Olwimbo lwa Solomona
5 “Mwali wetu, muheruki waghe,
Nabirihika omo kalima kaghe,
Nabiryoha oko mane-mane waghe n’ebiti byaghe ebikakumba ndeke.
Nabirirya ekisese* kyaghe ky’obuki n’obuki bwaghe;
Nabirinywa edivai yaghe n’amaziwa waghe.”
“Bira betu, mulye!
Munywe, mutamire olwanzo!”
2 “Ninaghotsere, aliwe omutima waghe syalito.
Namowa omwanze waghe akakongota oko mulango,
Ati: “Mwali wetu, mwanze waghe, nikingulire!
Iwe kalikuku kaghe, iwe uteko bulema,
Kusangwa ekimi kyabiritsapya omutwe waghe,
Ekimi ky’omo kiro kyabiritsapya omutwe waghe.”
3 “Nabirilusya eropo yaghe.
Nitasyambalayo kwehi?
Nabirinaba oko bisando.
Nitasyakinayabyo kwehi?
4 Omwanze waghe mwakingiraya ebyala by’omo kyuna ky’omulango n’eribilusyamo.
Neryo omutima waghe mwakalw’inyapuka-puka busana naye.
5 Mungahangana eriyakingulira omwanze waghe;
Ebyala byaghe mubikatoghongako amane-mane,
N’eminwe yaghe muyikatoghongako amatondi w’amaghuta w’amane-mane
Amatoghongera oko kifuli.
6 Mungakingulira omwanze waghe,
Aliwe omwanze waghe alue inyabiriluaho, alue inyabirighenda.*
Omutima waghe mwakapurika, kundi alue inyabirighenda.
Mungamusonda-sonda, aliwe munditamusunga.
Mungamubirikira, aliwe mwatititaba.
7 Mungahindana n’abateya ibanemukola erondo y’omo muyi.
Mubakaniswiraya, bamanihutalya.
Abateya b’oluhimbo mubakanisaghula ekitambara kyaghe eky’eriyiswika.
8 Ngabalapisaya inywe bambesa be Yerusalema:
Mwamabisunga omwanze waghe,
Mumubwire muti olwanzo lukambolaya.”
9 “Omwanze waghu alengire ati abandi banze bosi?
Iwe mukali mubuya oko bandi,
Omwanze waghu alengire ati abandi banze bosi?
Ekikaleka iwatulapisya utya?”
10 “Omwanze waghe akangabasenie, kandi akomire;
N’omo bandu 10 000 siwangamubula.
11 Omutwe wiwe ni horo, ehoro eyuwene.
12 Ameso wiwe ali ng’ehirikuku ehiri oko musike w’ehyusi,
Ehikanabira omo maziwa,
Ehyabirikira hakuhi n’ekiriba* ekyoswiremo amaghetse.
13 Amatema wiwe ali ng’engyingo y’ebiti ebikakumba ndeke,
Ali ng’ehikunguli-kunguli ehiriko ebiti ebikakumba ndeke.
Eminywa yiwe yiri ng’amawa w’elise,*
Yikatoghongako amatondi-matondi w’amaghuta w’amane-mane.
14 Ebyala biwe biri ng’ehiringo-hiringo hy’ehoro, ehipambire omo krisolite.
Enda yiwe yiri ng’erino ry’etembo* eryabiritendereribwa, erihakireko esafiri.
15 Amaghulu wiwe ali ng’esyonduyi sy’amabwe w’amalu-malu* esihimbire oko horo eyuwene kutsibu.
Ali nge Lebanoni, ni mubuya kutsibu ng’emiti y’emierezi.
16 Obuno bwiwe ni busi busa-busa,
Iye wosi uwene.
Inywe bambesa be Yerusalema, omwanze waghe kw’ali atya, oyo nanzire.