Joromiya
18 Leli lilizwi lakaJehova elitjhinga kuJoromiya lithi: 2 “Sikima uye endlini yombumbi,+ nasele ulapho ngizokwenza uzwe amezwami.”
3 Yeke ngaya endlini yombumbi begodu bekasebenzela entweni yokubumbela. 4 Kodwana isitja umbumbi ebekasenza ngebumba sonakala ezandleni zakhe. Yeke wasilungisa wenza esinye isitja, saba ngendlela ebekafuna ngayo.*
5 Ilizwi lakaJehova lafika kimi lathi: 6 “‘Kghani angekhe ngenza kuwe ndlu ka-Israyeli njengombana umbumbi enza?’ kutjho uJehova. ‘Qala! Njengebumba elisesandleni sombumbi, nawe unjalo esandleni sami, wena ndlu ka-Israyeli.+ 7 Nanyana kunini nangikhuluma ngokusiphula, ngokugiriza nangokutjhabalalisa isitjhaba namkha umbuso,+ 8 nangabe isitjhaba silahla ukukhohlakala kwaso engikhulume ngakho, ngizokutjhugulula umkhumbulwami malungana nehlekelele ebengihlele ukuyilethela sona.+ 9 Nanyana kunini nangikhuluma ngokwakha namkha ukujamisa isitjhaba namkha umbuso, 10 kodwana senze okumbi emehlwenami begodu singalaleli ilizwi lami, ngizokutjhugulula umkhumbulwami malungana nezinto ezihle ebengihlose ukusenzela sona.’
11 “Nje-ke ngibawa uthi ebantwini bakwaJuda nezakhamuzini zeJerusalema, ‘Ngilokhu uJehova akutjhoko: “Ngilungiselela ihlekelele nendlela enginganijezisa ngayo. Ngibawa niphenduke eendleleni zenu ezimbi, nilungise iindlela zenu nezenzo zenu.”’”+
12 Kodwana sathi: “Akunathemba!+ Sizokukhamba ngomcabangwethu, ngamunye wethu uzokwenza ngokuvumelana nehliziywakhe ekhohlakeleko enekani.”+
13 Yeke ngilokhu uJehova akutjhoko:
“Zibuzeleni nina eentjhabeni.
Ngubani okhe wezwa into enjengale?
Intombi yakwa-Israyeli yenze into embi khulu.+
14 Kghani igabhogo leLibhanoni lizokunyamalala na emehlelweni yamadwala?
Namkha amanzi agelezako abuya kude azokoma na?
15 Kodwana abantu bami bangilibele.+
Benzela izinto ezingasizi ngalitho imihlatjelo,+
Benza abantu bakhubeke eendleleni zabo, eendleleni zakade,+
Bona bakhambe eendleleni ezingemuva ezingakahleleki nezingakalelezeki,*
16 Bona benze inarhabo into ethusako+
Into ezokubetjhelwa umlozi ngokungapheliko.+
Woke umuntu odlula kiyo uzoyiqala athukiwe begodu ayinikinele ihloko.+
17 Njengomoya wepumalanga, ngizobahlakaza phambi kwenaba.
Ngizobafulathela, ubuso bami ngekhe babubone, ngelanga lehlekelelabo.”+
18 Bazokuthi: “Yenize silukele uJoromiya amano,+ ngombana umthetho angekhe utjhabalale kubaphristi bethu namkha iseluleko esivela ebantwini abahlakaniphileko namkha elizwini elivela kubaphorofidi. Yenize sikhulumeni ngokujamelene naye begodu ningakulaleli akutjhoko.”
19 Maye! Jehova, ngibawa ungilalele,
Uzwe lokho abaphikisana nami abakutjhoko.
20 Inga-kghani okuhle kubhadelwa ngokumbi na?
Ngombana bembe umgodi bona bangibulale.+
Khumbula ngesikhathi ngijame phambi kwakho ngikhuluma okuhle ngabo,
Bona ususe ilaka lakho kibo.
21 Vumela amadodanabo bona afe ngendlala,
Begodu uwanikele emandleni wesabula.+
Kwanga abomkabo bangahlongakalelwa bantwana begodu babe bahlolokazi.+
Kwanga amadodabo angabulawa sibetho esibulalako,
Namasokana wakhona abulawe ngesabula epini.+
22 Isililo sabo asizwakale ngeendlini zabo
Nawubalethela abadlelezeli bangakalindeli.
Ngombana bembe umgodi bona bangithumbe
Babekela iinyawo zami iinthiyo.+
23 Kodwana wena Jehova,
Uwazi kuhle woke amaqhingabo wokobana bangibulale.+
Ungagubuzesi umtjhaphwabo,
Begodu ungasuli isono sabo phambi kwakho.+
Bavumele bawe phambi kwakho+
Nawuthatha igadango ngokujamelene nabo elakeni lakho.