Ulole embere erikulya olwanzo lwaghu oko Yehova n’oko bandi

1. Omughulu watsuka eriyifunza eBiblia muwigha emyatsi yahi?

UKINIBUKIRE omughulu watsuka erigha eBiblia? Alinga muwasweka eriminya ngoko oMungu awite erina. Alinga muwayowa ndeke omughulu waminya ngoko oMungu syalighalaya abandu omo muliro. Kandi alinga muwatsema kutsibu eriminya ngoko abanzwa baghu bakendisyalubuka neryo iwatasyabya nabo omo paradiso.

2. Ukalola embere erigha amakangirirya w’ekwenene w’eBiblia, ni sindi binduka syahi esyo wakola? (Abanya Efeso 5:1, 2)

² Ukalola embere eriminya bingyi oko Yehova olwanzo lwaghu mulwalola embere erikula. Olwanzo olo mulwakukuna erikolesya ebyo ukigha. Muwayisogha ndeke ukakolesya esyokanuni sy’eBiblia. Muwigha erilengekania n’erikola emyatsi eyuwene kundi wabya wanzire eritsemesya oMungu. Ngoko omwana akigha omubuti ow’olwanzo naghu muwigha Tata waghu w’elubula.​—Soma Abanya Efeso 5:1, 2.

3. Tutolere eribya tukayibulya amabulyo wahi?

³ Litore itwayibulya tuti: ‘Olwanzo lwaghe oko Yehova lunemulola embere erikanya kulenga omughulu natsuka erigha eBiblia? Enyuma sy’eribatisibwa ninemuyikasa eribya nga Yehova omwikangania abaghala n’abali betu ngoko ni banzire?’ Twamabilangira olwanzo lwetu oko Yehova n’oko bandi isilulikula ngoko litolere, isitwabunika mutima. N’ekyo mukyanahikira Abakristo b’erimbere. Yesu mwatalekerania Abakristo b’erimbere abo, netu syangatulekerania. (Erib. 2:4, 7) Yesu anasi ngoko twanganasubira olwanzo olo twabya nalo omughulu twabya tukigha eBiblia.

4. Omo mwatsi ono tukendikania okuki?

⁴ Omwatsi ono akenditukangania ngoko twangakulya olwanzo lwetu oko Yehova n’oko bandi. Kandi tukendigha oko miyisa milebe eyo twangabana twamabianza Yehova yo kutsibu n’abaghala n’abali betu.

UKULAYE OLWANZO LWAGHU OKO YEHOVA

5-6. Paulo mwalaba omo maligho wahi akatulira, aliwe niki kyo kya mukuna erilola embere erikolera Yehova?

⁵ Omukwenda Paulo abya n’obutseme erikolera Yehova, aliwe sikyabya kyolo. Kangyi-kangyi, Paulo inyakaghenda olughendo luli kandi oko mughulu wiwe eribalama syabya mwatsi molo. Omughulu abya akabalama, Paulo inyakayeghaya kangyi-kangyi “omo bwiko bwʼesyonyusi” nomo “bwiko bwʼabarahi.” Kandi ihakanabya omughulu esyonzighu siwe isyamuhunza. (2 Kor. 11:23-27) Kangyi-kangyi, Abakristo balikyabo isibalimusima busana n’ebyo akabakolera.​—2 Kor. 10:10; Flp. 4:15.

⁶ Niki kyo kyawatikaya Paulo erilola embere erikolera Yehova? Paulo mwigha bingyi oko mibere ya Yehova erilabira Amasako n’ebyabya akayilangirira. Paulo mwikirirya ngoko Yehova amwanzire. (Rom. 8:38, 39; Flp. 2:4, 5) Ekyo kyo kyamukuna eryanza Yehova yo kutsibu. Paulo mwakangania olwanzo lwiwe oko Yehova omwilola embere erikolera abandu b’oMungu.​—Ebr. 6:10.

7. Niki kyo kyangatuwatikya erikulya olwanzo lwetu oko Yehova?

⁷ Twanganakulya olwanzo lwetu ok’oMungu omwiyiteghererya Ekinywa kiwe. Omughulu ukasoma eBiblia uyikase erilangira obuli mulondo ng’amakwighisyaki oko Yehova. Uyibulaye kino: ‘Omwatsi ono amanikangania ati ngoko Yehova anyanzire? Omwatsi ono amanikangirirya emyatsi yahi eyangaleka inanza Yehova?’

8. Omusabe akatuwatikaya ati erikulya olwanzo lwetu oko Mungu?

⁸ Ekindi ekyangatuwatikya erikulya olwanzo lwetu oko Yehova ry’eribya tukamusaba obuli kiro. (Esy. 25:4, 5) Neryo Yehova naye inyakendisubirya oko misabe yetu. (1 Yoa. 3:21, 22) Mwali wetu Khanh, ow’omo Asia, akabugha ati: “Oko mwanzo munanza Yehova busana n’ebyo nabya ng’igha, aliwe nabere nabilangira ngoko Yehova anemusubirya oko misabe yaghe, munatasyamwanza kutsibu. Ekyo mukyanikuna eribya ngakola emyatsi eyikamutsemesaya.”b

UKULAYE OLWANZO LWAGHU OKO BANDI

9. Timoteo mwakangania ati ngoko anemulola embere erikulya olwanzo lwiwe oko baghala n’abali babo?

⁹ Abere abibya Mukristo, Paulo mwahindana n’omulwana mughuma oyukahulawa mo Timoteo. Timoteo inyanzire Yehova n’abandu. Paulo mwabwira Abanya Filipi ati: “Si ngwite mundu nga [Timoteo] oyu wangaganirya emyatsi yenyu ndeke.” (Flp. 2:20, NTN62) Paulo mwatowa abandu bakabugha bati Timoteo akatondeka emyatsi yo ndeke kutse bati ni mukangirirya mubuya, aliwe mwayilangirira ngoko Timoteo anzire kutsibu abaghala n’abali babo. Ahate n’eritika-tika esyondeko isikalindirira n’omuhwa Timoteo alendereresyo.​—1 Kor. 4:17.

10. Anna na mwira wiwe mubakangania bati olwanzo lwabo oko baghala n’abali babo?

¹⁰ Netu kutya, tukasondekanaya ehyanya ehy’eriwatikya abaghala n’abali betu Bakristo. (Ebr. 13:16) Tusube oko ky’erileberyako kya Anna, oyo twakanayako omo mwatsi owalaba. Enyuma w’ekihunga kinene erilaba, Anna n’omwira wiwe mubalenderera ekihanda kighuma eky’Abimiri ba Yehova, neryo bamafumbula ngoko ekihunga ekyo mukyatsandya olutwe lw’enyumba yabo. Neryo ekihanda ekyo isikitawite esyongyimba esy’erire. Anna akabugha ati: “Mutwimya esyongyimba syabo, twamafulasyo, twamagomasyo n’erilingasyo. Okw’itwe oyo abya mwatsi muke, aliwe mwaleka itwabya bira kutsibu okwihika munabwire.” Olwanzo olo Anna na mwira wiwe babya nalo oko baghala n’abali babo mulwabawatikya eribaha obuwatikya obo babya balaghireko.​—1 Yoa. 3:17, 18.

11. (a) Kangyi-kangyi abandi bakayowa bati omughulu tukakanganayabo olwanzo? (b) Ngoko kiri omo Emisyo 19:17, Yehova akayowa ati omughulu tukakanganaya abandi b’olwanzo?

¹¹ Omughulu tukakolera abandi ebyuwene n’erikanganiabo olwanzo, bakalangira ngoko tunemuyikasa erigha Yehova. Kandi banganatsemera ekyo kulenga ngoko tulwe tukalengekania. Khanh, oyo twabirikaniako, akibuka n’obutseme abandu abamuwatikaya. Akabugha ati: “Ngasima kutsibu abali betu banzwa ababya bakanitwala omwitulira. Ibakasyanyenda eka n’erinitwala okwiyalia akalio kughuma nabo n’erinyisubya eka mbolere. Nabiriminya ngoko ekyo kyabya kikabasaba eriyikasa kutsibu aliwe ibakatsema erikola batya.” Oko kwenene abandu bosi sibangabya bakatusima busana n’ebyo tukabakolera. Khanh akabugha atya oko abamuwatikaya: “Nanzire erilihabo busana n’ebyosi ebyuwene ebyo babirinikolera, aliwe sinasi eyo abosi bikere. Yehova iye anasi eyo bikere, neryo ngamusaba niti alihebo oko byosi ebyo babirinikolera.” Khanh akabugha ekwenene. Yehova akalangira emyatsi yosi eyuwene eyo tukakolera abandi, nibya n’omo angabya mwatsi muke. Akalangiragho mo buhere b’obughuli bunene kandi ng’omwinda owo akendisyatuliha.​—Soma Emisyo 19:17.

12. Abaghala betu bakakanganaya bati olwanzo lwabo oko ndeko? (Ulebaye n’epitsa.)

¹² Wamabya mulwana omo ndeko, wanganakangania ghuti ngoko wanzire abandi n’erisonda eriwatikyabo? Mughala wetu mulwana oyukaghulawamo Jordan mwabulia omusyakulu w’endeko nga anganatasyakolaki eriwatikya endeko. Omusyakulu oyo mwamusima busana n’ebyo abya akalolera endeko erihika aho. Neryo mwamuha amahano malebe awanganamuwatikya erikola ebingyi. Ng’eky’erileberyako, mwamubwira ati abye akahika oko kisenge ky’Obwami oko ndambi, abye akaramukya abandi, abye akasubirya oko mihindano kandi abye akatulira kangyi-kagyi haghuma n’abandu bomo kikuto kyabo n’erilengekania oko ebyo anganakola atoke eriwatikya abandi. Jordan abere abikolesya amahano ayo, mwatigha lisa ngoko angakola emyatsi milebe, aliwe kandi mwigha eryanza abaghala n’abali babo bo kutsibu. Jordan mwigha ngoko omughulu mughala wetu amabya mughobe muwatikya, sibugha ambu akabya imwamatsuka eriwatikya abandi aliwe nilola embere eriwatikyabo.​—1 Tim. 3:8-10, 13.

13. Niki kyo kyawatikaya mughala wetu Christian eritasyasubira obusyakulu?

¹³ Tubughe tutiki wamabya imuwakola kera ngo musyakulu kutse omughobe muwatikya? Yehova akinibukire omubírí owo wakola kandi akinanzire ekyakukuna erikola utya. (1 Kor. 15:58) Kandi Yehova anemulangira olwanzo olo unemukangania. Mughala wetu oyukahulawa mo Christian mwabunika mutima omughulu bamulusayako obusyakulu. Aliwe mwabugha ati: “Munayisogha erilola embere erikolera Yehova ngoko nangatoka busana n’olwanzo nomo sinikiri musyakulu.” Ebiro byabere byalaba, mwasubira omubírí wiwe w’obusyakulu. Christian akatasyatomekako ati: “Babere batasyaniyira mo musyakulu munubaha hake. Aliwe munayibwira niti, kundi Yehova amabinikangania olukogho lwiwe akatasyanyiyira mo musyakulu w’endeko, ngendiligha omubírí oyo kundi ni mwanzire kandi nyanzire baghala n’abali betu.”

14. Ebinywa bya mwali wetu we Georgia byamatwighisyaki?

¹⁴ Kandi abaghombe ba Yehova bakakanganaya olwanzo lwabo oko bandi bandu. (Mat. 22:37-39) Ng’eky’erileberyako, mwali wetu Elena ow’omo kihugho kye Georgia, akabugha ati: “Oko nzuko ekyabya kikanikuna eritulira l’olwanzo lwaghe oko Yehova. Aliwe olwanzo lwaghe lwabere lukakanyirira oko Tata waghe w’elubula, mulwakanyirira n’oko bandu. Munayikasa eribya ngalengekania oko maligho agho banemulabamo n’erisondekania emyatsi eyangatula oko mitima yabo. Eribya ngalengekania kubo ko nitya mukyanikuna eryanza kutsibu eribawatikya.​—Rom. 10:13-15.

YEHOVA AKENDISYATUHEMBA TWAMABIKANGANIA ABANDI B’OLWANZO

15-16. Ngoko kiri oko pitsa, ni miyisa yahi eyo tukabana twamabikangania abandi b’olwanzo?

¹⁵ Omughulu tukanganaya abaghala betu b’olwanzo, s’ibo basa bo bakabana endundi. Ekihunzo kye KORONA ky’abere kyatsuka, mughala wetu Paolo n’omukali wiwe mubawatikya abali betu abakekeluhire batoke erikolesya ndeke ebyombo byabo by’ekieletronike omwitulira. Mwali wetu mughuma oyo kyaba kikamukalako erikolesya ekyombo kiwe ky’ekieletronike mwatoka. Mwatoka erikolesyakyo erikokya ab’oko kihanda kiwe Okwibuka Oluholo lwa Yesu. Abandu 60 ba kubo mubakwama eprograme y’Oluholo lwa Yesu erilabira e vidéoconférence! Mwali wetu oyo na b’omo kihanda kiwe mubabana endundi erilabira obuwatikya bwa Paolo n’omukali wiwe. Enyuma, mwali wetu oyo mwahandikira Paolo ati: “Wasingya eritukangirirya itwe bakekulu. Sinangabirirwa n’ahake ngoko Yehova atutsomene kandi ngoko mumwakola kutsibu erituwatikya.”

¹⁶ Omwatsi oyo mwakangirirya Paolo esomo y’omughaso munene. Mwalangira ngoko olwanzo ni l’omughaso munene kulenga ebyo twasi kutse obutoki bwetu. Akibuka ati: “Nabya ngakola ng’omulebya w’omutimbo. Munabwire, abaghala n’abali betu banganabya ibabiribirirwa emikania eyo nabya ngalabya, aliwe bakinibukire ebyo nabya ngabakolera.”

17. Owundi oyukabana endundi omughulu tukakanganaya olwanzo nindi?

¹⁷ Omughulu tukakanganaya abandi b’olwanzo, netu tukabana endundi omo syonzira esyo tutalwe tuyilindirireko. Mughala wetu Jonathan oywikere omo kihugho kye Nouvelle-Zélande mwayilangirira ekyo. Kiro kighuma omwitungyi, eryuba iryabiryaka kutsibu, mwalangira omupainia akatulira iyuwene omo nzira. Jonathan mwayisogha eritulira haghuma n’omupainia oyo omwitungyi eryo. Aho-n’aho mwataminya ng’akendibana endundi yahi busana n’ekibuya ekyo alyakola. Akatasyatomekako ati: “Oko mughulu oyo isinyanzire eritulira.” Aliwe n’abere nalangira esyonzira esyo mupainia oyo abya akalolesya omwitulira n’ebighuma ebikalwiramo, ekyo mukyanikuna eritasyanza omubírí w’eritulira. Mutwabya bira kutsibu n’omughala wetu oyo kandi mwaniwatikya eritsemera omubírí w’eritulira n’eryuwania obwira bwaghe haghuma na Yehova.”

18. Yehova anzire itwakolaki?

¹⁸ Yehova anzire itwe bosi itwakulya olwanzo lwetu okw’iye n’oko bandi. Ngoko twamabigha, twanganawatya olwanzo lyetu oko Yehova omwibya tukasoma Ekinywa kiwe, erilengekania oko ebyo tukasoma n’eribya tukamubwira kangyi-kangyi omo musabe ngoko tukayowa. Olwanzo lwetu lukakanyirira, tukendisighala hakuhi na Yehova kandi tukendisighala hakuhi n’abaghala n’abali betu n’akandi tukendisyatsemera obwira obo kera na kera!