Wangaseghera hakuhi n’oMungu uti?

1. Yehova akanahulikirira obuli musabe?

Mungu anzire abandu bosi ibaseghera hakuhi naye omo musabe. (Esyonyimbo 65:2) Aliwe sibughambu akahulikirira kutse erisubirya oko misabe yosi. Ng’emisabe ey’omulume oyukanubaya omukali wiwe, oMungu syalihulikirira yo. (1 Petero 3:7) N’omughulu Abaisraeli mubataleka erikola amalolo, oMungu mwaghana erihulikirira emisabe yabo. Kwesi, oMungu eribugha ati tubye tukamusaba ni tusikya. Nomobine bitya, omundu oyuwabirihalya kutsibu amayisubako, oMungu akahulikirira emisabe yiwe.​—Usome Isaya 1:15; 55:7.

Lebaya evideo OMungu akanahulikirira emisabe yosi?

2. Twangasaba tuti?

Omundu oyukasaba akabya iniakaramaya. Busana n’ekyo, litolere itwasaba Omuhangiki wetu, Yehova musa. (Matayo 4:10; 6:9) Kandi, kundi mutwabutwa omwilolo, litolere itwasaba erilabira omo lina lya Yesu kusangwa mwahola busana n’amalolo wetu. (Yohana 14:6) Yehova syalianza tukasubirira omo misabe eyotwabirihamba omo mutwe kutse eyihandikirwe. Anzire itwasaba ebikalwa omo mutima wetu.​—Usome Matayo 6:7; Abanya Filipi 4:6, 7.

N’omo twangasaba kikutu-kutu, Omuhangiki wetu akatowa. (1 Samweli 1:12, 13) Anzire itwamusaba oko buli katambi: tukabuka, tukagotsera, tukasonda erirya n’omo mughulu tukaghalawa.​—Usome Esyonyimbo 55:22; Matayo 15:36.

3. Busanaki Abakristo bakahindana haghuma?

Eribya mwira w’oMungu si kyolo kusangwa twikere omo bandu abatikirirye kandi abakasekeraya endaghane y’oMungu eyerileta obuholo oko kihugho. (2 Timoteo 3:1, 4; 2 Petero 3:3, 13) Busana n’ekyo, litolere itwabya haghuma n’abalikyetu abakatuhimba.​—Usome Abaebrania 10:24, 25.

Eribya haghuma n’abandu abanzire oMungu kikatuwatikaya eriseghera hakuhi naye. Emihindano y’Abimiri ba Yehova yikatuha akanya k’erihimbwa n’abandi.​—Usome Abanya Roma 1:11, 12.

4. Wangaseghera hakuhi n’oMungu uti?

Wangaseghera hakuhi na Yehova omwilengekania kutsibu oko myatsi eyo uk’igha omo Biblia. Lengekanaya oko ebyo ahangika, amahano wiwe, n’esyondaghane siwe. Erisaba n’erilengekania kutsivu bikaleka itwatsemera olwanzo n’amenge w’oMungu.​—Usome Yosua 1:8; Esyonyimbo 1:1-3.

Ekyanga kuwatikya eriseghera hakuhi n’oMungu ly’erimwikirirya n’eriyiketera iye. Aliwe erikirirya liri ng’ekindu ekyerilisibwa. Litolere iwabeghera erilisya erikirirya lyaghu omwibuka obuli katambi esyonzumwa esikaleka iwabya n’erikirirya ng’eryo.​—Usome Matayo 4:4; Abaebrania 11:1, 6.

5. Twangabana ndundi yahi twamaseghera hakuhi n’oMungu?

Yehova atsomene kutsibu abandu abamwanzire. Akabateghaya oko kyosi-kyosi ekyangatsandya erikirirya lyabo n’eriyiketera lyabo eryeribana engebe y’erikota. (Esyonyimbo 91:1, 2, 7-10) Akatukunga oko mibere eyangatuhira omo nabi n’erileka itwabula etseme. Yehova akatukangiriraya enzira mbuya ey’erikwama.​—Usome Esyonyimbo 73:27, 28; Yakobo 4:4, 8.