Imibuzo Evela Ebafundini
Umsebenzi wokutjhumayela uzokuphela nini?
UJesu wathi, “Iindaba ezimnandezi zomBuso zizokutjhunyayelwa kilo loke iphasi bona kube bufakazi kizo zoke iintjhaba, ngemva kwalokho isiphelo sizokufika.” (Mat. 24:14) Ibizo lisiGirigi ngesiNdebele elitjhugululwe ngokuthi “isiphelo” evesini 6 nevesini 13 lithi-teʹlos. Litjho ukuphela kwesiphelo sephasi lakaSathana e-Arimagedoni. (IsAm. 16:14, 16) Yeke, sizokutjhumayela iindaba ezimnandi bekube ngaphambi kokufika kokuphela kwesiphelo. Lokho kulungisa indlela ebesizwisisa ngayo ngaphambilini.
Ngaphambilini, besithi sizokulisa ukutjhumayela iindaba ezimnandi isizi elikhulu nalithoma ukutjhabalalisa iBhabhiloni eliKhulu. (IsAm. 17:3, 5, 15, 16) Sikholwa bona lokhu kuzabe kutjho ukuphela okungokomfanekiso ‘komnyaka kaJehova womusa.’ (Isa. 61:2) Sikholwa nokuthi abazokusinda ngesizi elikhulu, bazokutjengisa ukuthembeka kwabo kuJehova ngaphambi kwesenzakalwesi. Sibamadanisa namaJuda asinda ekutjhatjalalisweni kweJerusalema ngo-607 B.C.E. Abantwaba batshwayelwa ukusinda ngaphambi kokutjhatjalaliswa kweJerusalema ngombana bebalotjha uJehova begodu bahloye ukukhohlakala. (Hez. 5:11; 9:4) Kodwana ukumadanisokho akukhambelani namezwi kaJesu akuMatewu 24:14, atjengisa bona abantu bazokuba nethuba lokwamukela iindaba ezimnandi bekube kungaphambi kokuphela kwesiphelo e-Arimagedoni.
Indlela etja esele sizwisisa ngayo uMatewu 24:14 ilungisa nendlela esizwisisa ngayo umlayezo onjengesinanja obikezelwa kusAmbulo 16:21. Ukurhubhulula okungeziweko kutjengise bona imitlolo le iyakhambisana. Sikutjho ngaliphi lokho? Ipendulo isekutheni abantu basabela njani emlayezweni womBuso. ‘Kilabo abasindisiweko,’ umpostoli uPowula watlola umlayezo omnandi, ‘iliphunga lokuphila.’ Kodwana emanabeni kaZimu, ziindaba ezimbi, ‘liphunga lokufa.’ (2 Kor. 2:15, 16) Bawuhloyile umlayezo womBuso ngombana uveza bona iphasi abalithandako likhohlakele, libuswa nguSathana begodu lizokutjhatjalaliswa kungasikade.—Jwa. 7:7; 1 Jwa. 2:17; 5:19.
Tjheja nokuthi isinanja esingokomfanekiso sizokuba ‘sikhulu ngokurarako.’ Lokho kungatjho bona umsebenzi wokutjhumayela uzokuba ngonqophileko okutjho bona igama lakaJehova lizokwenziwa laziwe kunanini ngaphambilini. (Hez. 39:7) Ngemva kokutjhatjalaliswa kweBhabhiloni eliKhulu, kghani abanye bazowuthanda umlayezo, njengombana bangathanda iphunga elinuka kamnandi? Kungenzeka. Mhlamunye bazokukhumbula bona kuphele iminyaka eminengi aboFakazi bakaJehova batjhumayela umlayezo wokutjhatjalaliswa kwekolo yamala.
Madanisa lokho okwenzeka eGibhide ngemva kweeMbetho eziliTjhumi. Ngemva kokuthi uJehova ‘[akhuphe] isahlulelo kibo boke abozimu beGibhide “Isiqubuthu sabantu bayo yoke imihlobo” salandela abantu bakhe.’ (Eks. 12:12, 37, 38) Abantwaba kungenzeka batjhuguluka nababona ukuba liqiniso kweenyeleliso zakaMosi zeMbetho eziliTjhumi.
Nanyana ngubani ophendukela kuJehova ngemva kokutjhatjalaliswa kweBhabhiloni elikhulu uzokuba nelungelo lokwenzela abafowabo kaJesu abasesesephasini okuhle. (Mat. 25:34-36, 40) Iye khona ithubelo lizokuphela nakusele isikhathi esincani ngaphambi kokuthoma kwe-Arimagedoni, ngesikhathi abaseleko abazesiweko bafumana umtlomelabo wezulwini.
Indleletjha esizwisisa ngayo le iveza ithando lakaJehova elikhulu nomusakhe. Kwambala ‘akafisi ukuthi namunye atjhabalale kodwana ufisa bona boke batjhuguluke.’—2 Pit. 3:9.