Isaya
2 Ebi byo Isaya mughala wa Amozi alangira ebilebirye Yuda ne Yerusalema:
2 Oko kitswe ky’enduli y’ebiro,*
Ekitwa ky’enyumba ya Yehova
Kikendisyahanganibwa ndeke endata oko singyi sy’ebitwa,
Kandi kikendisyasumbwa endata oko hitwa,
N’ebihanda byosi bikendisyakumukalira kukyo.
3 N’ebitunga bingyi by’abandu bikendisyayayo n’eribugha biti:
“Mwase twirukire oko kitwa kya Yehova,
Oko nyumba y’oMungu wa Yakobo.
Akenditukangirirya esyonzira siwe,
Netu itwalendera omo syonzira siwe.”
Kusangwa omughambo* akendisyalua e Sioni
N’ekinywa kya Yehova kikendisyalua e Yerusalema.
4 Akendisyatswera omo kati-kati k’ebihanda:
N’erilungula* emyatsi eyilebirye ebihanda bingyi.
Bakendisyahesa emiyali yabo mw’isuka
N’amatumo wabo mo bisara.
Ekihanda sikyendisyasumba omuyali erilwa n’ekindi kihanda
Kutse sibendisyasyigha amalwa.
5 Iwe nyumba ya Yakobo, wase,
Tulendere omo kyakakala kya Yehova.
6 Kusangwa wabirisighania abandu baghu, enyumba ya Yakobo,
Kusangwa babirikwama emitsye mingyi y’oko luhande lw’eyo eryuba rikasira;
Bakakola obulaghu ng’Abafilistini,
N’ewabo yoswire abana b’ababunga.
7 Ekihugho kyabo kyoswiremo efeza* n’ehoro,
N’obuteke bwabo sibuwite enduli.
Ekihugho kyabo kyoswiremo esyosabayiri,
N’esyongurubani* syabo siwite enduli.
8 Ekihugho kyabo kyoswiremo emiungu eyitawite omughaso.
Bakunamira emibiiri y’ebyala byabo-byabo
Ebindu ebyo eminwe yabo ibibene-bene yakokotaya.
9 Neryo omundu akunama, iniayikimya,
Naghu isiwangaghanyirabo n’ahake.
10 Mwingire omo lukuka muyibise omo lututu
Busana n’eribyaho lya Yehova erikubahaya kutsibu
Na busana n’olukengerwa lw’obukulu bwiwe.
11 Ameso awakayiheka akendisyabonderibwa,
N’erighundu ly’abandu rikendisyakehibwa.*
Yehova iye musa akendisyahalambwa omo kiro ekyo.
12 Kusangwa ni kiro kya Yehova w’emilondo.
Ekiro ekyo kikasira owosi-wosi oyukayihaghata n’oyukayiheka,
Kikasira obuli mundu abye w’endata kutse w’ahisi,
13 Kikasira emiti yosi y’emierezi ye Lebanoni emiri-miri n’eyiyimolekire
N’oko miti yosi y’emialoni ye Bashani,
14 Oko bitwa biri-biri byosi
N’oko hitwa hyosi ehiri-hiri,
15 Oko buli nyumba nyiri-nyiri n’oko buli luhimbo olukongotere,
16 Oko mato manene-manene wosi we Tarsisi
N’oko mato wosi awaghambire.
17 Eriyiheka ly’abandu likendisyakimibwa,
N’eriyihaghata ly’abandu likendisyakehibwa.*
Yehova musa yukendisyahamibwa oko kiro ekyo.
18 Emiungu eyitawite omughaso ikendisyabulirana olosi.
19 N’abandu bakendisyingira omo myangalu y’amabwe
N’omo byuna by’omo kitaka,
Busana n’eryubahya lya Yehova
Na busana n’olukengerwa lw’obukulu bwiwe,
Omughulu akendisyahangana akasuka-sukania ekihugho omo buba.
20 Oko kiro ekyo, abandu bakendisyimya emiungu yabo eyitawite omughaso ey’efeza n’ey’ehoro
Eyo bayikokoteraya eribya bakunamirayo,
Bakendisyaghusirayo ebingiri* n’ebilima-lima.
21 Batoke eringira omo myangalu y’amabwe
N’omo mighenyo y’esyonguka,
Busana n’eribyaho lya Yehova erikubahaya kutsibu
Na busana n’olukengerwa lw’obukulu bwiwe,
Omughulu akahangana erititimania ekihugho omo buba.
22 Batahi, muleke eriyiketera omundu buyira,
Oyuli muka buyira omo mihuli* yiwe.
Mukamutsomanakoki?