Eksodusi
3 UMosi umkhwenyana kaJetero umphristi wakwaMidiyani, waba ngumalusi womhlambi kaJetero.+ Kuthe asaraga umhlambi awusa ngetjingalanga yommango, wafika entabeni kaZimu weqiniso, eRhorebe.+ 2 Nje-ke ingilozi kaJehova yabonakala kuye elangabini lomlilo hlangana nomuthi wameva.+ Uthe nakawuqalako, wabona kuvutha umlilo emthini loyo kodwana wona ungatjhi. 3 Nje-ke uMosi wathi: “Lokhu kuyarara, kubayini umuthi wameva lo ungatjhi, akhengikhambe ngiyowubona.” 4 UJehova nakabona ukuthi uMosi uphambukele ukuyokubona umuthi, wambiza hlangana nomuthi wameva loyo, wathi: “Mosi! Mosi! Yena waphendula wathi: “Ngilapha.” 5 Wathi: “Ungatjhideli. Hlubula amapatlagwanakho ngombana indawo ojame kiyo le icwengile.”
6 Waraga wathi: “NginguZimu kayihlo, uZimu ka-Abrahama,+ uZimu ka-Isaka+ noZimu kaJakopo.”+ UMosi wafihla ubuso bakhe ngombana bekasaba ukuqala uZimu weqiniso. 7 UJehova wangezelela wathi: “Kwamambala ngiwubonile umtlhago wabantu bami abaseGibhide begodu ngisizwile isililo sabo ngebanga lalabo ababasebenzisa budisi; ngibazi kuhle ubuhlungu ababuzwako.+ 8 Ngizokuyobasindisa ekugandelelweni babantu beGibhide+ begodu ngizobakhupha enarheni leyo ngibase enarheni ehle nekulu, inarha egeleza ibisi neliju,+ inarha yamaKanana, yamaRhiti, yama-Amori, yamaPerizi, yamaRhivi neyamaJebusi.+ 9 Nje-ke qala! Isililo sabantu bakwa-Israyeli sifikile kimi bengiyibonile nendlela abantu beGibhide ababagandelela ngayo.+ 10 Yeke, yewize ngikuthume kuFaro bona uyokukhupha abantu bami ama-Israyeli eGibhide.”+
11 UMosi wathi kuZimu weqiniso: “Ngingubani-ke mina kobana ngingaya kuFaro bengikhuphe ama-Israyeli eGibhide?” 12 Nje-ke uZimu wathi: “Ngizokuba nawe+ begodu leli litshwayo lokobana uthunywe ngimi: Ngemva kobana ukhuphe abantu eGibhide, nizokulotjha uZimu weqiniso entabeni le.”+
13 UMosi wathi kuZimu weqiniso: “Akhesithi ngiya kuma-Israyeli, ngithi kiwo, ‘UZimu wabokhokho benu ungithume kini,’ wona athi kimi, ‘Ngubani igama lakhe?’+ Kufuze ngithini kiwo?” 14 UZimu wathi kuMosi: “Ngizokuba Ngilokho Engikhetha Ukuba Ngikho.”*+ Wanaba wathi: “Nakhu ozokutjela ama-Israyeli, ‘UNgizoba Ngilokho, ungithume kini.’”+ 15 UZimu godu wathi kuMosi:
“Nakhu okufuze ukutjele ama-Israyeli, ‘UJehova uZimu wabokhokho benu, uZimu ka-Abrahama,+ uZimu ka-Isaka,+ uZimu kaJakopo+ ungithume kini.’ Leli ligama lami elizokuhlala ngokungapheliko,+ le yindlela ekufuze ningikhumbule ngayo iinzukulwana ngeenzukulwana. 16 Khamba ubuthelele abadala bakwa-Israyeli, uthi kibo, ‘UJehova uZimu wabokhokho benu ubonakele kimi, uZimu ka-Abrahama, ka-Isaka nokaJakopo wathi: “Ngiyibonile indlela eniphathwa ngayo eGibhide.+ 17 Nje-ke ngithi kini, ngizonisindisa+ ezandleni zamaGibhide nginise enarheni yamaKanana, yamaRhiti, yama-Amori,+ yamaPerizi, yamaRhivi neyamaJebusi,+ enarheni egeleza ibisi neliju.”’+
18 Kwamambala bazokulalela+ begodu nizokukhamba, wena nabadala bakwa-Israyeli, niye ekosini yeGibhide. Nje-ke nina madoda kufuze nithi kiyo: ‘UJehova uZimu wamaHebheru+ ukhulume nathi. Sibawa usivumele sithathe ikhambo lamalanga amathathu emmangweni ukwenzela bona senzele uJehova uZimethu umhlatjelo.’+ 19 Kodwana mina ngiyazi ukuthi ikosi yeGibhide angekhe inivumele bona nikhambe ngaphandle kobana kube nento eyikatelelako.+ 20 Yeke kuzokufuze ngilule isandla sami ngimadlhe iGibhide ngenze iimangaliso ezinengi, ngemva kwalokho-ke ikosakhona izanivumela bona nikhambe.+ 21 Ngizokwenza amaGibhide aphathe abantwaba ngomusa begodu angekhe nikhambe ninganalitho.+ 22 Omunye nomunye umfazi kufuze abawe umakhelwanakhe nabafazi abahlala endlinakhe bona bamuphe izinto zokuzikghabisa zesiliva nezegolide kunye nezambatho begodu nizozimbathisa amadodanenu namadodakazenu; nizokuthatha ubunjinga bamaGibhide.”+