Yesibili YeenKronike
33 UManase+ bekaneminyaka eli-12 nakaba yikosi, wabusa iminyaka ema-55 eJerusalema.+
2 Wenza okumbi emehlweni kaJehova, alandela imikghwa enyenyisako yeentjhaba uJehova aziqotha phambi kwabantu bakwa-Israyeli.+ 3 Wakha kabutjha iindawo eziphakemeko ezagirizwa+ nguyise uHezekiya, wakhela aboBhali ama-aldara, wenza neengodo ezicwengileko,* wakhothamela loke ibutho lezulwini, walilotjha.+ 4 Godu wakha ama-aldara ngendlini kaJehova,+ leyo uJehova ebekathe ngayo: “EJerusalema, kulapho igama lami lizokuhlala khona ngokungapheliko.”+ 5 Wakhela nalo loke ibutho lezulwini ama-aldara ngeenrhodlweni ezimbili zendlu kaJehova.+ 6 Wenza amadodanakhe bona abe mhlatjelo*+ emRhobeni weNdodana kaHinomu;+ wenza imilingo,+ wathukula, wenza ubuloyi, wabeka abantu ababuza kwabafileko nababikezela ikusasa.+ Wenza okumbi emehlweni kaJehova ngezinga elikhulu khulu bona amsilinge.
7 Wathatha isithombe esibaziweko asenzileko wasingenisa ngendlini kaZimu weqiniso,+ leyo uZimu ebekathe ngayo kuDavida nendodanenakhe uSolomoni: “Endlini le neJerusalema engayikhetha hlangana nazo zoke iintjhaba zakwa-Israyeli, ngizokubeka igama lami+ ngokungapheliko. 8 Angekhe ngisavumela bona ama-Israyeli aphume enarheni engathembisa ukuyinikela abokhokho bawo, kwaphela nawalalela koke engiwayale ngakho, umThetho woke, iinqophiso nezahlulelo ezanikelwa ngoMosi.” 9 UManase wasolo aphambukisa uJuda nabantu beJerusalema, abenza bona benze ubumbi obudlula beentjhaba uJehova azitjhabalalisa phambi kwama-Israyeli.+
10 UJehova wasolo akhuluma noManase nabantu bakhe kodwana akhenge bamlalele.+ 11 Nje-ke uJehova wathumela ibutho leenduna zekosi ye-Asiriya bona lizokulwa nabo, babamba uManase ngeenkghopholo,* bambopha ngamakhamandela amabili wekhopha bamusa eBhabhiloni. 12 UManase agandelelekile, wancenga uJehova uZimakhe, wasolo azithoba khulu phambi kwakaZimu wabokhokho bakhe. 13 Wasolo athandaza kuZimu bese uZimu wamrhawukela, wasizwa isibawo sakhe, wambuyisela eJerusalema wamnikela ubukhosi+ bakhe. Yeke uManase wazi ukuthi uJehova nguZimu weqiniso.+
14 Ngemva kwalokhu, wakha iboda elingaphandle leDorobho lakaDavida+ elingetjingalanga yeGihoni+ emrhobeni belayokufika eSangweni leHlambi,+ waraga nalo labhoda i-Ofeli,+ walenza laphakama khulu. Ngaphezu kwalokho, wabeka iinduna zamabutho kiwo woke amadorobho avikelekileko kwaJuda. 15 Wasusa abozimu bezinye iintjhaba nesithombe esibaziweko ebesingendlini kaJehova+ nawo woke ama-aldara awakha entabeni yendlu kaJehova+ neJerusalema, wakulahlela ngaphandle kwedorobho. 16 Walungiselela ne-aldara lakaJehova,+ wenza imihlatjelo yetjhebiswano+ nemihlatjelo yokuthokoza+ kilo, watjela namaJuda bona alotjhe uJehova uZimu ka-Israyeli. 17 Nanyana kunjalo, abantu bebasenza imihlatjelo eendaweni eziphakemeko kodwana bebayenzela uJehova uZimabo kwaphela.
18 Malungana nawo woke omunye umlando kaManase, umthandazwakhe awenza kuZimakhe namezwi wababoni bemibono abakhuluma naye ngegama lakaJehova uZimu ka-Israyeli, kutloliwe emlandweni wamakhosi wakwa-Israyeli. 19 Umthandazwakhe,+ indlela arhawukelwa ngayo, izono zakhe zoke nokungathembeki kwakhe,+ lapho akha khona iindawo eziphakemeko wabeka neengodo ezicwengileko*+ neenthombe ezibaziweko ngaphambi kobana azithobe, kutloliwe emezwini wababoni bakhe bemibono. 20 Ngemva kwalokho, uManase walaliswa nabokhokho bakhe, wabulungelwa emzinakhe; indodanakhe u-Amoni yaba yikosi esikhundleni sakhe.+
21 U-Amoni+ bekaneminyaka ema-22 nakaba yikosi, wabusa iminyaka emibili eJerusalema.+ 22 Waraga nokwenza okumbi emehlweni kaJehova njengombana kwenza+ uyise uManase; u-Amoni wenzela imihlatjelo zoke iinthombe ezibaziweko ezenziwa+ nguyise uManase, waraga nokuzilotjha. 23 Kodwana akhenge azithobe kuJehova+ njengombana kwenza uyise;+ kunalokho, wazandisela umlandwakhe. 24 Ekugcineni iinsebenzi zakhe zaluka amano wokumbulala+ bezambulalela ngendlinakhe. 25 Kodwana abantu benarheni babulala boke labo abalukela iKosi u-Amoni+ amano wokuyibulala, babeka indodanakhe uJosiya+ bona ibe yikosi esikhundleni sakhe.