Amalunga Amabili Amatjha WesiHlopha EsiBusako
NGO-OKTOBA 5, 2024, kwenziwa isaziso esikhethekileko emhlanganweni waqobe mnyaka, uMfowethu u-Jody Jedele no-Jacob Rumph bakhethwe bona babe malunga wesiHlopha esiBusako saboFakazi bakaJehova. Bobabili abafowethwaba sele balotjhe uJehova iminyaka eminengi.
U-Jody Jedele nomkakhe u-Damaris
UMfowethu u-Jedele wabelethelwa e-Missouri, e-U.S.A begodu wakhuliselwa eqinisweni. Umndenakhe bewuhlala lapha kunaboFakazi bakaJehova abambalwa khona. Kungebangelo ahlangana nabafowethu nabodadwethu abavela eenzindeni ezihlukahlukeneko, ebebavakatjha bona bazokusiza ukutjhumayela iindaba ezimnandi endaweni le. Ithando nebumbano ebabenalo lamthinta khulu. Wabhajadiswa asese mutjha ngo-Oktoba 15, 1983. Bekakuthanda ukutjhumayela, ngemva kokuqeda isikolo samabanga ephezulu, wathoma ukuphayona isikhathi esizeleko ngoSeptemba 1989.
UMfowethu u-Jedele nakasese mncani ababelethi bakhe bebavame ukuyisa yena nodadwabo e-Bethel. Lokho kwakhuthaza abantwanaba bona bazibekele umnqopho wokuyokusebenza e-Bethel begodu bobabili bawufikelela umnqopho loyo. UMfowethu u-Jedele wafika e-Bethel ye-Wallkill ngoSeptemba 1990. Nakafikako bekasebenza eMnyangweni wokuHlwengisa, ngokukhamba kwesikhathi wasebenza eMnyangweni wezamaPhilo.
Ngesikhatheso, amabandla eseduze akhuluma ilimi lesi-Spanish bekakhula begodu atlhoga abazalwana. Yeke uMfowethu u-Jedele wahlanganyela nelinye lawo begodu wathoma ukufunda isi-Spanish. Kungasi kade, wahlangana no-Damaris, udade ebekaphayona esigodini sinye naye. Ngokukhamba kwesikhathi batjhada, u-Damaris wayokusebenza naye e-Bethel.
Ngo-2005 bakhamba e-Bethel bayokutlhogomela ababelethi babo. Ngesikhatheso bebamaphayona wesikhathi esizeleko. UMfowethu u-Jedele bekasiza ukufundisa esiKolweni samaPhayona, asiza naku-local Hospital Liaison Committee asiza naku-Regional Building Committee.
Ngo-2013 uMfowethu noDadwethu uJedele bamenywa bona bayokusebenza e-Bethel godu kodwana nje besele base-Bethel ye-Warwick, emnyangweni wezokwakha. Ngaphambi kwesikhatheso bakhe basebenza e-Bethel ye-Patterson nakeye-Wallkill. UMfowethu u-Jedele ukhewasebenza e-Local Design/Construction Department naku-Hospital Information Services. NgoMatjhi 2023 wakhethwa bona abe msizi we-Service Committee. Nakaqala emva ezabelweni zakhe uthi, “Nawufumane izabelo ezitjha, ngezinye iinkhathi ungazizwa uthukiwe. Kodwana kulapho kufuze ukhumbule ukuthembela kuJehova khona ngombana nguye obangela bona kwenzeke.”
U-Jacob Rumph nomkakhe u-Inga
UMfowethu u-Rumph wabelethelwa e-California, e-U.S.A. Nakasakhulako ummakhe bekangasatjhumayeli begodu angasaya nesifundweni kodwana walinga ukumfundisa iqiniso leBhayibheli. Qobe mnyaka bekavakatjhela ugogwakhe, onguFakazi kaJehova othembekileko. Wamsiza bona athande iqiniso, nakaneminyaka eli-13 wabawa ukufundelwa iBhayibheli. Wabhajadiswa ngoSeptemba 27, 1992 asese mumuntu omutjha. Kuyathabisa ukuthi ummakhe naye wathoma ukuya esimini nesifundweni godu begodu ithando lakayise nabantwana bekhabo ngoJehova lathuthuka begodu babhajadiswa.
Nakasese mutjha, uMfowethu u-Rumph wabona ukuthi amaphayona athabe kangangani. Yeke ngemva kokuqeda isikolo samabanga aphezulu wathoma ukuphayona, ngoSeptemba 1995. Ngo-2000 wafudukela e-Ecuador bona ayokusiza lapha kunetlhogeko yabatjhumayeli khona. Wahlangana no-Inga lapho, udade oliphayona ovela e-Canada, ngokukhamba kwesikhathi batjhada. Ngemva kokutjhada, basiza edorobheni elincani e-Ecuador, bekunabatjhumayeli abancani lapho. Namhlanjesi linebandla elithuthukako tle!
Ngokukhamba kwesikhathi uMfowethu noDadwethu u-Rumph babelwa bona babe maphayona akhethekileko, ngemva kwalokho baba bajikelezi. Ngo-2011 bamenywa esikolweni se-Gilead, iklasi 132. Ngemva kwe-Gilead balotjha eenarheni ezihlanu begodu bathabela iinkonzo ezihlukahlukeneko ezihlanganisa ukusebenza e-Bethel, ukuba ziinthunywa zevangeli nokujikeleza. UMfowethu u-Rumph waba nelungelo lokufundisa EsiKolweni SabaTjhumayeli BeVangeli.
Ngebanga lesindabelaphi i-COVID-19, uMfowethu noDadwethu u-Rumph babuyela e-United States. Bamenywa e-Bethel ye-Wallkill, uMfowethu u-Rumph wabandulwa eMnyangweni weKonzo. Ngokukhamba kwesikhathi babelwa egatjeni le-Ecuador godu, lapho uMfowethu u-Rumph waba lilunga leKomidi yeGatja. Ngo-2023 bathunyelwa e-Bethel ye-Warwick. NgoJanabari 2024 uMfowethu u-Rumph wakhethwa bona abe msizi weKomidi yeKonzo. Nakacabanga ngalapha alotjhe khona bekube nje uthi, “Okwenza isabelo sithabise akuyisindawo olotjha kiyo kodwana babantu olotjha nabo.”
Siyabathanda abafowethu abasebenza budisaba begodu ‘siragela phambili siwaphatha ngethando amadoda anjalo.’—Flp. 2:29.