Yesibili YeenKronike
32 Ngemva kobana uHezekiya enze izintwezi ngokuthembeka,+ uSanirheribu ikosi ye-Asiriya weza, wasahlela abantu bakwaJuda. Wavimbezela amadorobho avikelekileko ngomnqopho wokuwangenela bona awathumbe.+
2 UHezekiya nakabona ukuthi uSanirheribu ufikile bona azokulwa neJerusalema, 3 wathatha isiqunto ngemva kokukhulumisana namakhosana neengorho zakhe bona kuvalwe amanzi wemithombo engaphandle kwedorobho,+ yeke bamsekela kilokho akutjhoko. 4 Kwabuthelelwa abantu abanengi, bavala yoke imithombo nemisele engenisa amanzi enarheni, bathi: “Asifuni amakhosi we-Asiriya bona afumane amanzi amanengi nawezako.”
5 Ukungezelela kilokho, ngokuzimisela wavuselela iboda ebeligiriziwe, wakha nemibhotjhongo kilo, wakha nelinye iboda ngaphandle. Wavuselela neNdunduma*+ yeDorobho lakaDavida, wenza iinkhali neemviko ezinengi khulu. 6 Ngemva kwalokho, wabeka iinkhulu zamabutho bona zengamele abantu, zibabizele etatawini lesango ledorobho, wabakhuthaza wathi: 7 “Qinani nibe nesibindi. Ningathukwa namkha nihlengezele ngebanga lekosi ye-Asiriya+ nalo loke ibutho elikhamba nayo ngombana banengi abanathi ukudlula abanayo.+ 8 Ithembele emandleni womuntu kodwana thina sinoJehova uZimethu bona asisize, asilwele nezipi.”+ Abantu baqiniswa mamezwi kaHezekiya ikosi yakwaJuda.+
9 USanirheribu ikosi ye-Asiriya nakasese seLakitjhi+ nalo loke ibutho lakhe, wathumela iinsebenzi zakhe eJerusalema kuHezekiya ikosi yakwaJuda nakibo boke abantu bakwaJuda abaseJerusalema,+ zathi:
10 “USanirheribu ikosi ye-Asiriya uthi, “Nizakuthi nithembeni nanikokomele eJerusalema njengombana livinjezelwe+ nje? 11 UHezekiya uyanidurhisa, ufuna nibulawe yindlala nokoma nakathi: “UJehova uZimethu uzosisindisa esandleni sekosi ye-Asiriya.”+ 12 Kghani lo akusinguHezekiya owasusa iindawo eziphakemeko+ zakaZimenu nama-aldarakhe,+ ngemva kwalokho wathi kuJuda neJerusalema: “Kufuze nikhothame e-aldareni linye, nithunyise nemihlatjelo kilo”?+ 13 Anikwazi na lokho mina nabokhokho bami esakwenza kibo boke abantu bezinye iinarha?+ Kghani abozimu bezinye iintjhaba bakghonile na ukusindisa iinarha zabo esandleni sami?+ 14 Abokhokho bami batjhabalalisa iinarha ezinengi begodu abozimu beentjhabezo akhenge basindise abantu babo esandleni sami. Nje-ke nina khuyini enenza nikholelwe ukuthi uZimenu uzonisindisa esandleni sami?+ 15 Yeke ningavumeli uHezekiya anikhohlise namkha anidurhise ngendlela le!+ Ningamkholwa ngombana akekho uzimu wananyana ngisiphi isitjhaba namkha umbuso owakghona ukusindisa abantu bakhe esandleni sami nesandleni sabokhokho bami. Uzokubhalelwa kangangani-ke uZimenu ukunisindisa esandleni sami!’”+
16 Iinsebenzi zakaSanirheribu zaraga nokuhleka uJehova uZimu weqiniso, zahleka noHezekiya incekwakhe. 17 Watlola neencwadi+ ezihlambalaza uJehova uZimu ka-Israyeli+ ngokumdelela wathi: “Njengabozimu beentjhaba ababhalelwa ukusindisa abantu babo esandleni sami,+ noZimu kaHezekiya angekhe akghone ukusindisa abantu bakhe esandleni sami.” 18 Zarhuwelela abantu beJerusalema egade basebodeni ngelimi lamaJuda, zenza lokhu bona zibathuse bese barhidlwe livalo ukwenzela bona ziragelele idorobho.+ 19 Zadelela uZimu weJerusalema njengombana zenza kibozimu beentjhaba abenziwe zizandla zabantu. 20 Kodwana iKosi uHezekiya nomphorofidi u-Isaya+ indodana ka-Amotsi bebasolo bathandaza ngalokhu balilela isizo lakaZimu.+
21 Ngemva kwalokho, uJehova wathumela ingilozi, yarhayila zoke iingorho,+ abadosiphambili neenduna ebezingekampeni yekosi ye-Asiriya kangangobana yabuyela enarhenayo ihlazekile. Ngokukhamba kwesikhathi yangena ngendlini kazimayo* begodu amanye wamadodanayo ayibulala ngesabula.+ 22 Nje-ke uJehova wasindisa uHezekiya nabantu beJerusalema esandleni sakaSanirheribu ikosi ye-Asiriya, wabasindisa nesandleni sawo woke amanababo, wabanikela nokuphumula mahlangothi woke. 23 Abantu balethela uJehova izipho eJerusalema, banikela uHezekiya+ ikosi izinto eziligugu, ngemva kwalokho wahlonitjhwa khulu kizo zoke iintjhaba.
24 Emihleni leyo uHezekiya wagulela ukufa bese wathandaza kuJehova,+ wamphendula wamnikela netshwayo.+ 25 Kodwana uHezekiya akhenge athokoze ngokuhle enzelwa khona, wazikhukhumeza wazibangela ilaka, wabangela nabantu bakwaJuda nebeJerusalema. 26 Nanyana kunjalo, uHezekiya walisa ukuzikhukhumeza+ wazithoba nabantu beJerusalema bazithoba nelaka lakaJehova akhenge libehlele emihleni kaHezekiya.+
27 UHezekiya waba nomnotho+ bese waduma khulu. Wazenzela iinlulu+ wabeka isiliva, igolide, amatje aligugu, amafutha webhalisamu, iimviko nazo zoke izinto eziligugu. 28 Wenza neenlulu zesivuno seenthoro, sewayini elitjha nesamafutha. Wenza neembaya zayo yoke imihlobo yefuyo neembaya zemihlambi. 29 Wazakhela amadorobho, waba nefuyo enengi yeenkomo neyezimvu ngombana uZimu wamupha ipahla enengi. 30 UHezekiya wavala amanzi womthombo+ ophezulu weGihoni,+ wawathumela enzasi etjingalanga yeDorobho lakaDavida.+ UHezekiya waphumelela kiwo woke umsebenzakhe. 31 Nokho nakuthunyelwa abakhulumeli bamakhosana weBhabhiloni bona bayombuza ngetshwayo+ elenzeka enarheni,+ uZimu weqiniso wamtjhiya bona amlinge+ ukuthi azi koke okusehliziywenakhe.+
32 Malungana nawo woke omunye umlando kaHezekiya nezenzo zakhe zomusa,+ kutloliwe embonweni womphorofidi u-Isaya+ indodana ka-Amotsi, encwadini yamakhosi wakwaJuda newakwa-Israyeli.+ 33 Ngemva kwalokho, uHezekiya walaliswa nabokhokho bakhe, wabulungelwa emkhuphukelweni wombundu otjhinga lapho kubulungelwe khona amadodana kaDavida.+ Yeke woke amaJuda nabantu beJerusalema bamhlonipha nakahlongakalako. Indodanakhe uManase yaba yikosi esikhundleni sakhe.