Siza Umuntu Ofunda Naye IBhayibheli Akhethe Ukulotjha UJehova

1-2. (a) Kubayini abanye abantu abafundelwa iBhayibheli basaba ukwamukela amaqiniso? (b) Sizokucoca ngani esihlokwenesi?

KGHANI khekwaba nezinto otshwenyeke ngazo ezikwenza usabe ukuba nguFakazi kaJehova? Mhlamunye bewusaba ukuthi abantu osebenza nabo, abangani bakho namkha umndenakho uzokujikela. Kungenzeka bewusaba ukuthi kuzokuba budisi ukulalela uZimu ezintweni zoke. Nakunjalo, uyazwisisa bona kubayini kabanye abantu abafunda iBhayibheli kubudisi bona bathathe isiqunto sokuba boFakazi kaJehova.

² UJesu bekazi bona izinto ezinjalo zingenza umuntu angalotjhi uJehova. (Mat. 13:​20-22) Kodwana akhenge aphelelwe lithemba ngabantu ebebasaba ukumlandela. Kunalokho wafundisa abalandeli bakhe ukuthi basize abantwaba bona (1) babone izinto ezikhandela ituthukwabo, (2) bathuthukise indlela abathanda ngayo uJehova, (3) benze uJehova eze qangi ekuphileni kwabo begodu (4) bahlule iintjhijilo. Singakusebenzisa njani lokho uJesu akutjela abalandeli bakhe njengombana sisebenzisa incwadi ethi, Thabela Ukuphila Ngokungapheliko! bona sisize abantu esifunda nabo iBhayibheli bamukele iqiniso?

SIZA UMUNTU OFUNDA NAYE IBHAYIBHELI AHLULE IINTJHIJILO

3. Khuyini eyenza kwaba budisi ngoNikhodemusi ukulandela uJesu?

³ UNikhodemusi bekambusi oqakathekileko wamaJuda. Kodwana bekunokuthileko okwenza kwaba budisi ukukhetha ukulandela uJesu. Ngemva kweenyanga ezisithandathu kwaphela uJesu athome umsebenzakhe wokutjhumayela, uNikhodemusi wabona ukuthi uJesu umjameli kaZimu. (Jwa. 3:​1, 2) Nanyana kunjalo, uNikhodemusi wakhetha ukuhlangana noJesu emsithelweni ‘ngombana bekasaba amaJuda.’ (Jwa. 7:13; 12:42) Kungenzeka bekasaba bona kunengi okuzomlahlekela nange angakhetha ukuba mlandeli kaJesu.a

4. UJesu wamsiza njani uNikhodemusi wazi bona uZimu ulindele ukuthi enzeni?

⁴ UNikhodemusi bekawazi umThetho kodwana bekatlhoga ukusizwa azi bona uJehova ulindele ukuthi enzeni. UJesu wamsiza njani? UJesu bekazimisele ukwenza isikhathi sokuthi akhulume noNikhodemusi, wakwenza lokho ngitjho nebusuku. UJesu watjela uNikhodemusi ngokukhanyako bona kufuze enzeni: Phenduka ezonweni zakho, bhajadiswa emanzini begodu utjengise ukukholwa eNdodaneni kaZimu.—Jwa. 3:​5, 14-21.

5. Singamsiza njani umuntu esifunda naye iBhayibheli azi bona khuyini ekhandela ituthukwakhe?

⁵ Nange umuntu ofunda iBhayibheli ayizwisisa imiTlolo, kungatlhogeka simsize abone ukuthi khuyini emvimba bona alotjhe uJehova. Umsebenzi namkha ukuphikiswa mndeni kungathikazisa indlela afuna ukulotjha ngayo uJehova. NjengoJesu, ziphe isikhathi sokusiza umuntu ofunda naye iBhayibheli. Ungamumema bona nisele itiye namkha nenze nanyana yini ezokwenza bona nibe nesikhathi ndawonye. Nanizigedle ngendlela leyo, kungenzeka akutjele izinto ezenzeka epilwenakhe begodu uzokubona ubudisi aqalene nabo. Ngemva kwalokho, msize azi ukuthi angawenza njani amatjhuguluko, mkhumbuze nokuthi amatjhuguluko anjalo angawenzi ngombana afuna ukuthabisa wena kodwana ngombana ufuna ukuthabisa uJehova.

6. Ungamsiza njani umuntu ofunda naye iBhayibheli abe nesibindi sokusebenzisa akufundako ekuphileni kwakhe? (1 Korinte 16:13)

⁶ Umuntu ofunda iBhayibheli nakaqinisekako ngokuthi uJehova uzomsiza enze okulungileko, uzokuba nesibindi sokusebenzisa akufundileko ekuphileni kwakhe. (Funda yoku-1 kwebeKorinte 16:13.) Ukuba mfundisi weBhayibheli singakufanisa nokuba ngutitjhere esikolweni. Nawusafunda isikolo, ngimuphi utitjhere ebewumthanda? Kungenzeka ngutitjhere obekakuqinisekisa ukuthi ungakghona ukwenza okulindelekileko. Ngendlela efanako, umfundisi weBhayibheli onekghono akafundisi abantu lokho uZimu afuna bakwenze kwaphela kodwana uyamqinisekisa nangokuthi uJehova uzomsiza enze amatjhuguluko atlhogekako. Thina singakwenza njani lokho?

SIZA UMUNTU OFUNDA NAYE IBHAYIBHELI ATHANDE UJEHOVA

7. UJesu wabasiza njani abantu bona bamthande khulu uJehova?

⁷ UJesu bekazi bona ithando ngoZimu lizokukhuthaza abalandeli bakhe bona bafune ukuphila ngalokho abakufundako. Kanengi bekafundisa abalandeli bakhe izinto ezizobasiza bathuthukise indlela abathanda ngayo uBababo wezulwini. Ngokwesibonelo, wamadanisa uJehova nendoda epha abantwabayo izipho ezihle. (Mat. 7:​9-11) Abanye abalandeli bakaJesu kungenzeka bebanganaye ubaba onethando ngendlela leyo. Cabanga indlela okungenzeka bazizwa ngayo uJesu nakenza umfanekiso ngobaba onethando, owamukela indodanakhe ebeyilahlekile. UJesu wabasiza bazwisisa ukuthi uJehova uyabathanda begodu ufuna ukubasiza.—Luk. 15:​20-24.

8. Ungamsiza njani umuntu ofunda naye iBhayibheli bona athuthukise indlela athanda ngayo uJehova?

⁸ Nawe ungasiza umuntu ofunda naye iBhayibheli athuthukise indlela athanda ngayo uJehova ngokuthi uhlale ukhuluma ngobuntu obuhle bakaJehova nawumfundisako. Kesinye nesinye isahluko, msize ahlobanise enikufundako nethando lakaJehova. Nanifunda ngesihlengo, msize abone indlela esimthinta ngayo yena. (Rom. 5:8; 1 Jwa. 4:10) Umfundi nakazwisisa indlela uJehova amthanda ngayo lokho kungamsiza bona ithando lakhe lithuthuke.—Gal. 2:20.

9. Khuyini eyasiza u-Michael wenza amatjhuguluko ekuphileni kwakhe?

⁹ Akhe sicoce ngo-Micheal we-Indonesia. Wakhulela eqinisweni kodwana akhenge abhajadiswe. Nakaneminyaka eli-18 waya kenye inarha njengombana bekasebenza ukutjhayela amathraga. Ngokukhamba kwesikhathi watjhada kodwana watjhiya umndenakhe bona aragele phambili asebenza. Ngesikhatheso umkakhe nendodakazabo bathoma ukufunda iBhayibheli begodu baphila ngalokhu ebebakufunda. Ngemva kobana ummakhe ahlongakale, u-Michael wabuyela ekhaya bona ayokutlhogomela uyise begodu wathoma ukufunda iBhayibheli. Nakacabanga ngengcenye ethi, “Funda Ngokungeneleleko” ngaphasi kwesifundo 27 encwadini ethi, Thabela Ukuphila Ngokungapheliko, u-Michael wathinteka ihliziyo. Nakacabanga ngobuhlungu uJehova abuzwako nakabona indodanakhe izwa ubuhlungu, u-Michael walila. Wathokoza ngesihlengo begodu lokho kwamkhuthaza bona enza amatjhuguluko bewabhajadiswa.

SIZA UMUNTU OFUNDA NAYE IBHAYIBHELI ENZE UJEHOVA EZE QANGI EKUPHILENI KWAKHE

10. UJesu wenzani bona asize abalandeli bakhe benze amatjhuguluko begodu balotjhe uJehova ngokungeziweko?

¹⁰ Abantu uJesu atjhumayela kibo bebalemuka msinya bona bekanguMesiya kodwana bebatlhoga ukusizwa bazwisise ukuthi nabazakulotjha uJehova, bekufuze bakhuthale ekutjhumayeleni iindaba ezimnandi. Besele kusikhathi u-Andrisi noPitrosi babalandeli bakaJesu ngesikhathi abamema bona basebenze naye isikhathi esizeleko. (Mat. 4:​18, 19) Bona, uJakopo noJwanisi bebasebenza ukuthiya iimfesi begodu irhwebo labo beliphumelela. (Mar. 1:​16-20) Ngesikhathi uPitrosi no-Andrisi “batjhiya amanedabo” kungenzeka benza amahlelo wokutlhogomela imindenabo njengombana balandela uJesu. Khuyini eyabenza bafuna uJehova eze qangi ekuphileni kwabo? UJesu wenza imikarisomraro ukutjengisa abalandeli bakhe ukuthi uJehova angabatlhogomela kinanyana ngibuphi ubujamo. Lokho kwabasiza baqiniseka ngokuthi uJehova uzokuhlala abatlhogomela ikani nabamenza eze qangi kibo.—Funda uLukasi 5:​5-11.

11. Khuyini esingayitjela abantu esifunda nabo iBhayibheli bona siqinise ukukholwa kwabo?

¹¹ Thina asikwazi ukwenza imikarisomraro njengoJesu kodwana singatjela abantu esifunda nabo iBhayibheli ngendlela uJehova asekela ngayo abantu abamenza eze qangi ekuphileni kwabo. Ngokwesibonelo, uyakhumbula ukuthi uJehova wakusiza njani nawuthoma ukuya esifundweni? Kungenzeka kwafuze uhlathululele umqatjhakho ukuthi angeze usakghona ukusebenza isikhathi esingeziweko nange sitjhayisana nesikhathi sesifundo. Hlathululela umuntu ofunda naye iBhayibheli ngendlela uJehova akusiza ngayo wakghona ukumbeka qangi nokuthi lokho kwakuqinisa njani ukukholwa kwakho.

12. (a) Kubayini kufuze simeme abarhuweleli abahlukahlukeneko nasiyokuraga isifundo iBhayibheli? (b) Ungawasebenzisa njani amavidiyo bona ufunde nomuntu ngendlela ephumelelako? Nikela isibonelo.

¹² Kuhle nalokha abafowethu nabodadwethu nabacocela umuntu ofunda naye ukuthi bawenze njani amatjhuguluko wokubeka uJehova qangi. Yeke, mema abafowethu nabodadwethu abanobujamo obuhlukahlukeneko nawufundela umuntu iBhayibheli. Babuze ukuthi bawafumene njani amaqiniso nokuthi khuyini abayenzileko bona ukulotjha uJehova kuze qangi ekuphileni kwabo. Ngemva kwalokho, yenza isikhathi sokuthi ubukele nomuntu ofunda naye iBhayibheli amavidiyo angaphasi kwesihloko esithi, “Funda Ngokungeneleleko” ngaphasi kwengcenye ethi, “Hlola Okungenzasi” encwadini ethi, Thabela Ukuphila Ngokungapheliko! Ngokwesibonelo, nanifunda isahluko 37 benibukele nividiyo ethi UJehova Uzositlhogomela, cocani ngevidiyo begodu usize umuntu ofunda naye iBhayibheli abone ukuthi uJehova uzomsiza nakambeka qangi ekuphileni kwakhe.

SIZA UMUNTU OFUNDA NAYE AZI BONA KUFUZE ENZENI ABANYE NABAMPHIKISAKO

13. UJesu wabalungiselela njani abalandeli bakhe isikhathi sokuphikiswa?

¹³ UJesu wabatjela kanengi abalandeli bakhe ukuthi bazokuphikiswa babantu, ngitjho neenhlobo zabo bezizobaphikisa. (Mat. 5:11; 10:​22, 36) Ngaphambi kobana uJesu ahlongakale, watjela abalandeli bakhe ukuthi kungenzeka babulawe ngebanga lokulotjha uJehova. (Mat. 24:9; Jwa. 15:20; 16:2) Wathi kufuze batjheje nabasemsebenzini wokutjhumayela. Wathi bangaphikisani nabantu abasola izinto abazikholelwako, wathi batjheje izinto abazikhulumako nabazenzako.

14. Singamsiza njani umuntu esifunda naye iBhayibheli azilungiselele ukuphikiswa? (2 Thimothi 3:12)

¹⁴ Nathi singalingisa uJesu ngokuthi sihlathululele abantu esifunda nabo iBhayibheli bona abanye abantu, mhlamunye abasebenza nabo, abangani, ngitjho nemindenabo bangatjho namkha benze izinto ngebanga lokuthi bafunda iBhayibheli. (Funda yesi-2 kaThimothi 3:12.) Abanye bangahlekisa ngendlela esele baphila ngayo. Kuthi abanye, okungahlanganisa neenhlobo zabo bangaphikisana nezinto ezisekelwe eBhayibhelini abazikholelwako. Kuhle ukobana sikhulume ngokuphikiswa zisuka zibekwa. Nasenza njalo, umuntu esifunda naye iBhayibheli angekhe arareke nakaphikiswako, kunalokho uzokwazi bona kufuze enzeni.

15. Khuyini engasiza abantu esifunda nabo bakghone ukuqalana nokuphikiswa mndeni?

¹⁵ Nange umuntu ofunda naye aphikiswa mndenakhe, msize acabange ngokuthi kungenzeka kubayini iinhlobo zakhe ziphatheke kabuhlungu. Kungenzeka zicabanga bona ukhohlisiwe namkha kungenzeka azibathandi aboFakazi bakaJehova. Ngitjho nezinye iinhlobo zakaJesu bezingakathabi ngomsebenzi ebekawenza. (Mar. 3:21; Jwa. 7:5) Fundisa umuntu ofunda naye bona abekezele begodu abe nomusa nakakhuluma namalunga womndenakhe.

16. Singamfundisa njani umuntu esifunda naye iBhayibheli bona abe nomusa begodu alinganisele nakakhuluma nabantu ngeBhayibheli?

¹⁶ Ngitjho nalokha umndeni utjengisa bona uyazithanda izinto obatjela zona ngeBhayibheli, umuntu ofundako uzabe enza kuhle ngokuthi angafuni ukuwuhlathululela zoke izinto azaziko ngeBhayibheli. Nakangenza njalo, umndeni ungazizwa uhlangahlangene begodu kungenzeka ungasafuni ukukhuluma ngeBhayibheli naye esikhathini esizako. Yeke khuthaza umuntu ofunda naye bona ahlathulule ngendlela elula begodu angasolo akhuluma isikhathi eside, ukwenzela bona kube nethuba lokukhuluma esikhathini esizako. (Kol. 4:6) Mhlamunye angakhuthaza iinhlobo zakhe bona zivakatjhele i-jw.org. Lokho kuzokwenza bona zikghone ukufunda okungeziweko ngaboFakazi bakaJehova ngesikhathi sazo.

17. Ungambandula njani umuntu ofunda naye bona aphendule imibuzo abanye abanayo ngaboFakazi bakaJehova? (Qala nesithombe.)

¹⁷ Ungasebenzisa iinhloko ezimlandelande eziku-jw.org ngaphasi kwesihloko esithi, “Okubuzwako NgaboFakazi BakaJehova” ukusiza umuntu ofunda naye azilungiselele ukuphendula imibuzo okungenzeka ibuzwe ziinhlobo nabantu asebenza nabo. (2 Thim. 2:​24, 25) Ngemva kwesifundo esinye nesinye, buyekeza ingcenye ethi, “Abanye Abantu Bathi” encwadini ethi, Thabela Ukuphila Okungapheliko! Mkhuthaze bona aphrakthize ukuphendula ngamezwakhe. Nakutlhogekako msize afumane iindlela ezingcono zokuhlathulula akukholelwako. Lokho kuzomsiza akuhlathulule ngesibindi.

18. Ungamkhuthaza njani umuntu ofunda naye bona atjhumayele nebandla? (Matewu 10:27)

¹⁸ UJesu watjela abalandeli bakhe bona batjhumayele iindaba ezimnandi tjhatjhalazi. (Funda uMatewu 10:27.) Umuntu ofunda iBhayibheli nakathoma ukuhlathulula ukukholwa kwakhe, uthoma ukuthembela kuJehova. Ungamsiza njani bona azenzele umnqopho lowo? Nakwenziwa isaziso sejima lokutjhumayela ebandleni, mkhuthaze bona acabange ngokuthi kufuze enzeni bona athome ukutjhumayela nebandla. Hlathulula bona kubayini abanye bakufumana kubulula ukuthoma ngeenkhathi zamajima anjengalawo. Omunye umnqopho angazibekela wona kukuthi athome ukubeka iinkulumo emhlanganweni waphakathi neveke. Nakazilungiselela ukubeka iinkulumo, uzokufunda ukuhlathulula akukholelwako ngcono.

TJENGISA UMUNTU OFUNDA NAYE BONA UYAKHOLWA UKUTHI UFUNA UKUTHABISA UJEHOVA

19. UJesu watjengisa njani ukuthi uyakholwa bona abalandeli bakhe bafuna ukuthabisa uJehova begodu thina singamlingisa njani?

¹⁹ Ngaphambi kobana uJesu abuyele ezulwini, watjela abalandeli bakhe bona ngelinye ilanga bazokuhlangana naye godu. Bebangazwisisi ukuthi uJesu bekakhuluma ngokuhlangana naye ezulwini. Nanyana kunjalo, uJesu wadzimelela ekuthembekeni kwabo, ingasi ezintweni ebebangazizwisisi. (Jwa. 14:​1-5, 8) Bekazi ukuthi batlhoga isikhathi bona bazwisise ezinye izinto, izinto ezinjengethemba lezulwini. (Jwa. 16:12) Nathi singenza njengoJesu, siqinisekise abantu esifunda nabo ngokuthi siyazi bona bafuna ukuthabisa uJehova.

20. Udadwethu we-Malawi watjengisa njani bona uyazi ukuthi umuntu afunda naye ufuna ukuthabisa uJehova?

²⁰ Sihlala sinethemba lokuthi abantu esifunda nabo iBhayibheli bafuna ukuthabisa uJehova. Ngokwesibonelo, cabanga ngodadwethu we-Malawi u-Chifundo. Wathoma ukufunda nodade oMkatolika ibizo lakhe elingu-Alinafe incwadi ethi, Thabela Ukuphila Ngokungapheliko! Ngemva kokucoca ngesifundo 14, u-Chifundo wabuza umuntu afunda naye bona ucabangani ngokusebenzisa iinthombe nakalotjhako. Ihliziyo ka-Alinafe beyibuhlungu, waphendula wathi, “Umuntu nomuntu kufuze azikhethele!” Ngemva kwekulumiswano leyo u-Chifundo wacabanga bona u-Alinafe angeze asafuna ukufunda iBhayibheli. Kodwana waragela phambili ngesineke afunda no-Alinafe, anethemba lokuthi njengombana isikhathi sikhamba, uzokuzwisisa ukuthi kubayini kukumbi ukulotjha iinthombe. Ngemva kweenyanga ezimbalwa, u-Chifundo wambuza umbuzo osesifundweni 34: “Ukufunda kwakho iBhayibheli ngoZimu weqiniso uJehova kukusize njani bekube nje?” U-Chifundo uthi u-Alinafe waphendula wathi, “Wakhuluma ngezinto ezinengi ezihle, enye yazo wathi, aboFakazi abahlanganyeli ezintweni iBhayibheli elithi azikalungi.” Ngemva kwalokho, u-Alinafe walisa ukulotjha iinthombe begodu walungela ukubhajadiswa.

21. Ungamsiza njani umuntu ofunda naye iBhayibheli bona athathe isiqunto sokulotjha uJehova?

²¹ Ngitjho nanyana uJehova kunguye “okhulisako” sinengcenye ekusizeni abantu esifunda nabo iBhayibheli bathuthuke. (1 Kor. 3:7) Senza okungaphezu kokufundisa umuntu lokho uZimu afuna sikwenze. Simsiza akhe ithando elidephileko ngoJehova. Simkhuthaza nangokuthi atjengise ithando lakhe ngokubeka uJehova qangi ekuphileni kwakhe. Sibuye simfundise ukuthi angathembela njani kuJehova nakaqalene nokuphikiswa. Ngokumtjengisa bona siyamthemba ukuthi ufuna ukuthabisa uJehova, simsiza aqiniseke bona naye angakghona ukuphila ngeenkambiso zakaJehova begodu aphilele iqiniso.