Isethulo

ImiTlolo Yokuphila KwamaKrestu, izokwenza kube bulula ukufumana amavesi neendaba eziseBhayibhelini ezingakusiza uqalane neentjhijilo ngokuphumelelako. Izokusiza nangokuthi ufumane amavesi afaneleko bona ukhuthaze abanye bewubasize benze iinqunto ezidumisa uJehova. Fumana isihloko bese uvumele imibuzo neerhunyezo zeembonelo zeBhayibheli ezikhonjiweko zikunqophise. (Funda ibhoksi elithi, “Indlela Yokusebenzisa Incwadi Le.”) Uzokufumana iinqophiso ongazisebenzisa nezingakusiza, iinluleko nenduduzo eliZwini lakaZimu. Uzokufumana namagugu ongacoca ngawo nabanye—amavesi weBhayibheli azobavuselela, abasize ngemiraro abaqalene nayo bekabanikele iseluleko nesikhuthazo.

Indlela Yokusebenzisa Incwadi Le

Nawuzakufumana isihloko, ungasebenzisa ibhoksi lokusetjha namkha ungaqalaqala ngendlela iinhloko ezihlelwe ngayo. Incwadi le ethi, ImiTlolo Yokuphila KwamaKrestu ihlukaniseke ngeengcenye ezilikhomba: Iintjhijilo, Ukuziphatha, Ibandla, Ukuphila Kwaqobe Lilanga, Umndeni, Ukuthanda UZimu nengcenye ethi, Ubuntu Bethu. Iinhloko ezinengi zizokuba ngaphasi kwenye yeengcenyezi. Khetha ingcenye oyifunako bese ufunde iinhlokwana ezingaphakathi. Kodwana nawungaqiniseki ukuthi ngiyiphi ingcenye enesihloko esikukarako, khetha Koke bese uqala irhelo leenhloko bewufumane leso esikukarako. Ngaphasi kwesinye nesinye isihloko, uzokufumana iinhlokwana ezitlolwe ngokuveleleko. Ezinye zimimitjho, kuthi ezinye zibe mibuzo. Njengombana ufunda amavesi atlolwe ngokuveleleko alandela isihlokwana, zibuze bewucabangisise ngendlela asekela lokho okukhulunywa ngakho namkha aphendula ngayo umbuzo. Ngezinye iinkhathi, isihloko sizokuhlukaniseka ngeengcenyana ezizokusiza ufunde kuhle isihloko. Kobunye ubujamo, kunamavesi afakiweko atlowe ukuthi “Funda godu.” Amavesi la anokuthileko okukhambisana nesihloko ekukhulunywa ngaso. Kanengi, uzokufumana nesihlokwana esithi “Iimbonelo EziseBhayibhelini Ezingasisiza.” Umutjho wethula iphuzu ekukhulunywa ngalo namkha isifundo esisemtlolweni okhonjiweko. Njengombana ufunda umtlolo, funda umutjho ngombana uzokusiza ufumane iphuzu.

Incwadi le ayikafaki yoke imitlolo emayelana nesihloko ngasinye. Kodwana ikunikela indlela ehle khulu lapho ongathoma khona nawenza irhubhululo. (IzA 2:1-6) Bona ufunde ngokungeneleleko, sebenzisa ama-marginal references nama-study notes afumaneka ku-New World Translation of the Holy Scriptures. Sebenzisa Ithulusi Lokurhubhulula LaboFakazi BakaJehova namkha i-Watch Tower Publications Index bona ufunde ngokungeneleleko ukuthi umtlolo utjho ukuthini nokuthi usebenza njani. Qiniseka ukuthi ufunda lokho okugadangiswe ingasikade ukwenzela bona ukhambisane nehlathululo yamva nje yamaqiniso wemiTlolo.

Kwangathi incwadi le ethi, ImiTlolo Yokuphila KwamaKrestu ingakusiza wembule ukuhlakanipha, ilwazi nokuzwisisa okusemiTloweni eCwengileko. Njengombana uzabe usebenzisa incwadi le, uzokuqiniseka ukuthi “ilizwi lakaZimu liyaphila begodu linamandla.”—Heb 4:12.