Tukawatikaya tuti abalikyetu abakaghalawa?

Hakabya hamabya omwatsi owakaghalaya abandu kutse ekitsinduli, Abimiri ba Yehova bakasondaya butsirilinda ekyo bangakola eriwatikya abalikyabo. Obuwatikya obu bukakanganaya ngoko twanzene kundu. (Yoane 13:34, 35; 1 Yoane 3:17, 18) Tukawatikanaya tuti?

Tukasongaya esyofranka. Omughulu enzala nene yabya e Yudea, Abakristo abe Antiokia mubatumira abalikyabo b’esyofranka esy’eribawatikya. (Emibiri 11:27-30) Munabwire kutya, tukabya twam’owa ngoko abalikyetu banemughalwa omo kihugho kilebe, tukabatumira obuwatikya erilabira omo ndeko yetu.​—2 Abanya Korinto 8:13-15.

Tukawatikaya n’omo sindi nzira. Abasyakulu b’endeko abali aho balikyetu bakaghalawa bakayikasa baminye ahali obuli mughambuli kandi ng’ali ati. Akatunga k’obuwatikya kanganaghabira abandu be byalya, amaghetse w’erinywa, esyongimba, ah’erikesya, n’edawa. Abimiri banene abasi omubiri mulebe bakayiherera eriyawatikya; erikokotya amanyumba awabiritsanda kutse Ebisenge by’Obwami. Obughuma obo tuwite omo ndeko n’erikolera haghuma bikaleka itwabana luba obuwatikya n’abandu abakendiwatikya. Tukawatikaya ‘abali omo [ndeko] y’abikirirye,’ aliwe kyamatokekana, tukawatikaya n’abandi abate omo dini yetu.​—Abanya Galatia 6:10.

Tukabasubaya mutima omonda. Abalyaghalawa bakayitagha kutsibu-tsibu erisubibwa mutima omonda. Oko katambi ng’ako, Yehova ‘oMungu w’erikirania lyosi’ akatuha akaghala. (2 Abanya Korinto 1:3, 4) Tukatsema tukabwira abakaghalawa emilaghe eyiri omo Biblia, eyikabawatikaya balighe kwenene-kwenene ngoko hasiya hake Obwami b’oMungu ibwabughaho amalighe wosi.​—Eribisulirwa 21:4.

• Ni kyahi ekikatokesaya Abimiri ba Yehova bawatikanaye butsirilinda omughulu hamabya omwatsi owakaghalaya?

• Twangasubya tuti omutima omonda abakaghalawa?