“Inywibene-bene musombole nga nindi yo mukendikolera”

1. Litolere itwakolaki tutoke eribana obutseme bw’ekwenene, kandi busanaki? (Isaya 48:17, 18)

TATA wetu w’elubula atwanzire kutsibu, kandi anzire itwatsemera engebe lino n’omo biro ebikasa. (Omug. 3:12, 13) Mwatuhangyika n’obutoki bw’erikola emyatsi eyikaswekaya, aliwe mwatatuha obutoki obw’eriyitabala kutse obutoki obw’eriyisombolera ekibuya nga ky’ekyahi n’ekibi nga ky’ekyahi. (Omug. 8:9; Yer. 10:23) Anasi ngoko erimukolera n’erisikya ebyalayiro biwe byo byangaleka itwabya n’obutseme bw’ekwenene.—Soma Isaya 48:17, 18.

2. Sitani anzire itwikiriryaki, aliwe Yehova mwakolaki?

² Sitani anzire itwikirirya ngoko twanganabya n’obutseme butsira Yehova, kandi twanganayisondola ndeke itw’ibene-bene. (Enz. 3:4, 5) Erikangania ngoko Sitani ni mubehi, Yehova abirilighira abandu eriyitabala oko mughulu mulebe. Kilangirikire ndeke-ndeke ngoko abandu babiritaluka eriyitabala. Aliwe, eBiblia ikakanaya oko balume n’abakali bangyi ababya n’obutseme busana n’erikolera Yehova. Yesu Kristo yo w’erimbere kubo. Omo mwatsi ono, tukendilangira ebyaleka Yesu iniasombola erikolera Yehova. Kandi tukendilangira busanaki tutolere itwaramya Tata wetu w’elubula, Yehova. N’oko nduli, tukendilangira emyatsi milebe eyikaleka itwasombola erikolera Yehova.

EBYALEKA YESU INIASOMBOLA ERIKOLERA YEHOVA

3. Sitani mwasonda eriha Yesu yo ki, Yesu naye mwasombola erikolaki?

³ Iniane oko kihugho, Yesu mwasombola oyo akendikolera. Enyuma hake, Yesu abibatisibwa, Sitani mwamubwira ati akendimuha amami wosi w’oko kihugho amabikola omwatsi mughuma musa ow’erimuramya. Yesu mwamusubirya ati: “Uluaho we Sitani! Kundi Amasako akabugha ati: ‘Yehova Mungu waghu yo litolere iwaramya, kandi iye musa yo litolere iwakolera omubiiri owabuyirire.’” (Mat. 4:8-10) Busanaki Yesu mwayisogha eribya oko luhande lwa Yehova? Tulebaye emyatsi milebe eyaleka iniayisogha atya.

4-5. Ni myatsi milebe yahi eyaleka Yesu inyasombola erikolera Yehova?

⁴ Ekikulu oko byosi ekyaleka Yesu iniasombola erikolera Yehova, lo lwanzo. Yesu inianzire kutsibu Tata wiwe. (Yoh. 14:31) N’ekindi, Yesu mwakolera Yehova kundi wo wabya mwatsi w’omughaso erikola. (Yoh. 8:28, 29; Erib. 4:11) Iniasi ngoko Yehova yo nzuko y’engebe, ni w’eriyiketerwa, kandi simuhemu. (Esy. 33:4; 36:9; Yak. 1:17) Biro byosi, Yehova iniakabwira Yesu y’ekwenene, kandi yo wamuha ebyosi ebyo abya nabyo. (Yoh. 1:14) Aliwe, Sitani iye syasosire Yehova, yo waletera abandu b’erilolo n’oluholo. Sitani ni mubehi, ni w’omururu, kandi ayitsomene iye musa. (Yoh. 8:44) Yesu iniasi Yehova yo ndeke kandi iniasi na Sitani yo ndeke. Mwatasombola n’ekiro n’ekighuma eribya nga Sitani n’eriyisamambula oko Yehova.—Filip. 2:5-8.

⁵ Ekindi ekyaleka Yesu iniasombola erikolera Yehova ni kundi abya asi ngoko erikola ekyo kikendisyaleta emiyisa mingyi omo biro ebikasa. (Ebr. 12:2) Abya asi ngoko amabisighala mutaleghula, iniakendiwatikya okw’iyira erina lya Tata wiwe mo libuyirire, kandi ekyo ikikendileka ikyatokekana oluholo n’erilolo bihweho kera na kera.

EBIKATUKUNA ERIRAMYA YEHOVA

6-7. Busanaki munabwire abandu bangyi sibalikolera Yehova, aliwe busanaki Yehova atolere eriramibwa?

⁶ Munabwire, abandu bangyi sibalikolera Yehova kundi sibalibaminya emibere yiwe mibuya kandi sibasi emyatsi mibuya yosi eyo abiribakolera. Bali nga bandu abo Paulo atulira e Atene, nabo babya isibasi oMungu.—Emib. 17:19, 20, 30, 34.

⁷ Paulo mwakangania ngoko oMungu w’ekwenene “yukaha abandu b’engebe, omuka, n’emyatsi yosi.” Kandi mwatomekako ati: “Yukatuha engebe, yukaleka itwaghenda, n’eribyaho.” OMungu y’Omuhangyiki, iye yo ‘walusaya abandu b’ebihanda byosi omo mundu mughuma,’ neryo kwesi iye musa yo tutolere itwaramya.—Emib. 17:25, 26, 28.

8. Yehova syalyatakolaki n’ahake, kandi abirikangania ati ngoko atwanzire kutsibu?

⁸ Kusangwa Yehova y’Omuhangyiki, kandi yo Mukulu omo buhangwa bosi, endibya akakasa abandu erimukolera. Aliwe, Yehova syalyatakola atya n’ahake. Omo mwanya w’ekyo, abiritukangania emyatsi mingyi eyikakanganaya ngoko aneho, kandi ngoko anzire kutsibu obuli mughuma w’okw’itwe. Kandi anzire abandu bosi ibasyabya bira biwe kera na kera. (1 Tim. 2:3, 4) Busana n’ekyo, Yehova abiritubegherya erikangirirya abandu oko myatsi mibuya eyo akendisyakolerabo kandi ngoko akendisyakolayo. (Mat. 10:11-13; 28:19, 20) Kandi abirituha endeko eyo twangamuramiryamo n’eribana obuwatikya erilua oko basyakulu b’olwanzo.—Emib. 20:28.

9. Yehova akakanganaya ati ngoko anzire abandu bosi?

⁹ Yehova akakanganaya olwanzo lwiwe omw’iha ebindu bibuya nibya n’oko bandu abateligha ngoko aneho. Lengekanaya oko bino: Omo maelfu w’emyaka, abandu bangyi babiriyisogha erikola ebyo bakalengekanaya bati byo byuwene, omo mwanya w’erihulikirira Yehova. Nomo bine bitya, Yehova abiribaha butsira buhemu ebyosi ebyo balaghireko batoke eribyaho n’eritsemera engebe. (Mat. 5:44, 45; Emib. 14:16, 17) Yehova abiribaha obutoki bw’eriyira abira ababanzire, eriyira ekihanda, obutoki bw’eriyira abana, obutoki bw’erikola omubiiri, n’obw’eritsemera engebe. (Esy. 127:3; Omug. 2:24) Ekyo kikakanganaya ngoko Tata wetu w’elubula anzire abandu bosi. (Eril. 34:6) Muleke tuyibukaye emyatsi milebe eyikaleka itwayisombolera erikolera Yehova kandi ngoko akatsumula abakasombola erimukolera.

EBIKALEKA ITWASOMBOLA ERIKOLERA YEHOVA

10. (a) Ni mwatsi wahi mukulu owakatukuna erikolera Yehova? (Matayo 22:37) (b) Wabiribana endundi yahi omw’ighanyira lya Yehova? (Esyonyimbo 103:13, 14)

¹⁰ Nga Yesu, netu, ekikulu ekikaleka itwasombola erikolera Yehova ni kundi tumwanzire kutsibu. (Soma Matayo 22:37.) Tukabya twabigha oko mibere yiwe, kikatukuna eriyitunda hakuhi naye. Ng’eky’erileberyako, Yehova akatughanyira. Abaisraeli babere baghana erimwowa, mwalemba-lembabo ati: “Mubunukale, obuli mundu aleke enzira yiwe nyibi.” (Yer. 18:11) Yehova anasi ngoko situhika-hikene, tuli lututu. (Soma Esyonyimbo 103:13, 14.) Ukabya wabilengekania ngoko Yehova abirighanyira amalolo waghu mangyi, ekyo sikirikukuna erimukolera kera na kera?

11. Ni yindi myatsi yahi eyikaleka itwasombola erikolera Tata wetu w’elubula?

¹¹ Kandi tukanza erikolera Yehova kundi wo mwatsi oghuwene ogho twangakola. (Mat. 4:10) Kandi tunasi ngoko twamabisighala bataleghula oko Yehova, ekyo ikikendisyaluira mo emyatsi mingyi eyuwene. Omughulu tukakolera Yehova yo butaleghula, ekyo kikayira erina riwe mo libuyirire, kikakanganaya ngoko Sitani ni mubehi, kandi tukatsemesaya omutima wa Tata wetu. Kandi twamabisombola erikolera Yehova yo munabwire, twanganabana akanya k’erisyamukolera kera na kera!—Yoh. 17:3.

12-13. Twamighaki oko mwatsi wa Jane bana Pam?

¹² Twanganigha eryanza Yehova itukine balere, kandi olwanzo olo lwanganalola embere erikula netu tukakula. Tukanaye oko eky’erileberyako ky’abali betu babiri abasubeneko, ye Jane bana Pam.a Babere batsuka erigha eBiblia Jane abya n’emyaka 11 na Pam iniawite emyaka 10. Ababuti babo mubatanza erigha eBiblia, aliwe mubalighira Jane na Pam erilola embere erigha n’Abimiri ba Yehova bamatendileka eriya oko kisomo kyabo haghuma n’ekihanda kyabo. Jane akabugha ati: “Ebyo Abimiri ba Yehova babya bakanikangirirya mubyaniwatikya eritendibya ngakolesya esyodawa esikatamiraya n’eritendikola oko buraghane ng’abandi bakolo.”

¹³ Enyuma sy’emyaka milebe, abasika abo mubabya batuliri, bamabatisibwa. N’enyuma, mubatsuka obupainia kandi ibanemusulubirira n’ababuti babo abakulire. Jane akatubwira ngoko akayowa busana n’ebyosi ebyo Yehova abiribakolera. Akabugha ati: “Nabirigha ngoko Yehova syalisighanaya abira biwe bataleghula ngoko kikanganibwe omo 2 Timoteo 2:19 eyikabugha yiti: ‘Yehova anasi abandu biwe.’” Oko kwenene, syalisighanaya abakasombola erimwanza n’erimukolera!

14. Twangalwira tuti oko rina lya Yehova? (Ulebaye n’esyopitsa.)

¹⁴ Twanzire abandi ibaminya ekwenene oko Yehova. Lengekanaya oko kino: Kwa muhwa, unawite omwira waghu w’oko ndungu, ni mundu molo, akahitaya, kandi akaghanyira. Neryo kiro kighuma, iwowa omundu mulebe akabugha muhanda oko mwira waghu oyo ati ni mutsibu, kandi ni mundu mubi. Ighukendikolaki? Ighukendimulwirako. Kutya, omughulu Sitani n’abandu biwe bakabugha amabehi oko Yehova, tukamulwirako, tukabwira abandu b’ekwenene oko Yehova. (Esy. 34:1; Isa. 43:10) Ebinywa byetu n’emikolere yetu bikakanganaya ngoko twabirisombola erikolera Yehova n’omutima wosi.

15. Omukwenda Paulo mwabana ndundi yahi abikola esyombinduka omo ngebe yiwe? (Abanya Filipi 3:7, 8)

¹⁵ Twanzire erikola esyombinduka omo ngebe yetu tutoke eritsemesya Yehova kutse erikola ebingyi omo mubiiri wiwe. Ng’eky’erileberyako, omukwenda Paulo ini seghu-seghu omo kisomo ky’Abayahudi, aliwe mwaleka ekisomo ekyo atoke eribya mwigha wa Kristo n’erikolera Yehova. (Gal. 1:14) Ekyo mukyaleka iniabana olusunzo lw’eriyilangirira emyatsi mingyi omo mubiiri wa Yehova, kandi mwabana olusunzo lw’erisyatabala na Kristo omo lubula. Mwatayikubya bomo n’ahake busana n’erikolera Yehova, netu sitwendisyayikubya bomo.—Soma Abanya Filipi 3:7, 8.

16. Omwatsi wa Julia amatwighisyaki? (Ulebaye n’epitsa.)

¹⁶ Erikolera Yehova amabya iwo mwatsi w’omughaso omo ngebe yetu, Yehova inyakenditutsumula lino n’omo biro ebikasa. Tukanaye oko ky’erileberyako kya mwali wetu oyukahulawa mo Julia. Embere atsuke erigha eBiblia, Julia inyakimba omo kisomo kyabo eritsuka omo bwana. Kundi inyakimba ndeke, mwabegheribwa eribya mwimbi mukulu. Julia mwalw’inyakumayira kutsibu n’eribya akimba omo myanya eyikumayire kutsibu. Abere akasoma oko kalasi kaghuma ak’erikangirirya abandu eriimba, omukolo mulikyabo mwatsuka erimukanirya oko Mungu, n’oko rina liwe, Yehova. Muhatakya ebiro, Julia amatsuka erigha eBiblia kabiri oko yenga. Neryo omo mwanya w’eribya mwimbi oyukumayire kutsibu, Julia mwayisogha erilabya endambi yiwe n’akaghala kiwe akakolera Yehova. Aliwe, ekyo sikyabya kyolo. Akabugha ati: “Abandu bangyi ibakanibwira bati niri mukiru kundi munaleka eriimba busana n’erikolera Yehova, aliwe ingye inanzire erikolesya engebe yaghe yo ndeke erikolera Yehova.” Hamabilaba emyaka 30, Julia iniabiriyisogha atya; neryo munabwire anemuyowa ati? Akabugha ati: “Niri n’obutseme kundi munasombola erikolera Yehova, kandi ninasi ngoko akendisyaghutya obwagha bwaghe b’omo biro ebikasa.”—Esy. 145:16.

ULOLE EMBERE ERIKOLERA YEHOVA

17. (a) Abate batsuka erikolera Yehova batolere ibakolaki, kandi busanaki? (b) Ababirisombola erikolera oMungu batolere ibaminyaki?

¹⁷ Munabwire tuli oko nduli-nduli y’ebiro by’enduli by’ekihugho kibi kino. Omukwenda Paulo mwahandika ati: “Kandi, ‘hakisiya hake,’ kandi ‘oyukasa akendihika syenditselewa.’” (Ebr. 10:37) Ebinywa ebyo bitulebirye biti? Endambi eyikisiya oko bandu erisombola erikolera Yehova ni nge. (1 Kor. 7:29) Kandi itwe twamabya itwabirisombola erikolera oMungu, tunasi ngoko nomo kikendisyatusaba eriyiyinia omo maligho, aliwe “hakisiya hake” inywahwa.

18. Yesu na Yehova banzire itwakolaki?

¹⁸ Yesu mwasaba abandu eribya bigha biwe n’erilola embere erimukwama. (Mat. 16:24) Neryo twamabya itwabikolera Yehova omo myaka mingyi, tuyitsinge erilola embere erimukolera. Ekyo kikasaba eriyikasa kutsibu. Nomo ekyo si kyolo, twanganabya n’obutseme n’eribana emiyisa mingyi erilua oko Yehova, nibya na munabwire!—Esy. 35:27.

19. Omwatsi wa Gene amatwighisyaki?

¹⁹ Abandu bangyi bakalengekanaya bati erikolera Yehova kikendileka ibatatsemera engebe yabo ngoko banzire. Wamabya ighuli mulwana, ukalengekanaya uti erikolera Yehova likendileka iwatala okw’ibya n’engebe eyuwene? Mughala wetu mulwana oyukahulawa mo Gene akabugha ati: “Ingalengekanaya niti sinangayitsemesya kundi niri Mwimiri wa Yehova. Ingalangira abalwana ab’omo lubwa lwaghe nga bakayitsemesaya ndeke, bakaronda oko bakali, kutse eritsanga oko bitsange by’esyovideo ebirimo amalwa, ingye ininemulabya endambi yaghe yosi ngaya oko mihindano n’omw’itulira.” Erilengekania atya mulyaleka Gene iniakola ati? Akabugha ati: “Munatsuka erikola emyatsi mibi ng’abandi balwana, kandi eribugha ekwenene omo katambi kanyogho-nyogho munatsema, aliwe obutseme obo sibwabya bw’ekwenene. Munatsuka erilengekania oko ndundi eyikaluira omw’ikwama ebyo eBiblia ikabugha, neryo munayisogha eritasyakolera Yehova n’omutima wosi. Eritsukiraho nabiribyangalangira Yehova ng’akasubiraya oko misabe yaghe yosi.”

20. Tuyisohire kundu erikolaki?

²⁰ Omuhandiki mughuma w’esyonyimbo mwimbira Yehova ati: “Obutseme buli oko oyo ukasombola n’erileta hakuhi eriikala omo bibugha byaghu.” (Esy. 65:4) Netu tuyitsinge erikolera Yehova nga Yosua oyo wabugha ati: Nikwa ingye n’enyumba yaghe tukendikolera Yehova.”—Yos. 24:15.