1925​—Iminyaka Elikhulu Edlulileko

UKUHLEHLISWA KWENTO ELINDELWEKO

Abafundi beBhayibheli abanengi bebalindele bona ngo-1925 kuzokubuyiselwa iPharadesi ephasini. Kubayini? Umfowethu u-Albert Schroeder ngokukhamba kwesikhathi owaba lilunga lesiHlopho esiBusako wathi, “Besicabanga bona ngesikhatheso abalandeli bakaKrestu abazesiweko bazokutjhinga ezulwini, bayokuba yingcenye yomBuso begodu amadoda wakade ebekathembekile njengo-Abrahama, uDavida namanye azokuvuswa kwabahlongakeleko abe makhosi, abuse aborhulumende bephasini njengengcenye yombuso kaZimu. Njengombana umnyaka ukhamba begodu izintwezo zingenzeki, abanye badana begodu kuyazwisiseka bona kubayini bazizwa njalo.”—IzA. 13:12.

Ngitjho nanyana bebadanile, abafundi beBhayibheli abanengi baragela phambili batjhumayela. Batjheja bona ukutjhumayela ngoJehova yinto eqakatheke ukuzidlula zoke. Ngokwesibonelo, cabanga ngomsebenzi abawenzileko wokurhatjha iindaba ezimnandi ephasini loke.

ABOFAKAZI BAKHA IMIRHATJHO ENGEZIWEKO

Ngo-1924 abantu abanengi bebalalela umrhatjho i-WBBR. Yeke ngo-1925 abafundi beBhayibheli bakha omunye umrhatjho omkhulu, nje bawakha hlanu kwe-Chicago, e-Illinois. Umrhatjho lo bewubizwa ngokuthi yi-WORD. U-Ralph Leffler obekangunjiniyera wemirhatjho uthi, “Ebusuku obumakhaza i-WORD beyilalelwa kude neduze.” Ngokwesibonelo umndeni ohlala kude ngamakhilomitha azii-5 000 e-Pilot Station, e-Alaska walalela elinye lamahlelo wokuthoma. Ngemva kokulalela, umndeni lo watlolela abasebenza emrhatjhweni incwadi, ubathokoza ngokuwusiza wazi okungeziweko ngoZimu nangeBhayibheli.

I-The Watch Tower ka-Disemba 1, 1925 yahlathulula bona kubayini abantu abanengi bakghona ukulalela ihlelweli yathi, “I-WORD ngenye yeendawo zokurhatjhela ezinamandla khulu e-United States.” Abantu bakghona ukulalela bangePumalanga namkha ngeTjingalanga yamalwandle we-United States. Abantu abanengi abangakhenge bezwe iqiniso, bakuthabele ukulizwa ngokuthi balilalele emrhatjhweni.

Ngaso isikhatheso, abaFundi abanengi beBhayibheli bebafuna ukusebenzisa umrhatjho ukutjhumayela iindaba ezimnandi e-Canada. Ngo-1924 kwakhiwa indawo yokurhatjhela i-CHUC e-Saskatoon, e-Saskatchewan. Bekumrhatjho wokuthoma e-Canada okhuluma ngekolo. Ngo-1925 kwafuze bafumane indawo ekudlwana yokurhatjhela. Yeke i-Watch Tower Society yayithatha indawo yokurhatjhela le, yafudusela iintlabagelo zokurhatjhela e-Regent Building abayithengako, ebekuyitiyetha yakade e-Saskatoon, bayilungisa bebarhatjhela kiyo.

Siyathokoza ngendawo yokurhatjhela le ngombana ngebanga layo, abantu abahlala emadorobheni amancani neendaweni ezisemathresteni e-Saskatchewan bezwa iindaba ezimnandi kokuthoma. Ngokwesibonelo, uKosazana Graham obekahlala kwelinye idorobho elikude, ngemva kokulalela umrhatjho wafaka isibawo sencwadi esekelwe eBhayibhelini. Umfowethu u-George Naish uthi, “Isibawo sakhe esithi ‘Sifundisa!’ sazwakala sirhabekile, kangangobana samthumela ama-Studies in the Scriptures woke.” Kungasikade ukosazana Graham warhatjha umlayezwethu ngokungeziweko.

UKUHLATHULULWA KWESIKUKHOLELWAKO

I-The Watch Tower kaMatjhi 1, 1925 beyinesihloko esiqakatheke khulu esithi, “Birth of the Nation.” Kubayini isihlokwesi besiqakathekile? AbaFundi beBhayibheli bebazi bona uSathana ubusa amadimoni, ikolo yamala, aborhulumende nezentengiselwano zephaseli. Lezi zizinto ezilawulwa nguye. Kodwana “inceku ethembekileko nehlakaniphileko” isebenzise isihlokwesi ukusiza abafowethu nabodadwethu bona balemuke ukuthi uJehova naye unehlangano, ihlanganwakhe ihlukile keyakaSathana begodu ilwisana nayo. (Mat. 24:45) Ukungenzelela kilokho inceku yahlathulula bona umBuso kaZimu waba khona ngo-1914 nokuthi ngawo umnyaka lo, uSathana namadimonakhe baqothwa ezulwini baba sephasini.—IsAm. 12:​7-9.

Kwaba budisi kwabanye ukwamukela ifundiso le. Isihlokwesi sathi, “Nangabe kunabafundi be-Watch Tower abangavumelani nalokhu okuhlathululwa la, sihlongoza bona behlise umoya begodu balinde uJehova, bahlala banehliziyo emsulwa.”

U-Tom Eyre, obekayi-colporteur (nje ebizwa ngokuthi liphayona) le-Britain wahlathulula bona abaFundi beBhayibheli abanengi bazizwa njani ngesihlokwesi: “Ukuhlathululwa kwesAmbulo 12 kwabathabisa abafowethu nabodadwethu. Sathi nasizwa bona umBuso sele ujanyisiwe ezulwini, sazimisela khulu ukutjela abanye iindaba ezimnandi. Kwasikhuthaza bona sitjhumayele khulu begodu kwasisiza sabona ukuthi uJehova uzokwenza izinto ezihle esikhathini esizako.”

UKUTJHUMAYELA NGOJEHOVA

Namhlanjesi aboFakazi bakaJehova bawajayele amezwi aku-Isaya 43:10 athi, “‘Nibofakazi bami,’ kutjho uJehova, ‘Incekwami engiyikhethileko.’” Nanyana kunjalo, ngaphambi kwaka-1925 umtlolo lo bekungakhulunywa ngawo khulu eencwadini zethu. Kodwana lokho kwatjhuguluka. Ngo-1925 i-The Watch Tower yacoca ngo-Isaya 43:​10, 12 kibomagazini abali-11!

Ngo-1925 abaFundi beBhayibheli baya emhlanganweni e-Indianapolis, e-Indiana. Emlayezweni ebewutlolwe ehlelweni lomhlangano u-Joseph F. Rutherford wathi, “Size emhlanganweni lo bona sifumane . . . amandla eKosini ukuthi sibuyele esimini sinomdlandla wokuba bofakazi.” Woke amalanga womhlangano ebebakhona bebakhuthazwa bona basebenzise elinye nelinye ithuba ukufakaza ngoJehova.

NgoMgqibelo Arhostosi 29 uMfowethu u-Rutherford wanikela ikulumo enesihloko esithi, “Ukuthatha Amagadango.” Ekulumwenakhe wagandelela ukuqakatheka kokufakaza wathi, “UJehova utjela abantu bakhe bona . . . , ‘Nibofakazi bami. . . bona nginguZimu.’ Yeke bafumana umlayezo onqophileko, ovezwa ngokukhanyako, ‘Lungiselani abantu iindlela.’ Abekho abanye ephasini abangalungisa indlela yabantu ngaphandle [kwabantu bakhe], abanomoya weKosi begodu ababofakazi bakhe.”—Isa. 43:12; 62:10.

Ngemva kwekulumo, uMfowethu u-Rutherford wafunda incwadi ebizwa ngokuthi, “Umlayezo Wethemba.” Boke ebebasemhlanganweni bavumelana nomlayezo lo, ebewuthi umBuso kaZimu kuphela komBuso osipha ithemba lamambala lokufumana “iimbusiso zokuthula, ipumelelo, ipilwehle, ukuphila, ikululeko nethabo elizokuhlala likhona.” Ngokukhamba kwesikhathi isivumelwanesi satjhugululelwa emalimini ambalwa begodu sagadangiselwa emaphetjhaneni. Amaphetjhana angaba ziingidi ezima-40 anikelwa abantu.

Kwadlula iminyaka embalwa abaFundi beBhayibheli bangakatjhugululi ibizo labo bona babe boFakazi bakaJehova. Kodwana besele bathoma ukuzwisisa bona kuqakatheke kangangani bona bafakaze ngoJehova.

ABAFUNDI BEBHAYIBHELI BATHOMA UKUBUYELA EBANTWINI ABATHANDA IINDABA EZIMNANDI

Njengombana isibalo sabaFundi beBhayibheli besanda ephasini loke, ihlangano yabakhuthaza bona bangakhambisi iincwadi kwaphela kodwana babuyele ebantwini abathanda iindaba ezimnandi. Ngemva kwejima lokukhambisa iphetjhana elithi Umlayezo Wethemba i-Bulletina yathi, “Buyelani emizini eningakatjhiyi iincwadi khona kodwana lapha nitjhiye kiyo iphetjhana elithi, Umlayezo Wethemba.”

I-Bulletin kaJanabari 1925 beyinomlayezo wabaFundi beBhayibheli be-Plano, e-Texas othi, “Sitjheje bona isimu esitjhumayele kiyo iinkhathi ezimbalwa ezidlulileko, ingcono kunesimu esithoma ukutjhumayela kiyo. Esiminethu, bekunedorobha elincani esitjhumayele kahlanu kilo eminyakeni elitjhumi edlulileko. . . . Kungasikade uDadwethu u-Hendrix nomma batjhumayela kilo godu, begodu bakhambisa iincwadi ezinengi ukudlula nini ngaphambilini.”

E-Panama, i-colporteur lathi, “Abantu abanengi abangakhenge bafune ukulalela ekuthomeni nangibavakatjhelako, batjhugulukile nasele ngibuyela kwesibili namkha kwesithathu. Umnyaka odlulileko, ngisebenzise isikhathi sami esinengi, ukubuyela ebantwini engibatjhumayeze esikhathini esidlulileko begodu umphumela ube muhle khulu.”

UKUQALA ENGOMUSWENI

Nakuphela umnyaka ka-1925 uMfowethu u-Rutherford watlolela amaphayona, ahlathulula umsebenzi owenziweko nakutjhunyayelwako ngomnyaka loyo nokuthi kufuze enzeni ngokulandelako. Wathi, “Emnyakeni odlulileko niduduze abantu abanengi abadanileko. Umsebenzi lo unithabisile . . . Emnyakeni ozako nizokufumana ithuba lokufakaza ngoZimu nombuswakhe nitjengise abantu bakhe indlela. . . . Asirageleni phambili sisoke siculela phezulu, sidumisa uZimethu neKosethu.”

Njengombana umnyaka ka-1925 besele uzokuphela, abafowethu bebenza amahlelo wokukhulisa imakhiwo ye-Brooklyn. Ngo-1926 bebazokuthoma ihlelo lokwakha elikhulu ihlangano ekhe yalenza.