Uyire Yehova mo Lubwe lwaghu

1. Ngoko kiri omo Esyonyimbo 18:46, Daudi akasosekanaya Yehova naki?

TWANGANAHIKIRWA kitsumbukirania n’emyatsi eyangaleka engebe yetu iyakala kutse iyabinduka olosi. Tukasima kundi twanganayiketera obuwatikya bwa Yehova Mungu! Omo mwatsi owalaba, mutwigha ngoko Yehova ni Mungu oyuliho kandi ngoko ane tayari erituwatikya obuli ndambi. Omughulu akatuwatikaya, ekyo kikaleka itwayiketera ngoko “[Yehova] aneho!” (Soma Esyonyimbo 18:46.) Aliwe, abere abibugha ebinywa ebyo, Daudi mwahula oMungu mo “eribwe ryage;” NTN62. Busanaki Daudi akasosekanaya Yehova, oMungu oyuliho, n’olubwe, ekindu ekitehumula?

2. Daudi eribugha ati Yehova ni Lubwe lwiwe, kyamatwighisyaki?

² Omo mwatsi ono, tukendilangira busanaki Yehova akahulawamo olubwe kandi ekyo nga kikatwighisayaki okw’iye. Kandi tukendilangira ngoko twanganayiketera iye n’erimuyiramo lubwe lwetu. N’oko nduli, tukendilangira ngoko twangigha emibere yiwe.

BUSANAKI YEHOVA AKASOSEKANIBAWA N’OLUBWE?

3. Kangyi kangyi eBiblia yikakolesaya yiti ekinywa “lubwe”? (Ulebaye y’oko kijalada.)

³ EBiblia yikasosekanaya Yehova “n’olubwe” erituwatikya eriminya emibere yiwe milebe. Kangyi-kangyi omo Biblia, omughulu abaghombe ba Yehova bakamupipa busana n’emibere yiwe eyikaswekaya, bakamusosekanaya n’Olubwe. Omo risako ry’ Eryibuka Ebihano 32:4 mo tukasunga engendo y’erimbere Yehova akasosekanibwa n’Olubwe. Omo musabe wiwe, Hana mwabugha ati sihali olubwe ng’oMungu wetu. (1 Sam. 2:2) Habakuki mwahula Yehova mo Lubwe lwaghe. (Hab. 1:12) Omuhandiki w’ Esyonyimbo 73 mwabugha ati oMungu ni Lubwe l’omutima wiwe. (Esy. 73:26) Nibya Yehova iyuwenewene akayisosekanaya n’olubwe. (Isa. 44:8) Tukanaye oko mibere isatu eyikaleka Yehova inyasosekanibwa n’olubwe kandi tulangire ngoko twangamuyiramo Olubwe lwetu.​—Ebih. 32:31.

4. Yehova ni busayiro ati? (Esyonyimbo 94:22)

⁴ Yehova ni busayiro bwetu. Ngoko omundu anganatibitira omo ribwe rinene akayibisa oko kihunga kinene, Yehova naye akatuteghaya omo mighulu eyikalire omo ngebe yetu. (Soma Esyonyimbo 94:22.) Akatuwatikaya eriteya obwira bwetu haghuma naye n’erituteya oko mwatsi wosi-wosi owangatuhutalia kera na kera. Kandi akalagha ngoko, omo biro ebikasa akendisyabughaho ebyosi ebikaleka itwahangya-hangya n’eryaghalwa.—Ezek. 34:25, 26.

5. Yehova angabya busayiro bwetu ati ng’olubwe?

⁵ Enzira nguma eyo twangatibitiramo eyiri Yehova omughulu tuli omo maligho w’omusabe. Omughulu tukasaba, Yehova akatuha “obuholo bw’oMungu” obukateghaya emitima yetu n’obwenge bwetu. (Filip. 4:6, 7) Tukanaye oko mwatsi wa mughala wetu Artem, oyo wabohawa busana n’obwikirirya bwiwe. Omughulu abya omo katwiko, omukulu mwamutondesya kangyi-kangyi, mwamukola nabi n’erisonda erimubahisya. Artem akabugha ati: “Obuli mughulu omukulu oyo abya akasyanitondesya, ingahanga-hangaya kutsibu. . . . Ingasaba Yehova. Ingamusaba aniwatikaye eritulera n’eribya n’amenge. Omukulu oyo mwataluka eriniubahisya. . . . Omo buwatikya bwa Yehova, munabya ng’omundu oyubisamire enyuma w’oluhimbo lw’amabwe.”

6. Busanaki twanganayiketera Yehova mughulu wosi? (Isaya 26:3, 4)

⁶ Yehova ni w’eriyiketerwa. Ngoko olubwe silwangasegha-seghana, mughulu wosi Yehova ane aho busana netu. Twanganayiketera iye kundi iye ni ‘ribwe rya kera na kera.’ (Soma Isaya 26:3, 4.) Akendisyabyaho kera na kera atoke eriberererya emilaghe yiwe, erisubirya oko misabe yetu, n’erituha obuwatikya obo tulaghireko. Kandi twanganayiketera Yehova kundi ni mutaleghula oko bandu abakamukolera. (2 Sam. 22:26) Syendisyabirirwa n’ahake ebyo tukamukolera kandi syendisyabula erituhemba.​—Ebr. 6:10; 11:6.

7. Twamabiyiketera Yehova itukendiyilangiriraki? (Ulebaye n’epitsa.)

⁷ Tukayira Yehova m’Olubwe lwetu omughulu tukayiketer’iye omo byosi. Twikirirye ngoko twamabimowa, nibya n’omo mighulu eyikalire, kikatughasira. (Isa. 48:17, 18) Mughulu wosi tukabya twabilangira obuwatikya bwa Yehova, eriyiketera lyetu okw’iye likatasyakula kutsibu. Tukikiriraya kundu ngoko Yehova yo wangatoka erituwatikya erikinda amaligho wosi-wosi n’omo angalitoha ati. Kangyi-kangyi, omughulu tuli omo mibere eyikalire, isituwite n’oyuwangatuwatikya, tukayilangirira ngoko twanganayiketera Yehova ebiro byosi. Mughala wetu Vladimir mwabugha ati, “omughulu nabya omo ngomo, wo mughulu ogho obwira bwaghe n’oMungu bwawata kutsibu, munigha eritasyayiketera Yehova yo kutsibu kundi nabya ingyuwene kandi sinabya n’eky’erikola eribindula emibere eyo nabyamo.”

8. (a) Busanaki twanganabugha tuti Yehova syalibinduka? (b) Tukabana endundi yahi omwiyira oMungu mo Muhanganiri wetu (Lubwe lwetu)? (Esyonyimbo 62:6, 7)

⁸ Yehova syalibinduka. Ng’olubwe lunene, Yehova asikire kandi syalibinduka. Emibere yiwe n’erisonda riwe sibibinduka. (Mal. 3:6) Omughulu Adamu na Eva bayisamambula okw’iye, mwatabindula erisonda liwe oko bandu. Ngoko omukwenda Paulo ahandika, Yehova “syangayighana.” (2 Tim. 2:13) Ekyo kikakanganaya ngoko, n’omo hangabyaki kutse n’omo abandu bangakola bihi, Yehova iye syangabindula emibere yiwe, erisonda liwe kutse ebighenderwako biwe. Kundi Yehova syalibinduka, tuyiketere ngoko akendisyatuwatikya omo maligho n’akandi akendisyaberererya emilaghe yiwe y’omo biro ebikasa.​—Soma Esyonyimbo 62:6, 7.

9. Eky’erileberyako kya Tatyana kyamakwighisyaki?

⁹ Twamabilengekania oko mibere ya Yehova n’okw’isonda liwe oko kihugho n’oko bandu, ekyo kyanganatuwatikya eriyiketera iye n’erimuyiramo Lubwe lwetu. Twamabikola tutya, itukendisighala itunatulere omughulu tuli omo maligho. (Esy. 16:8) Mwali wetu oyukahulawamo Tatyana mwayilangirira ekyo omughulu abohawa busana n’obwikirirya bwiwe. Akabugha ati, “munayowa omo mbwera. Ekyo mukyanikalako kutsibu oko nzuko. Kangyi-kangyi iningabya omundu w’obulighe.” Aliwe, abere abitsuka erilengekania kutsibu oko Yehova n’erisonda liwe oko bandu, mwalangira ngoko ni ky’omughaso munene okw’iye eriyiyinia. Ekyo mukyamuwatikya erisighala inyanatulere kandi mwabana akaghala ak’erisighala mutaleghula. Mwabugha ati: “Eriminya ekikaleka ebyosi ebyo ibyabya mulyaniwatikya eryibuka ngoko ninemulaba omo maligho wosi ayo busana n’erikolera Yehova. Ekyo mukyaniwatikya erileka eriyilengekaniako.”

10. Twangakolaki lino tutoke eriyira Yehova mo Lubwe lwetu?

¹⁰ Omo biro ebikasa, tukendilola oko myatsi eyikalire eyikenditusaba eriyiketera Yehova yo kutsibu kulenga kera. Eno y’endambi y’eriwatya obwikirirya bwetu omo Yehova n’eriyiketera kundu ngoko akendisyatuwatikya erisighala bataleghula okw’iye n’omo hangabyaki. Twangakola ekyo kyo tuti? Tubye tukasoma emyatsi eyikabanika omo Biblia n’emyatsi eyikakanaya oko baghombe ba Yehova ba munabwire. Tubye tukalangira ngoko Yehova awatikaya abaghombe biwe. Tubye tukalengekania kutsibu oko myatsi eyo. Wamakola emyatsi eyo, iwanganatoka eriyira Yehova m’Olubwe lwaghu.

WIGHE EMIBERE YA YEHOVA

11. Busanaki ni ky’omughaso okw’itwe erigha emibere ya Yehova? (Ulebaye n’akasandaku “Ekyo abaghala betu balwana bangalandamirira.”)

¹¹ Twamabikania oko mibere ya Yehova eyikaleka inyahulwamo lubwe lwetu. Neryo tulebaye ngoko twangigha emibere yiwe. Twamabiyikasa erigha emibere ya Yehova, twanganasikya mutima abaghala n’abali betu. Ng’eky’erileberyako, Yesu mwaha Simoni erina rya Kefa (erikabindulawamo “Petro”), ni bugha ambu “ekihande ky’olubwe.” (Yoh. 1:42) Yesu mwasond’ibugha ati Petro akendisyasikya emitima y’abandi omo ndeko n’eriwatya obwikirirya bwabo. Abasyakulu b’esyondeko bakasosekanibawa “ngʼekyutsutsu kyʼeribwe rinene.” Ekyo ni bugha ambu bakateghaya abali omo ndeko. (Isa. 32:2) Aliwe itwe bosi omo ndeko twamabigha emibere ya Yehova itwanganasikania mitima.​—Efe. 5:1.

12. Twangawatikya abandi b’omo nzira syahi omo mighulu eyikalire?

¹² Ubye busayiro bw’abaghala n’abali benyu omo mughulu w’amaligho. Hanganabya endambi itwabya busayiro oko baghala n’abali betu hamabibya ebitsinduli kutse amalwa. Emyatsi y’omo “biro by’enduli” ikalola embere eritsanda, tukendisyabana ehyanya hingyi hy’eriwatikya abaghala n’abali betu. (2 Tim. 3:1) Kandi twanganakirania abaghala n’abali betu n’eribakangania olwanzo olo balaghireko. Enzira nguma ry’erikania nabo omughulu bamahika oko mihindano n’erikiraniabo. Twanzire endeko inyabya aho abandu bakabanira olwanzo n’ah’erikiranibwa. Munabwire, abandu bangyi bakakolera abandi bo muhanda. Ekyo kyanganaleka abaghala n’abali betu ibahangya-hangya n’erilangira nga si b’omughaso. Neryo, omughulu abaghala n’abali betu bakahika oko mihindano twanzire erikanganiabo olwanzo n’erikiraniabo.

13. Abasyakulu b’esyondeko bangakirania bati abandi omo mughulu owakalire? (Ulebaye n’epitsa.)

¹³ Abasyakulu b’esyondeko bakakiranaya abaghala n’abali babo omo mighulu eyikalire. Omughulu hamabya ekitsinduli kutse omwatsi w’amatunzo owakasaba erikola luba, abasyakulu b’esyondeko bakakola luba eriwatikya abaghala n’abali betu. Kandi bakabawatikaya bunya-kirimu. Abaghala n’abali betu sibalisagha erisondya obuwatikya oko basyakulu abakayikasa erikania nabo omo bolo, erihulikirirabo n’eriyihira omo mwanya wabo. Abasyakulu abakakanganaya emibere eyo bakaleka abaghala n’abali betu ibayilangira mo b’omughaso kandi ikyoloba okw’ibo erikwama obusondoli bosi obuseghemere eBiblia erilua oko basyakulu.​—1 Tes. 2:7, 8, 11.

14. Twangayira tuti erikangania ngoko tuli bandu ab’eriyiketerwa?

¹⁴ Ubye w’eriyiketerwa. Twanzire abandi ibayiketera itwe, kutsibu-tsibu omughulu banemulaba omo mibere eyikalire. (Misyo 17:17) Wangayira ghuti abandi batoke eriyiketera iwe? Tukayikasa erigha emibere ya Yehova obuli kiro, ng’eribya tukaberererya ebyo tukalagha abandi n’eribya tukasikya endambi. (Mat. 5:37) Kutse twamabilangira omundu oyulaghire oko buwatikya, ngambe itwamuwatikya. N’ekindi, ngambe itwabya tukakwama ebyalayiro by’endondeka ya Yehova omughulu tukakola omubiiri mulebe ogho twabirihabwa omo ndeko.

15. Endeko yikabana endundi yahi abasyakulu bamabya b’eriyiketerwa?

¹⁵ Endeko yikabana endundi yahi abasyakulu bamabya b’eriyiketerwa? Abaghala n’abali betu sibalihanga-hangaya kutsibu bamabya ibanayiketere ngoko banganabirikira abasyakulu omughulu wosi-wosi bamabilagha oko buwatikya. Abasyakulu bamabibya bangu eriwatikya abaghala n’abali betu, ekyo kikaleka abaghala n’abali betu ibaminya ngoko abasyakulu banzirebo. Kandi abaghala n’abali betu bakayiketera abasyakulu bo kutsibu bamabya bakakolesya eBiblia n’ebitsapo byetu bakahanabo omo mwanya w’eribwirabo ebyo bamalengekania. Kandi abaghala n’abali betu bakayiketera abasyakulu abatebisula emyatsi y’abandi kandi abakayikasa eriberererya ebyo balyalagha.

16. Twamabya bandu abasikire tukabana endundi yahi kutya n’abandi?

¹⁶ Isiwabya ukabinduka-binduka. Twamabya tukowa Yehova omo byosi n’eribya tukasikya esyokanuni sy’eBiblia tukayisogha, itukendibya eby’erileberyako ebyuwene oko bandi. Twamabya tukigha Ekinywa ky’oMungu n’eriwatya obwikirirya bwetu oko Yehova, itukendibya bataleghula okw’iye n’erisikya esyokanuni siwe. Kandi itukendibya kukaminya luba amakangirirya w’amabehi awatahambene n’ekwenene ya Yehova, isitwendibya tukatebibwa mugho. (Efe. 4:14; Yak. 1:6-8) Eribya n’obwikirirya oko Yehova n’omo syondaghane siwe kikatuwatikaya eritulera omughulu twamowa engulu eyituwene. (Esy. 112:7, 8) Kandi itwanganatoka eriyawatikya abandi abanemwaghalwa.​—1 Tes. 3:2, 3.

17. Ni mibere yahi eyangaleka abasyakulu ibatoka eriwatikya abandi eritulera n’eribya n’obwikirirya obuwatire omo Yehova?

¹⁷ Abasyakulu batolere ibabya n’olulengo omo mibere yabo, ibabya n’obwenge, ab’emitondekere kandi isibabya bakamakirira amalengekania wabo. Abalume abo bakawatikaya abandi eritulera n’eribya n’obwikirirya obuwatire omo Yehova n’eriwatikya endeko erisika omwibya ‘abakakwama ndeke-ndeke ekinywa ky’ekwenene.’ (Tito 1:9; 1 Tim. 3:1-3) Abasyakulu bamabibya eby’erileberyako ebyuwene n’eribya bakalenderera abaghala n’abali betu, ibanganawatikyabo eribya bakahika oko mihindano y’endeko, eribya bakatulira n’eribya bakayighisya. Omughulu abaghala n’abali betu bawite esyombanza esikaleka ibahangya-hangya, abasyakulu bakibukayabo eriyiketera Yehova, kandi bakawatikayabo erilengekania oko syondaghane siwe.

18. Busanaki twanzire eripipa Yehova, n’eriyitunda hakuhi naye? (Ulebaye n’akasanduku “Enzira ey’eriyitunda hakuhi na Yehova.”)

¹⁸ Twamabilangira emibere mibuya kundu ya Yehova. Busana n’ekyo netu twanganabugha ng’Omwami Daudi tuti: “Muhe ewasingya oko [Yehova, eribwe ryage.”] (Esy. 144:1) Biro byosi twanganayiketera Yehova. Omo ngebe yetu yosi, nibya twabikekeluha, tuwite ebingyi ebyangaleka itwabugha tuti: “Iye nibwe ryage” itunayiketere ngoko biro byosi akendisyatuwatikya erisighala hakuhi naye.​—Esy. 92:14, 15; NTN62.