Ubatisibawe butsira lindi-lindi

1. Ni myatsi milebe yahi eyangaleka iwabatisibwa?

UNANZIRE Yehova Mungu oyo wakuha engebe n’obuli kihembo kibuya? Unanzire erimukangania ngoko umwanzire? Enzira eyuwene ey’erikola ekyo ry’eriyiherera okw’iye n’eribatisibwa. Omughulu ukakola ebyo, ukingira omo kihanda kya Yehova. Neryo Tata waghu w’elubula kandi mwira waghu akendikusondola n’erikutsomana kundu, ukendibya iwamabibya wiwe. (Esy. 73:24; Isa. 43:1, 2) Kandi eriyiherera oko Yehova n’eribatisibwa bikendikuha akanya ak’erisyatsemera engebe kera na kera.—1 Pet. 3:21.

2. Tukendikania okuki omo mwatsi ono?

² Hane ekikakukakiraya eribatisibwa? Kyamabya kitya, sighuli ighuwene. Amamilioni w’abandu babirikola esyombinduka omo mighendere n’omo nzira yabo y’erilengekania batoke eritolera eribatisibwa. Lino banemukolera Yehova n’obutseme kandi n’omuhwa. Wanganighaki oko by’erileberyako by’abandu balebe abatisibawa oko karne k’erimbere? Tukendikania oko myatsi milebe eyabya yikakakiryabo eribatisibwa n’esyosomo esyo twangigha kubo.

ABASAMARIA MUBABATISIBWA

3. Alinga ni myatsi yahi eyabya yikakakirya Abasamaria balebe eribatisibwa?

³ Oko mughulu wa Yesu, Abasamaria babya bandu b’omo kasomo akabya kutsibu-tsibu omo kiharo kye Shekemu ne Samaria, omo luhande lw’endata lwe Yudea. Abasamaria babya batolere eriligha amakangirirya wosi w’omo Kinywa ky’oMungu n’eriminyagho ndeke embere sy’eribatisibwa. Ekyo kyabya ky’omughaso kundi Abasamaria ibikirirye bati ebitabu bitano by’erimbere-mbere eby’omo Biblia bisa byo byasondolawa n’ekirimu ky’oMungu, ni bugha ambu Enzuko, erihika oko Eryibuka Ebihano, kandi alinga n’ekitabu kya Yosua. Aliwe Abasamaria babya bakalindirira Masiya ngoko Mungu alagha omo Eryibuka Ebihano 18:18, 19. (Yoh. 4:25) Neryo embere sy’eribatisibwa ibatolere eriligha ngoko Yesu yo Masiya oyo alaghawa. “Abasamaria bangyi” ibalighire ekyo. (Yoh. 4:39) Kandi, kundi Abakristo b’oko karne k’erimbere bangyi babya Bayahudi, alinga Abasamaria balebe babya batolere eribindula amalengekania wabo awatuwene oko Bayahudi.—Luka 9:52-54.

4. Ngoko kiri omo Emibiiri y’Abakwenda 8:5, 6, 14, Abasamaria balebe mubayiwata bati babyowa ebyo Filipo abya akabugha?

⁴ Ebyawatikaya Abasamaria eribatisibwa ni byahi? Filipo omuhubiri w’engulu mbuya abere abihubiryabo “emyatsi eyilebirye Kristo,” Abasamaria balebe mubaligha “ekinywa ky’oMungu.” (Soma Emibiiri y’Abakwenda 8:5, 6, 14.) Mubataghana erihulikirira Filipo nomo abya Muyahudi. Kwa muhwa, mubibuka emilondo milebe eyikakanganaya ngoko oMungu syawite akasololo. (Ebih. 10:17-19) “Mubowa n’omutima mughuma ebyo Filipo abya akabugha.” Filipo mwakola ebitiko-tiko bingyi, mwalamya amakoni n’erihigha ebirimu bibi. Neryo mubalw’ibayilangirira ngoko oMungu abya haghuma naye.—Emib. 8:7.

5. Ni myatsi yahi yo wamigha oko Basamaria?

⁵ Abasamaria bendighana erihulikirira Filipo kundi abya Muyahudi kandi babya isibalibatowa amakangirirya ayo. Aliwe mubatakola batya. Babere babikirirya ekwenene eyo Filipi abya akabakangirirya, Abasamaria mubatabya n’elindi-lindi, mubabatisibwa. EBiblia ikabugha yiti: “Babere babikirirya Filipo, oyo wabya akatula engulu mbuya y’Obwami b’oMungu n’eyilebirye erina rya Yesu Kristo, mubabatisibwa, abalume n’abakali.” (Emib. 8:12) Unikirirye ngoko Ekinywa ky’oMungu ni kwenene kandi ngoko Abimiri ba Yehova babirigha erikanganania olwanzo olo Yesu abugha ati lo lw’ekwenene? (Yoh. 13:35) Kwesi, isiwasagha eribatisibwa. Wanganayiketera ngoko Yehova akendikutsumula.

6. Eky’erileberyako kya Ruben kyamakuwatikya kiti?

⁶ Ruben, owe Alemanye, mwakulira omo kihanda ky’Abimiri ba Yehova. Aliwe, omughulu abya mulwana isikirirye oMungu ng’aliyo. Niki kyo kyamuwatikaya eritendibya akatika-tika? Mwalangira ngoko syasi emyatsi mingyi oko mwatsi oyo, neryo mwayisogha erighagho. Akabugha ati: “Munatsuka eriyighisya nitoke eriminya ekwenene. Munigha ngendo nyingyi omwatsi owakakanaya oko bindu eriyibutukira.” Mwasoma ekitabu Hane Omuhangyiki oyukutsomene? Ekitabu ekyo mukyawatikya Ruben yo kutsibu eriwatya obwikirirya bwiwe omo Mungu. Mwayibwira ati, ‘Namasweka! Kwesi oMungu aneho kwenene-kwenene!’ Abere abilenderera obwikalo bwetu bukulu, Ruben mwatsema akayilangirira ngoko ekihanda kyetu eky’omo kihugho kyosi kiri omo bughuma. Abere abisuba e Alemanye, Ruben mwabatisibwa n’emyaka 17. Wamabya ighukatika-tikira ebyo wabirigha, ukwese-kwese emyatsi omo bitsapo byetu. “Eriminya . . . ndeke” omwatsi oyo likendikuwatikya eritendibya ukatika-tika. (Efe. 4:13, 14) Kandi omughulu ukowa kutse ukayilangirira olwanzo n’obughuma obuli omo kati-kati k’abandu ba Yehova omo bindi bihugho kutse omo ndeko yaghu, ukatasyanza kutsibu abaghala n’abali benyu bosi.

SAULO WE TARSO MWABATISIBWA

7. Saulo abya atolere eribindula amalengekania wiwe okuki?

⁷ Tulebaye eky’erileberyako kya Saulo we Tarso. Inyasi kutsibu Emighambo y’Abayahudi kandi inyasikibwe kutsibu n’Abayahudi. (Gal. 1:13, 14; Filip. 3:5) Oko mughulu oyo, Abayahudi bangyi ibikirirye bati Abakristo babirighana obwikirirya, neryo busana n’ekyo, Saulo mwendereryabo kutsibu. Abya akayiteba ati anemukola erisonda ly’oMungu. (Emib. 8:3; 9:1, 2; 26:9-11) Saulo amabikiriryaYesu n’eribya Mukristo oyubatisibwe, inyakendiendereribwa.

8. (a) Niki kyo kyawatikaya Saulo eribatisibwa? (b) Ngoko kiri omo Emibiiri y’Abakwenda 22:12-16, Anania mwawatikya ati ye Saulo? (Ulebaye n’epitsa.)

⁸ Niki kyo kyawatikaya Saulo eribatisibwa? Yesu abere abikania na Saulo erilua elubula, ekyakakala kinene mukyamuyiramo ndimetime. (Emib. 9:3-9) Saulo mwakola amafungo omo biro bisatu, alinga akalengekania oko myatsi eyiryamuhikira. Oko kwenene, Saulo mwikirirya ngoko Yesu yo abya Masiya kandi ngoko abakwenda biwe bo babya bakaramya oMungu omo kwenene. Alinga Saulo mwayikubya bomo busana n’erisangira oko luholo lwa Stefano! (Emib. 22:20) Enyuma sy’ebiro bisatu, omwigha wa Yesu ye Anania mwasa eyiri Saulo, amalibula ameso wiwe n’erimubwira ati abatisibawe butsira lindi-lindi. (Soma Emibiiri y’Abakwenda 22:12-16.) Saulo mwayikehya, amahulikirira Anania n’eribatisibwa.—Emib. 9:17, 18.

9. Omwatsi wa Saulo amakwighisya esyosomo syahi?

⁹ Twanganigha esyosomo nyingyi oko mwatsi wa Saulo. Emiyiheko n’erisagha abandu byendimukakirya eriligha eribatisibwa. Aliwe mwatalighirabyo bimukakiraye. Saulo mwayikehya amaligha erikola esyombinduka omo ngebe yiwe atoke eribya mwigha wa Yesu. (Emib. 26:14, 19) Saulo mwaligha eribya Mukristo nomo anabya asi ngoko ekyo kikendileka ibamwendererya. (Emib. 9:15, 16; 20:22, 23) Nibya n’enyuma sy’eribatisibwa, Saulo mwalola embere eriyiketera Yehova amuwatikaye omo maligho mbiriri-mbiriri. (2 Kor. 4:7-10) Naghu wamabibatisibwa n’eribya Mwimiri wa Yehova, wanganabana amaligho mangyi kutse obwikirirya waghu ibwalengwako. Aliwe, wikiriraye kundu ngoko Yehova na Kristo bakendisyakuwatikya mughulu wosi.—Filip. 4:13.

10. Eky’erileberyako kya Anna kyamakwighisyaki?

¹⁰ Anna mwakulira omo luhande lw’Amatanga-ryuba olwe Bulaya. Nyinya wiwe abere abibatisibwa, tata wiwe mwamulighira erigha eBiblia inyane n’emyaka 9. Ekihanda kya Anna ibikere haghuma, neryo abatunga biwe babere babilangira ngoko abiritsuka erigha eBiblia n’Abimiri ba Yehova, mubatsuka erimwendererya kutsibu. Mubalangira ng’abirihemula ekihanda akaghana ekisomo ky’obo tata-kulu wabo. Anna abere abiyira oko mwaka 12, mwasaba tata wiwe ehamuli y’eribatisibwa. Baba wiwe mwasonda eriminya eriyisogha eryo nga muryalua oko mutima wiwe kutse ng’akakunawa n’omundu mulebe. Anna mwamusubirya ati, “Nanzire Yehova.” Neryo, baba wiwe mwamulighira eribatisibwa. Enyuma sy’eribatisibwa, abatunga biwe mubalola embere erimukolera muhanda. Omughuma w’oko batunga biwe mwamubwira ati: “Kwanya iwabya mumbalaka kutse iwabya ukafuta etaba omo mwanya w’eribya Mwimiri wa Yehova.” Anna mwayira ati? Akabugha ati, “Yehova mwangwatikya eribya n’akaghala, kandi baba na mama mubaniwatikya kutsibu.” Anna akahandika emighulu yosi eyo Yehova akamuwatikaya. Kangyi-kangyi akabya akaghusa eriso oko myatsi eyo, n’ekyo kikamuwatikaya eritendibirirwa ngoko Yehova amuwatikaya. Wamabya ighukubaha erisyendereribwa wibuke ngoko Yehova akendisyakuwatikya.—Ebr. 13:6.

KORNELIO MWABATISIBWA

11. Ni myatsi yahi yo yendileka Kornelio inatika-tika eribatisibwa?

¹¹ Kandi twanganigha esyosomo sy’omughaso oko Kornelio. Abya “mukulu w’abasuda 100,” abe Roma. (Emib. 10:1, ebinywa by’eyikwa) Busana n’ekyo, alinga inyasikibwe kutsibu n’abandu, kandi n’abasuda. Kandi “abya iniakawatikaya abera bo kutsibu.” (Emib. 10:2) Yehova mwamutumira omukwenda Petro erimutulira engulu mbuya. Kornelio mwanatika-tika eribatisibwa busana n’obukulu bwiwe?

12. Ekyawatikaya Kornelio eribatisibwa niki?

¹² Ekyawatikaya Kornelio eribatisibwa niki? EBiblia ikabugha yiti “abya akengire n’erisagha oMungu, n’ab’omo nyumba yiwe bosi babya ibakengire n’erisagha oMungu.” Kandi inyakalemba-lemba oMungu mughulu wosi. (Emib. 10:2) Petro abere abitulira Kornelio y’engulu mbuya, iye n’ekihanda kiwe mubalighayo n’eribatisibwa butsira lindi-lindi. (Emib. 10:47, 48) Kilangirikire ngoko Kornelio abya tayari erikola esyombinduka esitolere atoke eriramya Yehova kughuma n’ekihanda kiwe.—Yos. 24:15; Emib. 10:24, 33.

13. Eky’erileberyako kya Kornelio kyamakwighisyaki?

¹³ Nga Saulo, Kornelio naye endiyihambulisania omo bukulu bwiwe eritendibatisibwa atoke eribya Mukristo. Aliwe mwatakola atya. Naghu unatolere erikola esyombinduka silebe utoke eribatisibwa? Kyamabya kitya, uminye ngoko Yehova akendikuwatikya. Wamabiyikasa kundu erikolesya esyokanuni sy’eBiblia omo ngebe yaghu utoke erimukolera, inyakendikutsumula.

14. Wamighaki oko eky’erileberyako kya Tsuyoshi?

¹⁴ Tsuyoshi, owe Japo, mwabindula emyatsi milebe omo mubiiri wiwe atoke eribatisibwa. Inyawite omubiiri oko kalasi akakakangiriraya abandu eritokenda amawa wo ndeke, kandi iye iyusubukire omukulu w’akalasi ako. Omukulu oyo inyakatondeka amawa aw’erikolesya oko makinga w’ebiriro by’Ababuda. Neryo inyakabya abibula endambi, inyakatuma Tsuyoshi omo mwanya wiwe ayakole oko makinga ayo. Tsuyoshi abere abigha ekwenene oko baholi, mwalangira ngoko amasonda eribatisibwa ngambe inyaleka erikola oko makinga ayo. Neryo mwayisogha eritendibya akakola kugho. (2 Kor. 6:15, 16) Tsuyoshi mwayakania n’omukulu wiwe w’omubiiri oko mwatsi oyo. Omukulu oyo mwamulighira erilola embere n’omubiiri wiwe butsira erikola oko makinga ayo. Tsuyoshi mwigha oko mwaka mughuma, neryo amabatisibwa.a Wamabya ighutolere erikola esyombinduka silebe omo mubiiri waghu utoke eritsemesya Yehova, uyiketere kundu ngoko akendikuha ebyo iwe n’ekihanda kyaghu mulaghireko.—Esy. 127:2; Mat. 6:33.

ABANYA KORINTO MUBABATISIBWA

15. Ni myatsi yahi yo yendikakirya Abanya Korinto eribatisibwa?

¹⁵ Abandu b’omo Korinto ya kera, ibanzire kutsibu ebindu by’ekinya-mubiri kandi ibawite emighendere eyituwene. Abandu banene ab’eyo ibakakola emyatsi eyitetsemesaya oMungu. Ikyanganakala oko mundu oyo ikere omo muyi oyo eritsuka erikolera Yehova. Aliwe omukwenda Paulo abere abihika omo muyi oyo n’eritsuka eritula engulu mbuya oko Kristo, “Abanya Korinto bangyi abowa engulu mbuya mubikirirya n’eribatisibwa.” (Emib. 18:7-11) Neryo Omukama Yesu Kristo mwahulukira Paulo omo nzoli n’erimubwira ati: “Omo muyi ono niwitemo bandu bangyi.” Neryo Paulo mwalola embere eritulira omo muyi oyo. Mwakola atya omo mwaka mughuma n’enusu.

16. Ekyawatikaya Abanya Korinto balebe erikinda eby’endibakakirya eribatisibwa niki? (2 Abanya Korinto 10:4, 5)

¹⁶ Ekyawatikaya Abanya Korinto eribatisibwa niki? (Soma 2 Abanya Korinto 10:4, 5.) Ekinywa ky’oMungu n’ekirimu kiwe ekiwite akaghala kanene mubyawatikyabo erikola esyombinduka nene-nene omo ngebe syabo. (Ebr. 4:12) Abanya Korinto abaligha engulu mbuya ya Kristo mubatoka erilekana n’emibere mibi eyabya iyabirihanda emirihi omw’ibo ng’obutamiri, obwibi, n’abalume erighotsera n’abandi balume n’abakali erighotsera n’abandi bakali.—1 Kor. 6:9-11.b

17. Omwatsi w’Abanya Korinto amakwighisyaki?

¹⁷ Nomo Abanya Korinto balebe babya batolere erikola esyombinduka nene, mubatalengekania bati kikendibakalako kutsibu eribya Bakristo. Mubayikasa kutsibu eringira omo nzira ngengenge eyikakolaya oko ngebe ya kera na kera. (Mat. 7:13, 14) Naghu hane myatsi kutse omubere ogho utolere erilekana nagho utoke eribatisibwa? Isiwalwika n’ahake! Ubye ukasaba Yehova y’ekirimu kiwe kikuwatikaye erikinda engumbu y’erikola ekibi.

18. Eky’erileberyako kya Monika kyamakuwatikya kiti?

¹⁸ Monika, owe Jorjia mwayikasa erileka eribya akabugha tabu-tabu, erileka eribya akakwama eby’eriyitsemesyamo ebituwene atoke eritolera eribatisibwa. Akabugha ati: “Embere sy’eribatisibwa, erisaba Yehova irikaniwatikaya eribana akaghala ak’erikola esyombinduka. Yehova abya asi ngoko nanzire erikola ebyuwene, inyakaniwatikaya n’erinisondola.” Monika mwabatisibwa n’emyaka 16. Naghu, hane omubere kutse emibere eyo utolere erilekana nayo utoke erikolera Yehova yo ndeke? Ulole embere erisaba Yehova y’akaghala ak’eribinduka. Yehova akatuha ekirimu kiwe kibuyirire butsira buhemu.—Yoh. 3:34.

OBWIKIRIRYA BWAGHU BWANGANAHUMYA EBITWA

19. Ekyangakuwatikya erikinda ebikakiryo ebiri ng’ebitwa niki? (Ulebaye n’epitsa.)

¹⁹ Wikiriraye kundu ngoko Yehova akwanzire kandi anzire iwingira omo kihanda kiwe, nomo hane emyatsi mingyi omo ngebe yaghu eyangaleka ikyabya nga kyamakala okw’iwe eribatisibwa. Akakania n’abigha biwe balebe, Yesu mwabugha ati: “Mwamabya n’obwikirirya bungana n’akaghuma k’embuto y’eharadali, imukendibwira ekitwa eki muti, ‘Uhume hano, uye erya,’ nakyo ikikendihuma. Kandi isihendibya ekindu ekikendibalema.” (Mat. 17:20) Abowa ebinywa bya Yesu ebyo byabya naye oko myaka mike misa, neryo babya batolere erikulya obwikirirya byabo. Aliwe, Yesu mwabwirabo ati bamabibya n’obwikirirya obuwatire, Yehova inyakendiwatikyabo erihumya kutse erikinda ebikakiryo ebiri ng’ebitwa. Naghu Yehova akendikuwatikya erikola utya!

20. Eby’erileberyako by’Abakristo b’oko karne k’erimbere n’Abakristo ba munabwire ebyo twamabikaniako omo mwatsi ono byamakuwatikya biti?

²⁰ Wamalangira ihane emyatsi milebe eyangakukakirya eribatisibwa, wanguhe erilekana nayo. Eby’erileberyako eby’Abakristo b’oko karne k’erimbere n’Abakristo ba munabwire bikuwatikaye eribana akaghala n’erikukirania. Eby’erileberyako byabo bikuhe omuhwa n’erikukuna eriyiherera oko Yehova n’eribatisibwa. Eryo ry’eriyisogha eryuwene kulenga eriyisogha lyosi eryo wabirikola!