Wangabya ghuti omwira w’ekwenene?

WANABIRIBYA n’olubanza neryo iwabula omundu w’erikuwatikya? Tuli omo “emighulu eyikalire,” yanganaleka itwabunika mutima n’eriyowa omo mbwera kundi isituwite omundu ow’erikania naye. (2 Tim. 3:1) Aliwe, omughulu tukabana amaligho hakabya ihane abandu abangatuwatikya. EBiblia yikakanganaya omughaso w’eribya n’abira b’ekwenene omo “mighulu y’obuhanya.”—Misyo 17:17.

WANGABYA GHUTI OMWIRA W’EKWENENE?

Paulo inyane omo muliki, anemuha Tikiko ebaruha. — Nomo abya inyanabohire omo nyumba, omukwenda Paulo mwaberererya omubiiri wiwe omo buwatikya bw’abira biwe bataleghula

Omukwenda Paulo mwabalama n’abira biwe balebe omo mubiiri wiwe w’obumisionere, nabo mubamuwatikya omo syonzira nyingyi. (Kol. 4:7-11) Omughulu Paulo abya abohirwe e Roma, abira biwe mubamuwatikya omw’imukolera emibiiri eyo syenditoka erikola iyuwene. Ng’eky’erileberyako, Epafrodito mwamutumira ebindu ebyo abya alaghireko ebyalua oko baghala n’abali babo. (Filip. 4:18) Tikiko mwawatikya Paulo omw’itwala esyobaruha siwe omo syondeko. (Kol. 4:7) Omo buwatikya bw’abira biwe, Paulo mwatoka erikola omubiiri wiwe inyane omo nyumba y’omuliki n’omughulu abya omo ngomo. Munabwire, wangabya ghuti omwira w’ekwenene?

Munabwire hane abaghala n’abali betu abanemukangania ebyo abira bangakola batoke eriwatikania. Tulebaye eky’erileberyako kya mwali wetu oyukayikanganayamo mwira w’ekwenene oko Elisabet, omupainia w’omughulu wosi oyw’ikere e Espanye. Mama wiwe abere abihambwa n’obukoni bwa kasere akateko amaha w’erisyalama, mwali wetu oyo mwatumira Elisabet esyomesaje esiswiremo emilondo y’eBiblia. Elisabet akabugha ati: “Nabere nabana esyomesaje siwe, munayowa ndeke eriminya ngoko hane omundu oyunitsomene, n’ekyo mukyaniha akaghala ak’erikola ebyo nabya nitolere erikola.”—Misyo 18:24.

Twanganawatya obwira bwetu n’abaghala n’abali betu omughulu tukawatikayabo eriyatulira kutse eriya oko mihindano. Ng’eky’erileberyako, twanganayalabira mughala wetu kutse mwali wetu oyukekeluhire eriya naye oko muhindano kutse omo mubiiri w’eritulira. Wamabikola utya, imwanganasikania mitima. (Rom. 1:12) Aliwe, Abakristo balebe sibangatoka erilua eka wabo. Twangawatikyabo tuti?

UBYE MWIRA W’EKWENENE OKO ABATELUA EKA WABO

Abaghala n’abali betu balebe sibangatoka erihika kibiri-biri oko mihindano, kwamuhwa, kundi babirikwa obukoni obukalire. Tulebaye eky’erileberyako kya mughala wetu David oyowabanika n’obukoni bwa kasere. Mwabana amatunzo omo misi minene oko 6. Akabana amatunzo ayo, David n’omukali wiwe ye Lidia, ibakahindana oko Zoom.

Abira babo b’omo ndeko mubawatikyabo bati? Emihindano iyikabya yabihwa, abira babo balebe abali oko Kisenge ky’Obwami ibakakola ngoko bangatoka erikania na David na Lidia ibakine oko Zoom. Kandi David na Lidia bamabya imubakateka ekisubiryo oko muhindano, ibakabana esyomesaye esy’eribasima erilua oko baghala n’abali betu bakabasikya mutima. David na Lidia mubayowa bati? Mubayilangirira ngoko abagha n’abali babo babanzire kutsibu.

Mwali wetu anemutulira erilabira etelefone kughuma n’oghundi mwali wetu oyukekeluhire, anemumubwira ebinywa eby’erimusikya mutima. — Ubye ukalabya endambi omo mubiiri w’eritulira kughuma n’abaghala n’abali betu abate bangalua eka wabo

Kwamuhwa, twanganimya omupango ow’eritulira n’abaghala n’abali betu abatelua eka wabo. Twanganabindula eprograme yetu yo hake tutoke eritulira nabo. Aho ibakendiyilangirira ngoko situlitwabirirwabo. (Misyo 3:27) Twanganapanga nabo eritulira erilabira ebaruha kutse etelefone. Abaghala n’abali betu abatelua eka wabo banganakwama omuhindano w’eriyatulira erilabira e Zoom. David na Lidia mubatsemera kutsibu omupango oyo. David akabugha ati, “Eribya lisa oko muhindano w’eriyatulira haghuma n’ekikuto kyetu ky’amahubiri n’erihulikirira omusabe ibikatusikaya mutima kutsibu.” Kandi, kyamatokekana wanganabya ukasa n’omwigha waghu w’eBiblia eyiri omughala kutse mwali wetu oyutelua eka wiwe atoke eribana akanya ak’erisangira oko funzo.

Omughulu tukasiba kughuma n’abaghala n’abali betu abatelua eka wabo tukaminyabo ndeke n’emibere yabo mibuya, neryo tukabya bira kutsibu. Ng’eky’erileberyako, omughulu tukatulira nabo, twanganalangira obufundi obo bakakolesaya Ekinywa ky’oMungu kitoke eritula oko mitima y’abandu, n’ekyo kikaleka itwatasyatsemerabo kutsibu. Omughulu tukawatikaya Abakristo balikyetu omo myatsi y’obunya-kirimu, twanganabana abira bahya.—2 Kor. 6:13.

Omughulu Paulo abya omo maligho, Tito mwasa eyali akasyamukirania. (2 Kor. 7:5-7) Kyuwene eribwira abaghala n’abali betu ebinywa ebikabasikaya mutima; aliwe kandi, omwatsi wa Tito amatwibukya ngoko tukasikayabo mutima omughulu tukalabaya nabo endambi n’eriwatikyabo.—1 Yoh. 3:18.

UBYE MWIRA W’EKWENENE OKO ABAKENDERERIBAWA

Abaghala n’abali betu be Burusi babiritusighira eky’erileberyako ekyuwene oko mwatsi w’eriwatikania. Tulebaye eky’erileberyako kya Sergey n’omukali wiwe ye Tatyana. Abapolisi babere basyakwesa-kwesa omo nyumba yabo, mubahambabo n’eriyatondesyabo. Tatyana yo watsuka eritondesibwa n’enyuma sy’aho amasuba eka. Sergey akabugha ati: “Tatyana abere abihika eka, mwali wetu omutubaha mwasa ewetu erisyamubana. N’abandi baghala n’abali betu mubasyatuwatikya eryerya enyumba yetu kundi abapolisi ibabiritsatsanga ebindu byetu eyi n’eyi.”

Sergey akatasyongeryako ati: “Eritsuka kera, inanzire erisako ry’ Emisyo 17:17, erikabugha liti: ‘Omwira w’ekwenene akakanganaya olwanzo mughulu wosi, kandi ni mughala wabo mundu oyo wabutawa busana n’emighulu y’obuhanya.’ Omo mughulu oyo ow’eryendereribwa munalagha kutsibu oko buwatikya bw’abaghala n’abali betu. Neryo munayilangirira ngoko ebinywa by’ Emisyo 17:17 ni by’ekwenene. Yehova mwanitumira abira b’erisyanisubya mutima n’eriniwatikya.”a

Kundi tuli omo mighulu eyikalire, tulaghire kutsibu oko buwatikya bw’abira betu. Kandi tukendisyalagha kubo ko kutsibu omo mughulu w’eryaghalwa rinene. Kwesi, tuyikase lino eribya bira b’ekwenene!—1 Pet. 4:7, 8.

a Ulebaye omwatsi owakabanika oko jw.org, owali n’omutwe “Yehova abiriniha abira abatubaha.”