Zitjhunyayelwa Njani Iindaba Ezimnandi?

Esikhathini esingaphelisi ihliziyo uJehova uzokusebenzisa umBuswakhe bona aqede yoke imiraro esiqalene nayo. Iindabezo zimnandi khulu kangangobana woke umuntu kufuze azizwe. UJesu ufuna abalandeli bakhe bacocele abanye iindabezi! (Matewu 28:19, 20) Alo, aboFakazi bakaJehova bakwenze njani lokho uJesu abatjele ukuthi bakwenze?

1. UMatewu 24:14 uzaliseka njani namhlanjesi?

UJesu wathi: “Iindaba ezimnandezi zomBuso zizokutjhunyayelwa kilo loke iphasi.” (Matewu 24:14) AboFakazi bakaJehova bayakuthabela ukwenza umsebenzi oqakathekileko lo. Sitjhumayela iindaba ezimnandi ephasini loke ngamalimi angaphezu kwayi-1 000! Umsebenzi omkhulu lo utlhoga ukuzimisela okukhulu nokuhleleka. Kungebangelo ungeze wenzeka ngaphandle kwesizo lakaJehova.

2. Ngimiphi imizamo esiyenzako bona sitjhumayele?

Sitjhumayela koke la kunabantu khona. NjengamaKrestu wangesikhathi sabapostoli, sitjhumayela ‘endlini ngendlu.’ (IzEnzo 5:42) Indlela le yokutjhumayela isenza sikhulume neengidi zabantu qobe mnyaka. Njengombana abantu bangafumaneki emakhaya ngaso soke isikhathi, sitjhumayela neendaweni ezinabantu abanengi. Sihlala sifuna amathuba wokutjela abanye ngoJehova nalokho azokwenza.

3. Ngubani ekufuze atjhumayele iindaba ezimnandi?

Woke amaKrestu wamambala kufuze atjhumayele iindaba ezimnandi kwabanye. Umsebenzi lo uqakathekile kithi. Sitjhumayela ngendlela esingakghona ngayo ngombana siyazi ukuthi iindabezi zingasindisa ukuphila kwabantu. (Funda yoku-1 kaThimothi 4:16.) Asibhadelwa emsebenzini lo ngombana iBhayibheli lithi: “Nifumene ngesihle, yiphani ngesihle.” (Matewu 10:7, 8) Akusibo boke abamukela umlayezwethu kodwana siragela phambili nokutjhumayela ngombana siyazi ukuthi nasenza njalo silalela uJehova begodu siyamthabisa.

FUNDA NGOKUNGENELELEKO

4. Sisebenza budisi bona sitjhumayeze boke abantu

IVIDIYO: Ukutjhumayela “Kufikela Emaphethelweni Wephasi” (7:33)

• Khuyini oyithandako ngemizamo eyenziwa boFakazi bakaJehova bona batjhumayele?

Funda uMatewu 22:39 nekwebeRoma 10:13-15, bese nicoca ngemibuzo elandelako:

• Umsebenzethu wokutjhumayela utjengisa njani ukuthi siyabathanda abomakhelwana bethu?

• UJehova uzizwa njani ngalabo abatjhumayela iindaba ezimnandi?—Funda ivesi 15.

5. Sisebenza noZimu

Kunobufakazi obunengi obutjengisa ukuthi uJehova unqophisa umsebenzethu. Ngokwesibonelo, e-New Zealand umfowethu uPaul wahlangana nomunye umma nakatjhumayela endlini ngendlu ngemva kwamadina. Mhlokho ekuseni, umma lo wathandaza kuZimu asebenzisa igama lakaZimu elithi Jehova, ambawa bona kube nomuntu ozomvakatjhela. UPaul uthi, “Ngemva kwama-awara amathathu ngafika emzinakhe.”

Funda yoku-1 kwebeKorinte 3:9, bese nicoca ngombuzo lo:

• Ubufakazi obufana nalobu obenzeke e-New Zealand butjengisa njani ukuthi uJehova unqophisa umsebenzi wokutjhumayela?

Funda IzEnzo 1:8, bese nicoca ngombuzo lo:

• Kubayini sitlhoga ukusizwa nguJehova nasizakukghona ukuqeda umsebenzethu wokutjhumayela?

Kghani bewazi?

Qobe veke emihlanganwenethu yaphakathi kweveke, siyabandulwa bona sikghone ukuyokutjhumayela. Nangabe wakhe weza emihlanganweni le, ucabangani ngendlela esibandulwa ngayo?

6. Silalela umyalo kaZimu wokutjhumayela

Ngesikhathi sabapostoli, abaphikisi balinga ukuvimba abalandeli bakaJesu bona bangasatjhumayeli. AmaKrestu wekadeni lawo avikela ilungelo lawo lokutjhumayela ‘ngokuhloma iindaba ezimnandi ngokomthetho.’ (Filipi 1:7) AboFakazi bakaJehova nabo benza njalo namhlanjesi.a

IVIDIYO: Ukuvikela Iindaba Ezimnandi Ngokomthetho (2:28)

Funda IzEnzo 5:27-42, bese nicoca ngombuzo lo:

• Kubayini singeze salisa ukutjhumayela?—Funda amavesi 29, 38,no-39.

ISIRHUNYEZO

UJesu wayala abalandeli bakhe bona batjhumayele iindaba ezimnandi kizo zoke iintjhaba. UJehova usiza abantu bakhe bona benze umsebenzi lo.

Buyekeza

• Iindaba ezimnandi zitjhunyayelwa njani ephasini loke?

• Umsebenzethu wokutjhumayela utjengisa njani ukuthi sithanda abomakhelwana bethu?

• Ucabanga ukuthi umsebenzi wokutjhumayela ungasenza sithabe? Kubayini utjho njalo?

HLOLA OKUNGENZASI

Qala indlela aboFakazi bakaJehova abatjhumayela ngayo emadorobheni amakhulu.

Ijima Elikhethekileko Lokutjhumayela Emadorobheni Amakhulu e-Paris (5:11)

Lalela omunye akutjela ukuthi kubayini kumthabisa ukutjhumayela isikhathi esizeleko?

Ngiyathaba Ukuthi Ngakhetha Umsebenzi Lo (6:29)

Funda ngeenqunto eziqakathekileko ezathathwa yikhotho nezenza umsebenzi wokutjhumayela waba lula.

“Abatjhumayeli BomBuso Bayokumangala Ekhotho” (UmBuso KaZimu Uyabusa!, isahluko 13)