ISIFUNDO 10
Imihlangano YaboFakazi BakaJehova Ingakusiza Njani?
Khewamenyelwa emhlanganweni waboFakazi bakaJehova? Nangabe akhenge khewuvakatjhe, ekuthomeni ungazizwa usaba ukuya. Ungazibuza: ‘Kwenzekani emihlanganweni leyo? Kubayini iqakathekile? Kubayini kufuze ngiye?’ Esifundwenesi sizokuthola ukuthi ukuhlangana nabanye kusisiza njani sitjhidelane noZimu begodu kusizuzisa njani.
1. Kubayini kuqakathekile ukuthi sihlangane?
Tjheja indlela omunye umtloli weBhayibheli aveza ngayo ukuqakatheka kokuhlangana nabanye: “Ngizokudumisa uJehova ebandleni elikhulu.” (IRhubo 26:12) Ngendlela efanako, aboFakazi bakaJehova bathaba khulu nabahlangene boke. Ephasini mazombe, bahlangana qobe veke balotjhe uZimu, babhine bebathandaze. Iinkhathi ezimbadlwana qobe mnyaka, babamba imihlangano emikhulu.
2. Khuyini ozoyifunda emihlanganwenethu?
Emihlanganwenethu, sidzimelela eliZwini lakaZimu ngombana ‘lihlathululwa ngokukhanyako abantu bazwisise.’ (Funda uNerhemiya 8:8.) Ngokuba khona emihlanganweni le, uzokufunda ngoJehova nangobuntu bakhe obuhle. Njengombana uzokufunda ngokungeneleleko ngethando analo ngawe, lokho kuzokwenza utjhidelane naye. Uzokubona nokuthi uzokusiza njani ube nokuphila okuthabisako.—Isaya 48:17, 18.
3. Khuyini ozoyizuza ngokuhlangana nabanye emihlanganwenethu?
UJehova uthi, “asicabangelaneni ukuthi sivuselelane ithando nemisebenzi emihle, singakuliseleli ukuhlangana kwethu ndawonye.” (Hebheru 10:24, 25.) Emihlanganenwethu uzokuhlangana nabantu abathandanako begodu nabo njengawe banekareko yokufunda okunengi ngoZimu. Uzobezwa bakhuluma ngezinto ezikhuthazako abazifumene eBhayibhelini. (Funda kwebeRoma 1:11, 12.) Uzokucoca nabanye abakghone ukuqalana nemiraro ngendlela ephumelelako, okumiraro abantu abatjhadileko nabangakatjhadi abaqalana nayo. La ngamanye amabanga enza ukuthi uJehova afune sihlale sihlangana qobe!
FUNDA NGOKUNGENELELEKO
Fumana ukuthi kwenzekani emihlanganweni yaboFakazi bakaJehova nokuthi kubayini kuqakathekile bona ube khona emihlanganweni le.
4. Imihlangano yaboFakazi bakaJehova
AmaKrestu wekadeni bekahlala ahlangana qobe ukwenzela bona alotjhe uJehova. (Roma 16:3-5) Funda kwebeKolose 3:16, bese nicoca ngombuzo lo:
AmaKrestu wekadeni bekamlotjha njani uJehova?
Namhlanjesi, aboFakazi nabo bahlangana eendaweni zabo zokulotjha uJehova. Nawuzakubona ukuthi injani imihlanganwabo, dlala IVIDIYO. Bese uqala iinthombe zalokho okwenzeka esifundweni ngemva kwalokho nicoce ngemibuzo nasi elandelako.
Ngikuphi ukufana okukhona kilokho okwenzeka eWolweni lomBuso nalokho okufunda emtlolweni webeKolose 3:16?
Evidiyweni namkha esithombeni, ngikuphi okuthandako ngemihlanganwethu?
Funda yesi-2 kwebeKorinte 9:7, bese nicoca ngombuzo olandelako:
Kubayini imihlangano yaboFakazi bakaJehova isimahla?
Wena nomuntu okufundelako, qalani lokho okuzokucocwa ngakho emhlanganweni weveke leyo.
Ngiyiphi ingcenye ocabanga ukuthi ungayithabela namkha obona ngathi izokuzuzisa khulu?
Kghani bewazi?
Ku-jw.org, ungakghona ukufumana ukuthi imihlangano ibanjwa nini nakuphi, ephasini mazombe.
Emihlanganwenethu kuba neenkulumo, imiboniso namavidiyo. Sithoma besiphethe ngengoma nomthandazo
Phakathi nomhlangano kuba neengcenye la woke umuntu avulekelwa lithuba lokuphendula
Woke umuntu wamukelekile—imindeni, abantu abangakatjhadi, abalupheleko kuhlanganise nabantwana
Imihlanganwethu isimahla. AboFakazi bakaJehova abathathi kongozelo
5. Kufuze uzimisele nawuzokuba khona emihlanganweni
Cabanga ngesibonelo somndeni wekhaboJesu. Bona babe khona emhlanganweni waqobe mnyaka, bekufuze bakhambe amakhilomitha ali-100 badlula iintaba ukusukela eNazaretha ukufikela eJerusalema. Funda uLukasi 2:39-42, bese nicoca ngemibuzo le:
Ucabanga ukuthi ikhambo lokuya eJerusalema belitlhoga ukuzimisela?
Kubayini kufuze uzimisele nawuzokuba khona emihlanganweni?
cabanga bona kuqakathekile ukuthi ube khona? Kubayini utjho njalo?
IBhayibheli lithi kuqakatheke khulu ukuhlangana lokha nasilotjha uJehova. Funda amaHebheru 10:24, 25, bese nicoca ngombuzo lo:
Kubayini kuqakathekile ukuthi ube khona emihlanganweni qobe?
ABANYE ABANTU BATHI: “Akutlhogeki ukuthi uhlangane nabanye abantu bona ufunde iBhayibheli. Ungazifundela wedwa usekhaya.”
Ngisiphi isibonelo esiseBhayibhelini namkha umtlolo oveza lokho uJehova akufunako?
ISIRHUNYEZO
Ukuba khona emihlanganweni kuzokusiza ufunde okunengi khulu ngoJehova, kuqinise ubungani bakho naye bewumlotjhe nabanye.
Buyekeza
Kubayini uJehova asikhuthaza bona sihlangane?
Khuyini ozoyifunda emihlanganweni yaboFakazi bakaJehova?
Khuyini ongayizuza ngokuba khona emihlanganwenethu?
HLOLA OKUNGENZASI
Kuthiwani nangabe unevalo lokuza emihlanganweni? Qala bona enye indoda ebeyizizwa ngendlela efanako eyagcina ikuthanda ngayo ukuya emihlanganweni.
Funda ngokuthi abanye bazizwa njani ngokuba khona emihlanganweni.
“Kubayini kufuze Uye Esifundweni eWolweni LomBuso?” (Isihloko esiku-jw.org)
Zifundele ukuthi kwatjhuguluka njani ukuphila kwendoda ethileko ngemva kokuya emihlanganweni yaboFakazi bakaJehova.
“Bengihlala Ngiphethe Isigidi Sami Nanyana Kukuphi La Ngiya Khona” (IsiThala, Julayi 1, 2014)