo matwi waghu bati,
‘Hano ni hake okw’ingye.
Nisonderaye omwanya munene nikale hano.’
21 Neryo ukendisyabugha omo mutima uti,
‘Nindi yo baba w’abana aba abo nabirihabwa,
Kusangwa indi mukali oyo wabiriholako abana kandi niri mughumba,
Oyo watwalawa omo bunyewa n’erihirwa omo muliki,
Aba balemberawa nandi?
Lebaya! Munasighanibwa ingyuwene,
Neryo aba, balua hayi?’”
22 Yehova Omukama Mukulu oko Bosi ati:
“Mulebaye! Ngendisumba ebyala byaghe oko bihanda,
N’erisumbira ebitunga by’abandu ekiminyikalo* kyaghe.
Bakendisyaleta abana baghu ibanahekirebo omo byala* byabo
N’eriheka abambesa baghu oko bitigho byabo.
23 Abami bakendisyabya batsungyi baghu,
N’abanya-mwami babo b’obukali bakendisyabya balemberi baghu.
Bakendisyatulama ahisi ibunama embere syaghu
Kandi bakendisyalyatsirira olututu l’oko bisando byaghu,
Naghu ukendisyakaswa eriminya ngoko indi Yehova;
Abakanihirako amaha sibendisyahemulwa.
24 Ababirihambwa banganalusibwa omo byala by’omulume w’amaka,
Kutse abandu abo omundu mukatsu abirinyegha banganalamibwa?
25 Aliwe Yehova ati:
“Nibya n’abandu abo omulume w’amaka abirihamba, bakendisyalwikwa,
N’abo omundu mutsibu abiritwala omo bunyewa, bakendisyalamibwa.
Ngendisyalwa n’abakalwa naghu,
Kandi ngendisyalamya abana baghu.
26 Ngendisyaleka abakakukola nabi ibalya emibiri yabo,
Kandi bakendisyatamira omusasi wabo ibabya nga bakatamira edivai eyisihirire.
N’abandu bosi* bakendisyakaswa eriminya ngoko indi Yehova,
Omulamya waghu n’Omutongolya waghu,
Ow’amaka wa Yakobo.”