Esomo 7
Eriyithúnda hakuhi n’oMungu omo misabe
Erisaba butsira eryumbya ni ly’omughaso busanaki? (1)
Thutholere ithwasaba ndi, kandi thuthi? (2, 3)
Ni bindu bihi ebitholere erisabwa? (4)
Wangabya ukasaba oko ndambi yahi? (5, 6)
Kweneneko OMungu akanowa emisabe yosi kwehi? (7)
1. Emisabe n’ikania n’oMungu n’obuyikehyo. Litholere iwabya ukasaba oMungu butsira eryumbya. Neryo ukayowa hakuhi naye ng’omunwani waghu kundu. Kwenene Yehova ni mukulu kutsibu n’akandi ni w’obuthoki bosi, aliye akahulikirira emisabe yethu! Naghu ukanasaba oMungu y’ebiro byosi kwehi?—Esyonyimbo 65:2; 1 Abanya Tesalonike 5:17.
2. Emisabe ni kitswe ky’okwiramya lyethu. Busana n’ekyo, litholere ithwasaba oMungu iye musa, yo Yehova. Omughulu Yesu abya oko kihugho iniakasaba thatha wuwe y’ebiro byosi, butsira ghundi mundu. Litholere n’ethu ithwakola ngaye. (Matayo 4:10; 6:9) Ibbwa, litholere emisabe yethu yosi ithwalabirya y’omo lina lya Yesu. Ekyo kikakanganaya ko thusikirye ekithumbi kiwe n’akandi ko thw’ikirirye embanulo yiwe y’eriyiherera.—Yoane 14:6; 1 Yoane 2:1, 2.
3. Omughulu thukasaba, litholere ithwakanirya oMungu y’ebikalwa omo mithima yethu. Siritholere thukasaba ebyo thuhambire omo mithwe yethu kutse ebyo thukasoma omo kithabu ky’emisabe. (Matayo 6:7, 8) N’omo thwangabya ithwikere kutse ithwimene, ekiriho ly’erisaba n’erisikya, yangabya ndambi yahi, kutse mwanya wahi. OMungu akowa n’emisabe y’obukuthukuthu eyikalwa omo muthima. (1 Samweli 1:12, 13) Omughulu w’emisabe eyikulebirye iwuwene litholere iwayihengeka ahahunerere, oho uli iwuwene.—Marko 1:35.
4. Ni binduki ebyo wangasaba? Ebyosi ebilebirye obunwani bwaghu haghuma naye. (Abanya Filipi 4:6, 7) Omusabe w’ekyegerereryo akanganirye ko thwangasaba busana n’erina ly’oMungu n’erisonda liwe. Kandi thwanganasaba thuthi athuhe ebyo thuyitsutsire oko mubiri, athubughire amalolo wethu, kandi athuwathikaye thuhanganire erilengwako. (Matayo 6:9-13) Emisabe yethu siyitholere ikabya y’obuthimani. Litholere ithwasaba ebihambene n’erisonda ly’oMungu bisa.—1 Yoane 5:14.
5. Wanganasaba oko mughulu wosi ow’omuthima waghu amanza athi usime kutse upipe oMungu. (1 Emyatsi y’emigulu 29:10-13) Litholere iwasaba omughulu uli n’emihangyohangyo n’erikirirya lyaghu lyamabya omw’ilengwako. (Esyonyimbo 55:22; 120:1) Litholere erisaba embere sy’erirya. (Matayo 14:19) Yehova akathukokaya tumusabe “emighulu yosi.”—Abanya Efeso 6:18.
6. Isithwibirirawa ko litholere ithwasaba omughulu thwakolire erilolo linene. Oyo w’omughulu w’erisaba Yehova athukwire obulighe kandi athubughire. Thwamamubisulira amalolo wethu kandi thwamayitsinga kundu erithendisyasubiragho, oMungu “[a]kabuyira.”—Esyonyimbo 86:5; Emisyo 28:13.
7. Yehova akahulikirira emisabe y’abandu abathunganene basa. Wamasonda uthi emisabe yaghu yowike n’oMungu, litholere iwahirika kutsibu eriyithambya omw’ikwama ebihano biwe. (Emisyo 15:29; 28:9) Litholere iwabya n’eriyikehya omughulu ukasaba. (Luka 18:9-14) N’akandi, litholere ebyo ukakola ibyahambana n’ebyo ukasaba. Eryo, ukendikangania ko uli n’erikirirya n’akandi ukasaba wabilengekania. Neryo aho, Yehova iniakendikusubirya oko misabe yaghu.—Abaebrania 11:6.