Eksodusi
4 UMosi waphendula wathi: “Akhesithi abangikholwa begodu abangilaleli,+ bathi, ‘UJehova akhenge abonakale kuwe.’” 2 UJehova wathi kuye: “Uphetheni?” UMosi waphendula wathi: “Ngiphethe intonga.” 3 Wathi: “Iphose phasi.” Wayiphosa, yaba yinyoka;+ uMosi weqela ngeqadi. 4 Nje-ke uJehova wathi kuMosi: “Lula isandla sakho uyibambe ngomsila.” Wasilula, wayibamba, yaphenduka intonga. 5 UZimu wathi: “Lokhu ngikwenzela bona bakholwe ukuthi uJehova uZimu wabokhokho babo, uZimu ka-Abrahama, uZimu ka-Isaka, uZimu kaJakopo+ ubonakele kuwe.”+
6 Godu uJehova wathi: “Ngibawa ufake isandla sakho esambathweni sakho.” Wasifaka. Kuthe nakasikhuphako besizele ubulepheru, simhlophe njengegabhogo.+ 7 Wathi: “Buyisela isandla sakho esambathweni sakho.” Wasibuyisela. Kwathi nakasikhuphako besele sipholile! 8 Wathi: “Nangabe abakukholwa begodu baseqisela amehlo isimangaliso sokuthoma, bazosinaka esilandelako.+ 9 Nangabe abazikholwa iimangaliswezi ezimbili begodu abafuni ukukulalela, yikha amanzi eMlanjeni iNayili uwathululele phasi, amanzi lawo azokuphenduka iingazi.+
10 UMosi wathi kuJehova: “Ngibawa ungilibalele Jehova, angikghoni ukukhuluma kuhle, akhenge khengikghone ngitjho nangemva kobana uthome ukukhuluma nami ngombana ngikhuluma kabuthaka begodu ngiyangunguza.”+ 11 UJehova wathi kuye: “Ngubani owenze umlomo womuntu namkha onamandla wokwenza abantu babe ziimumu, bangezwa eendlebeni, babone namkha babe ziimphofu? Akusingimi uJehova na? 12 Nje-ke khamba, ngizokuba nawe nawukhulumako begodu ngizokutjela ukuthi kufuze uthini.”+ 13 Kodwana uMosi wathi: “Ngilibalela Jehova, ngibawa uthumele omunye.” 14 UJehova wasilingeka, wathi kuMosi: “Umfowenu u-Aroni+ umLevi, ukghona ukukhuluma kuhle. Uyeza uzokuhlangana nawe, uzokuthaba nakakubonako.+ 15 Umtjele koke engikutjele khona,+ ngizokuba nani nanikhulumako,+ ngizonitjela okufuze nikwenze. 16 Nguye ozokukhuluma nabantu, uzokuba mkhulumelakho begodu wena uzokuba mjamelami kuye.+ 17 Uzokuthatha intonga oyiphetheko le, wenze ngayo iimangaliso.”+
18 Nje-ke uMosi wabuyela kuJetero umukhwe wakhe+ wathi kuye: “Ngibawa ukukhamba ngibuyele kubafowethu abaseGibhide ngiyokubona ukuthi basaphilile na. UJetero wathi kuMosi: “Khamba kuhle.” 19 Ngemva kwalokho, uJehova wathi kuMosi eMidiyani: “Buyela eGibhide ngombana boke abantu ebebafuna ukukubulala bahlongakele.”+
20 Yeke uMosi wathatha umkakhe namadodanakhe wabakhweza kudumbana, wabuyela enarheni yeGibhide. UMosi wathatha intonga leyo uZimu weqiniso amyale bona ayiphathe. 21 Nje-ke uJehova wathi kuMosi: “Nasele ubuyele eGibhide, yenza zoke iimangaliso engikunikele amandla wokuzenza phambi kwakaFaro+ kodwana ngizomvumela bona aqinise ihloko,*+ angekhe avumele abantu bakhambe.+ 22 Kufuze uthi kuFaro, ‘UJehova uthi: “U-Israyeli yindodanami, lizibulo lami.+ 23 Ngithi kuwe, Vumela indodanami ikhambe ukwenzela bona izongilotjha. Kodwana nawungafuni ukuyivumela ikhambe ngizokubulala indodanakho, izibulo lakho.”’”+
24 Nabasendleleni bajama endaweni yokuphumula, uJehova+ wahlangana naye* wafuna ukumbulala.+ 25 UTsiphora+ wathatha umukhwa obukhali wasoka indodanakhe, walisa isikhumba sawela eenyaweni zakhe,* wathi: “Kungombana umkhwenyana weengazi kimi.” 26 Wamlisa wakhamba. Kungesikhatheso uTsiphora athi, “Uba mkhwenyana weengazi” ngebanga lokusokwa.
27 UJehova wathi ku-Aroni: “Khamba uye emmangweni uyokuhlangana noMosi.”+ Wakhamba, wahlangana naye entabeni kaZimu weqiniso,+ wamlotjhisa ngokummanga. 28 UMosi watjela u-Aroni koke uJehova amtjele khona,+ wamtjela nangeemangaliso amyale bona azenze.+ 29 Ngemva kwalokho uMosi no-Aroni bakhamba bahlanganisa boke abadala bakwa-Israyeli.+ 30 U-Aroni wabatjela koke uJehova akukhulume kuMosi bewenza neemangaliso+ phambi kwabo. 31 Nje-ke abantu bakholwa.+ Kuthe nabezwa ukuthi uJehova utshwenyekile ngama-Israyeli+ begodu uwubonile umtlhagwawo,+ bakhothama phambi kwakhe.