Enzira ey’eriramya Omungu eyuwene

1. Oyo wangatubwira enzira y’eriramya oMungu eyuwene nindi?

EBISOMO bingyi bikabugha biti bikakangiriraya ekwenene y’oko Mungu. Aliwe ekyo sikyangatokekana, busana ebisomo biri na makangirirya awasighene oko mwatsi w’eriminya oMungu nga nindi kandi nga twangamuramya tuti. Twangaminya tuti enzira y’eriramya oMungu eyuwene? Yehova iye musa yowangatubwira nga twangamuramya tuti.

2. Wangaminya enzira y’eriramya oMungu eyuwene yo wuti?

² Yehova abirituha eBiblia ituwatikaye erigha enzira y’ekwenene y’erimuramya. Neryo w’ighe eBiblia, Yehova naye akendikuwatikya eribana endundi y’omo makangirirya wiwe busana akwanzire kutsibu.​—Isaya 48:17.

3. OMungu anzire ati itwakolaki?

³ Abandu bangyi bakabugha bati oMungu akaligha ebisomo byosi, aliwe Yesu mwatatukangirirya atya. Mwabugha ati: “Si y’omundu oyukanyahula ati, Mukama, Mukama, yowasy’ingira omo bwami bw’elubula; nikwa yo n’oyukakola erisonda lya Tata waghe.” Neryo tutolere eriminya erisonda ly’oMungu nga ni ryahi kandi itwakolalyo. Oyo ni mwatsi alitohire kundi Yesu mwabugha ati abatehulikirira oMungu balingene n’abakakola ebitatolere, ‘abakola-nabi.’​—Matayo 7:21-23.

4. Yesu mwabugha atiki oko mwatsi w’erikola erisonda ly’oMungu?

⁴ Yesu mw’abugha ati tulebaye ndeke omughulu tukasondaya erikola erisonda ly’oMungu, kusangwa si mwatsi molomolo. Mwabugha ati: “Mwingire omo lukyo luke; kusangwa olukyo ni lunene, n’enzira ni nene-nene eyikalolaya okw’ihera, kandi ni bangyi abak’ingira omo lukyo olo; nikwa olukyo ni luke, n’enzira ni nge eyikakolaya oko ngebe, n’abandu ni bake abakabanayo.” (Matayo 7:13, 14) Enzira eyihatatene, kutse enzira y’eriramya oMungu eyuwene, yikakolaya oko ngebe y’erikota. Enzira nene, kutse enzira y’eriramya oMungu ey’amabehi, ikahikaya oko luholo. Aliwe Yehova syanzire ati omundu n’omughuma ahole. Akaha obuli mundu y’akanya k’erigha erimuminya.​—2 Petero 3:9.

ENZIRA EY’ERIRAMYA OMUNGU EYUWENE

5. Wangaminya wuti abakaramaya oMungu y’omo nzira eyuwene?

⁵ Yesu mwatubwira ngoko twangaminya abakaramaya oMungu y’omo nzira eyuwene; ati itwayiteghererya amakangirirya wabo n’ebyo bakakola. Mwabugha ati: “Mwasyaminyererabo busana n’emibiri yabo.” Kandi ati: “Omuti mubuya akahetaya ebighúma ebyuwene.” (Matayo 7:16, 17) Ekyo si bughambu abakaramaya oMungu y’omo nzira y’ekwenene bahikahikene. Aliwe abaghombe b’oMungu bakayikasa obuli kiro erikola ebyuwene. Tulebaye ebikawatikaya eriminya abakaramaya oMungu y’omo nzira eyuwene.

6, 7. Busana naki eriramya ly’ekwenene lihulikirirene n’eBiblia? Ekyerileberyako kya Yesu kikatukangirirayaki?

⁶ Eriramya lyetu litolere iryasondolibwa n’eBiblia. EBiblia yikabugha yiti: “Amasako wosi asondolibawa n’ekirimu [ky’oMungu]. Kandi ali n’endundi busana n’erikangirirya omwatsi w’ekwenene kandi busana n’eritukunga erihaba, kandi busana n’erihabula, n’erikangirirya abandu erikwama ekitunganene. Neryo omundu w’[oMungu] ahikane, n’eritokesibwa erikola obuli mubiri uwene.” (2 Timoteo 3:16, 17) Omukwenda Paulo mwahandikira Abakristo ati: “Omughulu twabaletera ekinywa ky’[oMungu], momutowakyo n’eriangirirakyo ng’ekinywa ky’abandu, nikwa ngoko kiri kwenene, ekinywa ky’[oMungu].” (1 Abanya Tesalonika 2:13) Eriramya ly’ekwenene lihulikirene n’eKinywa ky’oMungu, eBiblia. Siririlua omo malengekania kutse emitsye y’abandu.

⁷ Ebyosi ebyo Yesu abya akakangirirya abilusaya omo Kinywa ky’oMungu. (Soma Yoane 17:17.) Ngendo nyingyi inyakabugha ebihandikire omo Masako. (Matayo 4:4, 7, 10) Abaghombe b’oMungu ab’ekwenene bakakwama ekyerileberyako kya Yesu kandi bakalusaya ebyosi ebyo bakakangiriraya by’omo Biblia.

8. Yesu mwatukangiriryaki oko mwatsi w’eriramya Yehova?

⁸ Tutolere itwaramya Yehova musa. Esyonyimbo 83:18, NWT sikabugha siti: ‘Iwe ukahulawa mo [Yehova], n’iwe musa oyuli Endata Kutsibu oko kihugho kyosi.’ Yesu aby’asondire abandu ibaminya oMungu w’ekwenene nga nindi, kandi mwakangirirya abandu b’erina ly’oMungu. (Soma Abaebrania 2:12.) Yesu mwabugha ati: ‘Ni [Yehova Mungu] waghu yo utolere iwaramya, kandi n’iye musa yo utolere erikolera.’ (Matayo 4:10, NWT) Kikaleka, itwe baghombe b’oMungu, itwakwama eky’erileberyako kya Yesu. Tukaramaya Yehova musa, tukamwahula omo rina liwe, n’erikangirirya abandi b’erina ly’oMungu n’eby’akasyatukolera.

9, 10. Tukakanganaya tuti olwanzo oghundi oko ghundi?

⁹ Tutolere itwakangania abandu b’olwanzo lw’ekwenene. Yesu mwakangirirya abigha biwe ati litolere ibanzana. (Soma Yoane 13:35.) Olwanzo olo silulitsomana ngatwalua hayi, emibere eyotwakulira mo, kutse nga tuwite bindu bingyi kutse nga tuli nzama. Olwanzo olo litolere ilwatuhira omo bughuma n’abaghala betu n’abali betu. (Abanya Kolosai 3:14) Kyokikaleka itutaya oko malwa n’er’ita abandu. EBiblia yikabugha yiti: ‘Omw’eki abana b’[oMungu] n’abana ba Sitani baminyikere. Oyutekola ebitunganene, kutse omundu oyutanzire mulikyabo, abo si bana b’[oMungu].’ Kandi yiti: “Twanzane, si tubye nga Kaina, oyowabya w’omubi oyo, neryo mwita mulumuna wiwe.”​—1 Yoane 3:10-12; 4:20, 21.

¹⁰ Tukakolesaya endambi, akaghala, n’ebyo tuwiteko eriwatikania n’erihirana m’omutima. (Abaebrania 10:24, 25) Tukakola “ebibuya oko bandu abosi.”​—Abanya Galatia 6:10.

11. Busana naki tuk’ikiriraya Yesu ngoko iye yo nzira eyikakolaya oko Mungu?

¹¹ Tutolere itwahulikirira Yesu kundi iye yo nzira eyikakolaya oko Mungu. EBiblia yikabugha yiti: “Erilama siriri omo wundi mundu, kusangwa [oMungu] syalitahula erindi rina omo kihugho kyosi omo kati-kati k’abandu, eryangatulamya.” (Emibiri 4:12) Omo Sura 5 ey’ekitabu kino, mutw’igha ngoko Yehova mwatuma Yesu erisyaha engebe yiwe mw’endihi eyikabohola busana n’abandu abakowa. (Matayo 20:28) Yehova abirisombola Yesu ati atabale m’oMwami oko kihugho kyosi. Ky’ekikaleka eBiblia iyatubwira yiti tutolere itwahulikirira Yesu twamanza erisyabyaho kera na kera.​—Soma Yoane 3:36.

12. Busana naki situliyingiraya omo myatsi y’ekipolitike?

¹² Situtolere eriyingirya omo myatsi y’ekipolitike. Yesu mwatayingirya omo myatsi y’ekipolitike. Omughulu babya ibanemumwaghalya, mwabwira omutabali we Roma yo Pilato ati: “Obwami bwage si bw’ekihugo kino.” (Soma Yoane 18:36.) Nga Yesu, tuli abateleghula oko Bwami bw’oMungu obw’elubula, neryo busana n’ekyo, nomo twangabya omo kihugho kyahi, situliyingiraya omo myatsi y’ekipolitike. Aliwe, eBiblia yikatubwira yiti tusikaye “abatabali b’ekihugo,” ni bughambu Eleta. (Abanya Roma 13:1) Tukasikaya ebilayiro by’ekihugho ekyo twikeremo. Aliwe, ekilayiro ky’Eleta kyamaghana erihulikirirana n’ekilayiro ky’oMungu, tukakwama eky’erileberyako ky’abakwenda, ababugha bati: “Litolere itwakenga [oMungu] kwilaba abandu.”​—Emibiri 5:29; Mariko 12:17.

13. Tukatulughanaya engulu yahi eyilebirye oBwami b’oMungu?

¹³ Twikirirye ngoko Obwami bw’oMungu busa bo bukasyalusyaho ebikatwaghalaya. Yesu mwabugha ati “engulu yowene y’Obwami” yasyatulaghanibwa omo kihugho kyosi. (Soma Matayo 24:14.) Sihali obutabali bw’abandu obwangakola ekyo oBwami bw’oMungu bukasyatukolera. (Esyonyimbo 146:3) Yesu mwatukangirirya erisaba oBwami bw’oMungu omughulu abugha ati: “Obwami bwawu bwase. Erisonda lyawu liyirawe, omo lubula na kutya omo kihugho.” (Matayo 6:10) EBiblia yikatubwira yiti oBwami bw’oMungu bukasyatoghotaya amatabali wosi w’abandu kandi yiti “nabo bwasyahangana kera na kera.”​—Danieli 2:44.

14. W’ikirirye uti ni bahi bo bakaramaya oMungu y’omo nzira eyuwene?

¹⁴ Enyuma sy’erigha esyonzumwa esi, uyibulaye: ‘Ni bahi abo amakangirirya wabo wosi alwire omo Biblia? Ni bahi abakabwira abandi b’erina ly’oMungu? Ni bahi abali n’olwanzo oghundi oko ghundi kandi abakaligha ngoko oMungu mwatuma Yesu eritulamya? Ni bahi abateyingiraya omo myatsi y’ekipolitike? Ni bahi abakakangiriraya bati oBwami bw’oMungu busa bo bukasyalusaya h’ebikatwaghalaya? B’Abimiri ba Yehova basa.​—Isaya 43:10-12.

UKENDIKOLAKI?

15. Tutolere itwakolaki twamasonda tuti oMungu alighe eriramya lyetu?

¹⁵ Isitwimanira okwibugha tuti oMungu aneho lisa. Esyombinga nasyo sin’ikirirye siti oMungu aneho, aliwe sisirimw’owa. (Yakobo 2:19) Twamasonda tuti oMungu alighe eriramya lyetu, situtolere erikirirya tuti aneho lisa, aliwe tutolere itwakola eby’akabugha.

16. Busana naki tutolere itwaghana ebisomo by’amabehi?

¹⁶ Twamasonda tuti oMungu alighe eriramya lyetu, tutolere itwaghana ebisomo by’amabehi. Omuminyereri Isaya mwahandika ati: ‘Mulue omo kati-kati kabyo, muyeraye.’ (Isaya 52:11; 2 Abanya Korinto 6:17) Busana n’ekyo litolere itwaghana ekindu kyosi-kyosi ekihulikirirene n’eriramya ly’amabehi.

17, 18. “EBabeli Mukulu” niki, kandi busana naki litolere erilwa muyo mo luba?

¹⁷ Ekisomo ky’amabehi niki? Ky’ekisomo kyosi-kyosi ekikatukangiriraya eriramya oMungu omo nzira eyitahulikirirene n’eKinywa kiwe. EBiblia yikahula ebisomo by’amabehi byosi mo “Babeli Mukulu.” (Eribisulirwa 17:5) Busana naki? Enyuma sy’Erighunga ly’Amaghetse omo biro bya Noa, amakangirirya mangyi w’amabehi mwatsuka omo muyi w’eBabeli. Amakangirirya ayo mwatsatsangana omo kihugho kyosi. Eky’erileberyako, abandu ababya bikere eBabeli ibakaramaya esy’omungu sy’obusatu. Na lino, ebisomo bingyi bikakangiriraya biti oMungu ni Busatu, aliwe eBiblia yikakangiriraya ndeke-ndeke yiti hali oMungu mughuma musa w’ekwenene, Yehova, kandi ngoko Yesu ni Mughala wiwe. (Yoane 17:3) Kandi Abanya Babeli ibikirirye bati omundu ali mw’akandu akatehola, akakabya ikaneho omubîri abihola kandi bati kanganayaghalwa omo muliro wa kera na kera. Ayo ni mabehi.​—Lebaya Endomeko 14, 17 na 18.

¹⁸ OMungu abiribugha embere ati hakisiya hake iniatoghotya ebisomo by’amabehi byosi. (Eribisulirwa 18:8) Wanamowa busana naki litolere erilwa omo bisomo by’amabehi mo luba? Yehova asondire ati ukole utya endambi yikineho.​—Eribisulirwa 18:4.

19. Wamayisogha erikolera Yehova, akendikuwatikya ati?

¹⁹ Omughulu ukayisogha erilwa omo kisomo ky’amabehi n’erikolera Yehova, abandi bira baghu kutse ab’okw’iwe banganaghana eriowa ekyo ukakola kandi banganakwaghalya. Aliwe Yehova syangakulekerania. Ukendingira omo kihanda ekiri mw’esyomiliyoni sy’abandu abali n’olwanzo oghundi oko ghundi, kandi ukandibya n’eriyiketera erisyabyaho kera na kera omo kihugho kihya. (Mariko 10:28-30) Abaghuma b’oko bira baghu n’abokwiwe abatetsema ukakolera Yehova, banganasyaligha erigha eBiblia omo biro b’ikasa.

20. Busana naki litolere eriramya oMungu y’omo nzira eyuwene?

²⁰ Hakisiya hake oMungu inialusyaho obubi bosi, n’oBwami bwiwe ibwatabala ekihugho. (2 Petero 3:9, 13) Oyo akasyabya mughulu w’obutseme! Obuli mundu akasyaramaya Yehova ngoko Yehova akasonda. Busana n’ekyo, ni ky’omughaso munene okw’iwe eritsuka lino eriramya oMungu y’omo nzira eyuwene.