Unawite obwikirirya?

Litolere itwabya n’obwikirirya tutoke eritsemesya Yehova. Aliwe, eBiblia yikabugha yiti “si b’abandu bosi bo bali n’obwikirirya.” (2 Tes. 3:2) Omughulu omukwenda Paulo abugha ebyo, abya akakania oko “batsibu n’ababi” ababya bakamwendererya. Aliwe ebyo abugha oko bwikirirya bikatula n’oko bandi bandu. Abandu balebe sibanzire erikirirya ngoko hane oMungu oywahangyika ebindu byosi. (Rom. 1:20) N’abandi banganabugha bati bawite obwikirirya omo kindu kilebe kutse oko mundu mulebe oyuwite akaghala kanene. Aliwe, obo si b’obwikirirya bw’ekwenene.

Litolere itwikirirya ngoko Yehova aneho kandi ngoko “akahemba” abawite obwikirirya obuwatire. (Ebr. 11:6) Neryo tulaghire oko kirimu ky’oMungu kibuyirire tutoke erikulya obwikirirya obuli ng’obo. Twamanza eribana ekirimu kibuyirire litolere itwasaba Yehova atuhekyo. (Luka 11:9, 10, 13) Ekindi ky’omughaso eky’erikola tutoke eribana ekirimu kibuyirire ry’eribya tukasoma Ekinywa ky’oMungu ekyasondolawa n’ekirimu ekyo. Kandi litolere itwalengekania oko ebyo twamabisoma n’eriyikasa erikolesya ebyo twamabigha. Omw’ikola ebyo, tukabya itwamalighira ekirimu kya Yehova kituwatikaye eribya n’engebe eyikakanganaya ngoko tuwite obwikirirya obo Yehova anganatsemera.