Wangaminya uti edini y’ekwenene?

1. Hali edini nguma nyisa y’ekwenene?

Yesu mwakangirirya abigha biwe b’edini nguma nyisa, ey’ekwenene. Yiri ng’enzira eyikakolaya oko ngebe y’erikota. Yesu mwabugha ati: “Abandu ni bake abakabanayo.” (Matayo 7:14) Eriramya ery’oMungu akaligha ly’erihambene n’eKinywa kiwe eBiblia. Abaramya abosi ab’ekwenene bawite erikirirya lighuma.​—Usome Yoane 4:23, 24; 14:6; Abanya Efeso 4:4, 5.

Lebaya evideo OMungu analighire ebisomo byosi?

2. Yesu mwabugha atiki oko Bakristo b’amabehi?

Yesu mwabugha ati abaminyereri b’amabehi bakendisyatsandya Obukristo. Omwitabasamalira, bakabya nga ni baramya b’ekwenene. Omo bisomo byabo ukabana ibabiriyahula mo Bakristo. Aliwe wangaminyabo oko mikolere yabo. Wuti? Edini y’ekwenene nyisa y’eyikabya mo Abakristo b’ekwenene abawite mibere mibuya.​—Usome Matayo 7:13-23.

3. Wangaminya uti edini y’ekwenene?

Tulebaye ebindu bitano ebikaminyikalayayo:

• Abaramya b’ekwenene basikirye eBiblia ng’eKinywa ky’OMungu. Bakayikasa baghendere oko biri muyo. Busana n’ekyo, edini y’ekwenene siyiri ng’esyodini esikakangiriraya amalengekenia w’abandu. (Matayo 15:7-9) Abaramya b’ekwenene sibalikangiriraya kino kandi ibakola kirya.​—Usome Yoane 17:17; 2 Timoteo 3:16, 17.

• 

  Abigha ba Yesu b’ekwenene bakasikaya erina ly’oMungu, Yehova. Yesu mwasikya erina ly’oMungu omw’iriminyisya. Mwawatikya abandu eriminya oMungu n’eribakangirirya basabe bati erina ly’oMungu libye libuyirire. (Matayo 6:9) Eyowikere, edini yahi y’eyikaminyisaya erina ly’oMungu?​—Usome Yoane 17:26; Abanya Roma 10:13, 14.

• Abakristo b’ekwenene bakahubiraya Obwami b’oMungu. OMungu mwatuma Yesu ahubiraye engulu mbuya y’Obwami. Obwami b’oMungu busa bo bandu batolere eriyiketera. Yesu abya inianemutula engulu y’Obwami erihika oko luholo lwiwe. (Luka 4:43; 8:1; 23:42, 43) Mwabugha ati n’abakamukwama nabo litolere ibatula engulu y’Obwami obu. Omundu amakuhikira, neryo iniakukanirya oko Bwami b’oMungu, iwukendilengekania uti ali omo dini yahi?​—Usome Matayo 24:14.

• Wanganabaminyerera kundi sibaliyingiraya omo myatsi ye politike kutse amalwa w’ebihanda. (Yoane 17:16; 18:36) Kandi, sibalikwama emibere mibi n’amalengekania mabi w’ekihugho.​—Usome Yakobo 4:4.

• EKinywa ky’oMungu kikabakangiriraya erisikya abandu b’ebihanda byosi. Esyodini sy’amabehi sikayingiraya kutsibu omo malwa w’ebihanda, aliwe abali omo dini y’ekwenene sibalikola ekyo. (Mika 4:1-3) Abakristo b’ekwenene bakakolesaya endambi yabo n’ebyobawiteko eriwatikya n’erisubya abandi bo mutima omonda.​—Usome Yoane 13:34, 35; 1 Yoane 4:20.

4. Wanganaminyerera edini y’ekwenene?

Ni dini yahi eyikaseghemeraya amakangirirya wayo wosi oko Kyinywa ky’oMungu, eyikasikaya erina ly’oMungu, n’erihubiria Obwami b’oMungu ibo busa obo bandu batolere eriyiketera? Ni dini yahi eyiri m’olwanzo kandi eyiteyingiraya omo malwa? Ukalengekanaya uti yo yahi?​—Usome 1 Yoane 3:10-12.