OBUWATIKYA OKO BIHANDA | ERILEMBERA ABANA
Abana n’Enternete—Ekitsweka 1: Omwana waghe anganakolesya e Enternete?
Erisondasonda lighuma elyakolowa oko musuku (abana 100), muryakangania ngoko (abana 97) ba kubo bakakolesaya e Enternete. Omwana waghu ananzire kundu eriyighunga n’abandi oko Enternete? Byamabya bitya, hane emyatsi milebe eyo mutolere erilengekaniako.
Omo mwatsi ono, tukendilangira
Ngoko omwana waghu akakolesaya endambi yiwe
Esite nguma ye Enternete (website HelpGuide) yikabugha yiti: “Abakatsukisaya emitahula milebe y’Enternete bakakolayo n’amenge manene yitoke erihamba obulengekania bwaghu, usighale kuyo, n’eryanza erighusa eriso kangyi-kangyi oko telefone yaghu ukasonda emyatsi mihya eyo bamahira ako.”
“Nganayibwira niti ngandibugha esyodakika silebe ngalabalaba omo myatsi eyo abandu babiriteka oko Enternete, aliwe nganayeya inabiribughako esyosaha. Kyanganakala erikirya etelefone n’eribana oghundi mwatsi mubuya w’erikola.”—Lynne, ow’emyaka 20.
Yibulaye kino: Omwana waghe anemwenditoka eriyikakirya atoke erisikya emipika eyo nabirimuhiriraho omughulu akakolesaya e Enternete? Omwana wayi anakulire elitosire elyangamukolya oko kika inyanatoka eriyihiraho emitano eyo akendibya akasikya akakolesya e Enternete?
Erihano ly’eBiblia: “Neryo, muyitegaye ndeke. . . ngʼabandu bʼamenge, Simulabaye endambi yenyu yo buyira.”—Abanya Efeso 5:15, 16, nwt.
Erilighira omwana waghu erikolesya e Enternete ngoko anzire kilingene n’erimulighira erisamba oko sabayiri isyali atabegheribwa n’ahake
Ngoko omwana waghu akalangira obwira
Ekinywa“réseaux sociaux” kikasonda eribugha kiti abandu abakendibyako bakendibya n’abira kutse bakendibya bakakania n’abandu abo basi. Nomo erikanirania eryo lyanganabya ly’endata-ndata.
“Nabirilangira ngoko abandu bangyi bakayiteba bati eribana abandu banene abakakwamabo kutse abakanza esyopitsa syabo oko Enternete, ekyo nibughambu batsomenebo, nomo sibasibo.”—Patricia, ow’emyaka 17.
Yibulaye kino: Omwana waghe anakulire elitosire erihika oko kika isyangatsomana kutsibu abakamukwama n’eryanza ebyo akahira oko Enternete? Anganatoka erikola obwira n’abandu abate oko Enternete?
Erihano ly’eBiblia: “Omwira akanza emighulu yosi kandi ni mughala wabo oyukabutawa busana nʼobulighe.”—Emisyo 17:17, nwt.
Ngoko omwana waghu akayowa
Abakakwesa-kwesa emyatsi bati, erilabya endambi nene y’oko Enternete likaletera embwera, erihangya-hangya, n’ibya n’eribunika mutima kutsibu.
“Erilangira esyopitsa sy’abira baghu bakakola emyatsi haghuma n’abandi bira baghu—iwe isighuliko—siwangayowa ndeke.”—Serena, ow’emyaka 19.
Yibulaye kino: Omwana waghe anakulire elitosire elyanganamuwatikya eritenditoghera omo kitegho ky’eriyitsomana iye musa, eriyilingirirania n’abandi, kutse eriyowa muhanda akalangira emyatsi eyo abandi bana bakakola oko Enternete?
Erihando ly’eBiblia: “Situyitendere buyira, kutse erisondana kwʼomwaga, nʼeritsurana.”—Abanya Galatia 5:26.
Ngoko omwana waghu akayiwata oko Enternete
E Enternete yanganaleka omwana waghu inyalangira ebituwene ng’esyopitsa kutse esyovideo esy’endumbu kutse abandu abatuwene ibatsuka erimutumira emyatsi eyituwene. Nomo omwana waghu anganabya isiye yukatsukisaya emyatsi eyo, aliwe banganamutumirayo.
“Nabililangira ngoko emyatsi eyikahirawa oko Enternete kangyi-kangyi yikabya obutakenga. Abandu bangyi abaliko bakabugha amakaku n’omuziki wako syuwene.”—Linda, ow’emyaka 23.
Yibulaye kino: Omwana waghe anakulire eritosire inyanganatoka eribya mundu oyuwene oko Enternete? Omwana waghe anganatoka eriyihighula oko myatsi eyituwene eyo anganabana oko Enternete?
Erihano ly’eBiblia: “Simuleke obusingiri, kutse ebitisirire byosi, kutse obururu, bikahulwa omo katikati kenyu, . . . siritolere mukahula emyatsi eyikita esisoni, kutse ebinywa ebyʼobukiru kutse ebyʼerisekererya.”—Abanya Efeso 5:3, 4.
Ama “réseaux sociaux” anawite mughaso munene okwibyaho lyetu?
Iyehe, siwamughaso okwibyaho lyetu; nibya siwamughaso okwibya n’engebe y’obutseme. Abalwana n’abambesa bangyi banemutsemera engebe isibalikolesaya e Enternete. Abandi babya bakakolesyayo kera aliwe mubayisogha eriyilusyakuyo.
“Nabere nalangira ngoko e Enternete muyatsandya amaisa wa mwali wetu oyo tubutirwe naye, munayisogha eriyilusya kuyo. Lino nga yowa ndeke kandi nimemutsemera engebe.”—Nathan, ow’emyaka 17.
Ekyo utolere eriminya: Embere w’erilighira omwana waghu eribya oko mutahula mulebe we Enternete, utsuke walebya nganakulire eritosire elyanganamuwatikya erisikya endambi eyo ukamulighira erilabya oko Entenete, inyanganatoka eribya n’abira abuwene kandi inyanganatoka eriyihighula oko myatsi mibi eyikabanikako.
Erihano ly’eBiblia: “Omugerekania akalebaya ndeke ngoko angagenda.”—Emisyo 14:15.