Isaya
30 “Obulighe oko bana b’erighundu,” Yehova atya,
“Abakaberereraya emipango eyite yaghe,
Abakakola esyondaghane,* aliwe butsira erilabira ekirimu kyaghe,
Eritomeka erilolo oko rindi.
2 Bakandaghalira e Misri isibetanibulya,*
Erisonda ah’eribisama omo buteya bwa Farao*
N’erisondya obusayiro omo kyutsutsu kye Misri!
3 Aliwe obuteya bwa Farao bukendisyabya erihemuka lyenyu,
N’erisaghira omo kyutsutsu kye Misri akendisyabya mwatsi owakaleka imwakuta-kuta.
4 Kusangwa abanya-mwami biwe bali e Zoani,
N’abatumwa biwe babirihika e Hanesi.
5 Ekitunga ky’abandu ekite kyangabaletera ndundi yosi-yosi,
Kikendisyabahemula,
Abandu abatebangatoka eriwatikya kutse erileta endundi yosi-yosi
Aliwe abakaleta esisoni sisa n’erikuta-kuta.”
6 Ebinywa by’eritswera busana n’esyonyama sy’oko luhande lw’eyikwa;
Omo kihugho ky’obulighe n’eryaghalwa,
Eky’endale,* endale eyikaruruma,
Eky’emboma* n’enzoka y’omuliro eyikaghuluka,
Bakaheka obuteke bwabo oko mighongo y’esyopunda
N’ebindu byabo oko makuku w’esyongamia.
Aliwe ebindu ebi sibyendisyawatikya abandu.
7 Kusangwa obuwatikya bwe Misri sibuwite ndundi yosi-yosi.
Neryo busana n’ekyo nabiryahula eyi mo: “Rahabu, oyukayiteka buyira.”
8 Neryo ughende, uhandike omwatsi oyu oko kibambali ibanalangire,
Kandi uhandikegho omo kitabu,
Atoke erisyakolesibwa omo biro ebikasa eribya bwimiri bw’omughulu wosi.
9 Kusangwa ni bandu abakayisamambula, abana batebya,
Abana abatanzire eryowa emighambo* ya Yehova.
10 Bakabwira abalangiri bati, ‘Isimwalangira,’
N’eribwira abalangiri b’esyonzoli bati, ‘Isimwatukaniraya oko syonzoli sy’ekwenene.
Mutukaniraye oko myatsi y’ekisehya,* mulangire esyonzoli esite sy’ekwenene.
11 Mulue omo nzira; mukite oko kayira.
Mumbaye erihira Omubuyirire wa Israeli embere syetu.’”
12 Neryo Omubuyirire wa Israeli ati:
“Kundi mukaghana ekinywa eki
Kandi mukayiketera obubandi n’amatebo
N’erihira amaha omw’ebi,
13 Neryo ekibi eki kikendisyabya okw’inywe ng’oluhimbo olutwikire
Oluhimbo luli olughemerere olukisiya ilwatera
Lukenditera omo katambi kanyoho-nyoho, kitsumbukirania.
14 Lukendisyatwika ng’eriregha linene ly’omubumbi,
Eribunzukere ndeke-ndeke erihika oko kika isihali n’oluyo n’olughuma olusighere
Olw’erihekamo omuliro omo liko
Kutse eriteha amaghetse omo kitsinga.”*
15 Kusangwa Yehova Omukama Mukulu oko bosi, Omubuyirire wa Israeli, ati:
“Mwamabisuba eyo nyiri kandi mwamabitekana, imukendisyalamibwa;
Akaghala kenyu kakendisyabya eritulera, n’eriyiketera ingye.”
Nikwa momutanza.
16 Omo mwanya w’ekyo mumwabugha muti: “Iyehe, tukendisyaghenda oko syosabayiri tukatibita!”
Kwenene mukendisyatibita.
“Kandi tukendisyaghenda oko syosabayiri esitibitre!”
Neryo n’abakabakwama nabo bakendisyanguha.
17 Abandu 1 000 bakendisyatitimana busana n’erihaya ry’omundu mughuma;
Mukendisyatibita busana n’omuhayo w’abandu batano
Erihika omughulu abakendisyasaka omo kati-kati kenyu bakedisyabya ng’omutii owahandire oko singyi y’ekitwa,
Ng’enduyi y’ekiminyikalo oko katwa.
18 Nikwa Yehova analindire butsir’iluha* eribakangania olukogho,
Kandi akendihangana eribakwira obulighe.
Kusangwa Yehova ni Mungu w’obulingirirania.
Abakumulindirira butsir’iluha* batsemire.
19 Omughulu abandu bakendisyikala e Sioni, e Yerusalema siwendisyalira n’ahake. Oko kwenene akendisyakukangania olukogho ukalaka busana n’erisaba obuwatikya; akendisyakusubirya akanowakyo. 20 Yehova akendisyabaha amalighe mo kalyo n’erinuba mo maghetse. Nomo bine bitya, Omukangirirya waghu mukulu syendisyasyayibisa okw’iwe, n’ameso waghu akendisyayilangirira Omukangirirya waghu Mukulu. 21 N’amatwi waghu akendisyowa ekinywa enyuma syaghu kiti, “Enzira y’eyi. Mulabe muyo,” mbula mukendiya oko luhande lw’amali kutse mbula mukendiya oko luhande lw’amalembe.
22 Nenyu mukendisyatsandya efeza* eyiswikire esyosanamu syenyu esibatsire n’ehoro eyiswikire esyosanamu syenyu sy’ekyuma.* Mukendisyaghusabyo ng’olukimba olo omukali abirikolesya omughulu w’ebiro biwe by’omwisi.* Mukendisyabwirasyo muti, “Mulueho!” 23 Kandi akendisyawisya embula busana n’embuto eyo mukahera. N’akalyo akakera oko kitaka kakendisyabya kangyi kandi akuwene.* Ekiro ekyo, ebihangulo byenyu bikendisyalira omo bilisiryo binene-binene. 24 N’esyonde n’esyopunda esikalima sikendisyalya ebiti ebitwire ebyabirisihibwa omo biti by’omutsambere,* ebyabirikungutwa omo kipao n’omo lukanya lunene. 25 Kandi oko buli kitwa kiri n’oko buli katwa akayisumbire kukendisyabya esyonyusi n’amaghetse awakasenda, oko kiro ky’erikera linene omughulu amanyumba mali-mali akatera. 26 Oko kiro ekyo Yehova akendisyasenga amabune* w’abandu biwe n’erilamya ebironda byabo by’ebihunze ebyo ahunzabo, ekyakakala ky’omughenda owabiritangura kikendisyabya ng’ekyakakala ky’eryuba; n’ekyakakala ky’eryuba kikendisyakanya ngendo 7, ng’ekyakakala ky’ebiro 7.
27 Lebaya! Erina lya Yehova rinemwasa erilua hali-hali
Rinemwasa n’ebitu ebisusumenie kandi rihitene kutsibu.
Eminywa yiwe yoswire n’erihitana,
N’olulimi lwiwe luli ng’omuliro owakatoghotaya.
28 Omuka* wiwe ali ng’akusi akakabwagha erihika omo bikya,
Erisuka-sukania ebihanda omo kayingilo akakaheraya;*
Kandi akendisyahira omo mikese yabo mw’ekyuma ekikatwalabo hali oko nzira.
29 Nikwa olwimbo lwenyu lukendisyabya ng’olwimbo olukimbawa omo kiro
Mukayiteghekania* busana n’ekiro kikulu,
N’omutima wenyu akendisyatsema ng’ow’omundu
Oyukalendera* n’enyabulere
Akaghenda oko kitwa kya Yehova, Olukuka lwa Israeli.
30 Yehova akendisyowisya omulenge wiwe w’olukengerwa,
N’eribisula okuboko kwiwe kukandaghala omw’ihitana erikalire,
Haghuma n’ekirimi ky’omuliro owakatoghotaya,
Embula eyikalire kutsibu n’ekibula ekirimo emilumo n’embula y’amatsuku.*
31 Kusangwa e Asiria ikendisyakwa obuba busana n’omulenge wa Yehova
Akendisyahunzayo omo mwigho.
32 N’obuli ngendo eyo Yehova akendisyabya akahunza e Asiria omo mwigho wiwe w’erisuyiramo
Ikendisyakwamanisibwa n’ehikeleya, n’esyonanga
Akahungya ebyala biwe erilwa nabo.
33 Kusangwa e Tofeti yiwe yabiriteghekanibwa erilua kera;
Kandi yinateghekanibwe busana n’omwami.
Abirilunda esyongwi omo kyuna kiri kandi ekigahalihire,
Muli omuliro munene n’esyongwi nyingyi
Omuka wa Yehova owali ng’omuliro owakasenda ng’olusi,
Akendisyatimyayo.