Isaya
1 Esyonzoli esyo Isaya* mughala wa Amozi alangira esilebirye e Yuda ne Yerusalema omo biro bya Uzia, Yotamu, Ahazi, na Hezekia abami be Yuda:
2 Inywe lubula, muhulikirire, inywe kihugho, muteghe amatwi,
Kusangwa Yehova abiribugha ati:
“Nabirilembera n’erikulya abana b’obulume,
Nikwa babiriyisamambula okw’ingye.
3 Enume y’ende inasi ndeke omwenyeyo,
N’epunda inasi ekindu* ekyo omwenyeyo akalisiraya y’omo;*
Nikwa Israeli syanyasi,*
Abandu baghe bakayighendaya butsira menge.”
4 Obulighe oko kihanda ekikakola erilolo,
Abandu ababiriyikoberya omo kibi,
Olubuto lw’abandu babi, abana abakakita oko nzira!
Babirisighania Yehova;
Babiribya n’obutakenga embere sy’Omubuyirire wa Israeli;
Babirimubindukirya omughongo.
5 Kusangwa simutaleka eriyisamambula. Ni hayi ho mukendisyahunzirwa engendo eyikasa?
Omutwe wosi alwere,
N’omutima wosi alwere.
6 Eritsuka oko bulyatiro erihika oko mutwe, sihali ahakalire.
Hali ebironda, esyongubuke,* ebisusu ebyabiribya bironda
—Sibyetatunzwa* kutse eribohwa kutse eriheheribwa omo maghuta.
7 Ekihugho kyaghu ni matongo.
Emiyi yaghu yabiritimibwa omo muliro.
Ab’ehandi bakahunga ekitaka kyaghu ighunalangire.
Ekihugho kyaghu kiri ng’ekima ekyo ab’ehandi babiriherya.
8 Omwali we Sioni abirisighanibwa ng’akanyumba* akali omo lirima ly’emizabibu,
Ng’akabalalayi* omo lirima ly’ekokombre,*
Ng’omuyi owabiribambirwa.
9 Yehova w’emilondo kw’atatusighira abasaka bake,
Kumbe twabiribya nge Sodomo,
Kandi kumbe twabirisosa e Gomora.
10 Inywe batabali batsibu be Sodomo, muhulikirire ekinywa kya Yehova,
Inywe bandu be Gomora, muhulikirire ndeke emighambo* y’oMungu wetu.
11 Yehova ati: “Amahere wenyu mangyi akaniletera endundi yahi?”
“Nabiritamwa amahere wenyu w’eryokererya w’esyombangale n’ebisabu by’esyonyama syenyu esikalya ndeke,
Kandi siniritsemera omusasi w’esyonume sy’esyonde esikine nyilere, esyombangale, n’esyombene.
12 Omughulu mukasa eriyikangya embere syaghe,
Nindi yukabasaba erikola mutya,
Erilyatanga omo bibugha byaghe?
13 Mulekere aho erileta obuhere bwenyu bw’eyisyano obutawite ndundi.
Obukwa bwenyu ni nye okw’ingye.
Emighenda mihya-mihya, esyosabato, erikola emihindano minene-minene
—Sinangahanda mutima ngabalangira mukakola emihindano minene-minene eyibuyirire kandi imunemukola obulaghu.
14 Nabiripona* emighenda yenyu mihya-mihya n’ebiro bikulu byenyu.
Byabiribya muheke okw’ingye;
Namaluha erihekabyo.
15 Omughulu mukasanza ebyala byenyu,
Ngababisa ameso waghe.
Nomo mwangasaba emisabe mingyi
Sinirihulikirirayo;
Ebyala byenyu byoswiremo omusasi.
16 Munabe, muyiyire mo b’erire;
Mulusaye emikolere yenyu mibi embere syaghe;
Mumbaye erikola ekibi.
17 Mwighe erikola ekyuwene, musondaye obulingirirania,
Muhane oyukanubaya abandi,
Mulwire oko mbangwa y’oyutawite ise,*
N’erilwira oko mukwa-kali omo lubanza lwiwe.
18 Yehova ati: “Mwase tukanaye, tulungule emyatsi yo haghuma.”
“Ebibi byenyu nomo byangabya ng’engula,*
Bikendisyabya byeru-byeru ng’enzururu,
Nomo byangabya ng’erangyi y’omusasi ng’olukimba lw’omunyama
Bikendisyabya ng’obweya bw’embuli.
19 Mwamabya n’omutima owayiteghekire eryowa,
Kandi mwamabihulikirira, imukendisyalya ebindu ebyuwene by’omo kihugho.
20 Aliwe mwamabighana erihulikirira kandi mwamabiyisamambula
Omuyali iniakendisyabalya,
Kusangwa obuno bwa Yehova bwabiribughakyo.”
21 Batahi! omuyi mutaleghula abiribya mumbalaka!
Abya oswiremo obulingirirania;
N’eritunganene iryikere mugho,
Nikwa lino ikeremo abiti.
23 Abatabali baghu ni bandu b’erighundu, bakatamba n’abibi.
Obuli mughuma wa kubo anzire ekyutuliro kandi banzire ebihembo.
N’abatawite abise* sibalibakolera omo bulingirirania.
Olubanza lw’omukwa-kali silulibahikako.
24 Neryo okw’ekyo, Omukama w’ekwenene Yehova w’emilondo,
Ow’amaka we Israeli ati:
“Ehee! Ngendilusyaho abaniponire
N’eriyikisirya oko syonzighu syaghe.”
25 Ngendikusuyira,*
N’erinunia omutsafu waghu nganganunayagho omo sabuni,*
Neryo ngendisyalusyaho omutsafu waghu wosi.
26 Ngendisubya abatsweri baghu ngoko byanabya kera
N’erisubya abahani baghu ngoko byanabya oko nzuko.
Enyuma sy’aho, ukendisyahulwa mo Muyi w’Eritunganene, Omuyi Owateleghula.
27 E Sioni ikendisyakombolwa omo bulingirirania,
N’abandu bayo abakasubula bakendisyakombola omo ritunganene.
28 Abakayisamambula n’abakoli b’amalolo bakendisyahinolerwa haghuma,
N’abakasighanaya Yehova bakendisyahwaho.
29 Kusangwa emiti y’amaka eyo mwayitsutsa bakendisyakwayo esisoni,
Kandi mukendisyahemuka busana n’amalima* agho mwasombola.
30 Kusangwa mukendisyabya ng’omuti munene ow’ebiti ebinemuma,
Kandi ng’elirima eritemo amaghetse.