Ungaba Mngani KaJehova

UJehova ufuna umazi ngcono. Kubayini? Unethemba lokuthi lokha nawufunda ngobuntu bakhe, iindlela zakhe, iminqophwakhe, kulapho la uzokufuna khona ukuba mnganakhe. Inga-kghani ungaba mngani kaZimu? (Funda IRhubo 25:14.) Khuyini ongayenza bona ube mnganakhe? IBhayibheli liyayiphendula imibuzo leyo beliveza nokuthi kubayini ukuba mngani kaJehova kuqakatheke khulu begodu kubuhlobo obuhle ongaba nabo.

1. Sithini isimemo uJehova akunikela sona?

“Tjhidelani kuZimu, naye uzokutjhidela kini.” (Jakopo 4:8) Kutjho ukuthini lokhu? UJehova ukumema bona ube mnganakhe. Abanye bakufumana kubudisi ukucabanga nje ukuthi bangaba mngani womuntu abangamboniko, ingasaphathwa yokuba mngani kaZimu. Nanyana kunjalo, eliZwini lakhe iBhayibheli, uJehova usivezela koke ekutlhogeka sikwazi ngobuntu bakhe ukwenzela ukuthi sitjhidele kuye. Nasifunda umlayezo uZimu asinikele wona eliZwini lakhe iBhayibheli, ubungani bethu naye buyakhula ngitjho nanyana singeze sambona.

2. Kubayini uJehova aMngani ophuma phambili ongaba naye?

Akakho umuntu okuthanda ukudlula uJehova. Ufuna uthabe begodu uye kuye lokha nawutlhoga isizo. Kufuze ‘uphosele koke okukutshwenyako kuye, ngombana unendaba nawe.’ (1 Pitrosi 5:7) UJehova uhlala akulungele ukusekela, aduduze bekalalele abangani bakhe.—Funda IRhubo 94:18, 19.

3. Khuyini uJehova ayilindele ebanganini bakhe?

UJehova uyabathanda abantu, “kodwana utjhidelene nabalungileko.” (IzAga 3:32) UJehova ulindele ukuthi boke abangani bakhe balinge ngakho koke okusemandlenabo ukwenza izinto aziqala njengezilungileko begodu babalekele ukwenza izinto ezimbi. Abanye bangazizwa ngasuthi angekhe bakghona ukuphila ngeenkambiso zakaJehova zokulungileko nokungakalungi. Nanyana kunjalo, uJehova unehliziywehle. Wamukela woke umuntu omthandako nowenza koke okusemandlenakhe ukumthabisa.—IRhubo 147:11; IzEnzo 10:34, 35.

FUNDA NGOKUNGENELELEKO

4. U-Abrahama bekamngani omkhulu kaJehova

Indaba ka-Abrahama ekukhulunywa ngayo eBhayibhelini (obuye abizwe godu ngokuthi ngu-Abramu) iyasikhanyisela ukuthi kutjho ukuthini ukuba mngani kaZimu. Funda ngo-Abrahama kuGenesisi 12:1-4. Bese nicoca ngemibuzo nasi:

• Khuyini uJehova abawa u-Abrahama bona ayenze?

• Khuyini uJehova ayithembisa u-Abrahama?

• U-Abrahama wazizwa njani lokha uJehova nakamnqophisako?

5. Lokho uJehova akubawa ebanganini bakhe

Kanengi silindele izinto ezithileko ebanganini bethu.

• Ngiziphi izinto ozilindele bona umnganakho akwenzele zona?

Funda yoku-1 kaJwanisi 5:3, bese nicoca ngombuzo olandelako:

• Khuyini uJehova ayilindele ebanganini bakhe?

Bona silalele uJehova, kungatlhogeka sitjhugulule indlela esiziphatha ngayo nobuntu obuthileko obungathandekiko. Funda u-Isaya 48:17, 18, bese nicoca ngombuzo naku:

• Kubayini uJehova abawa abangani bakhe bona benze amatjhuguluko?

6. Lokho uJehova akwenzela abangani bakhe

IVIDIYO: UJehova Ungenzele Okukhulu (3:20)

• UJehova umsize njani umma ekukhulunywa ngaye evidiyweni le bona ahlule imicabango engakhi nemizwa engafanelekiko ebekanayo?

Funda u-Isaya 41:10, 13, bese nicoca ngemibuzo nasi:

• UJehova ubathembisani abangani bakhe?

• Kghani ucabanga ukuthi uJehova angaba Mngani omuhle kuwe? Kubayini ucabanga njalo?

7. Ubungani noJehova bubandakanya ukukhulumisana

Ukukhulumisana kuqinisa ubungani. Funda IRhubo 86:6, 11, bese nicoca ngemibuzo nasi:

• Singakhulumisana njani noJehova?

• UJehova ukhulumisana njani nathi?

ISIRHUNYEZO

UJehova ufuna ukuba Mnganakho begodu uzokusiza utjhidelane naye.

Buyekeza

• UJehova ubasiza njani abangani bakhe?

• Kubayini uJehova atjela abangani bakhe bona benze amatjhuguluko?

• Kghani uJehova ulindele okunengi khulu ebanganini bakhe? Sekela ipendulwakho.

HLOLA OKUNGENZASI

Funda indlela ongathuthukisa ngayo ubuhlobo bakho noZimu.

“Ngingaba Njani Mngani KaZimu?” (Imibuzo Ebuzwa Babantu Abatjha—Iimpendulo, Umqulu 2, Isahluko 35)

Fumana kobana kubayini umma othileko athi ubuhlobo bakhe noJehova basindisa ipilwakhe.

“Bengingumuntu Ongafuni Ukufa Nala Kudlule Khona!” (IsiThala No. 1 2017)

Lalela okutjhiwo babantu abatjha ngobuhlobo babo noJehova.

Kutjho Ukuthini Ukuba Mngani KaZimu? (1:46)