Uvusa Umntazanyana Ohlongakeleko!

UJayirosi uyabona ukuthi uJesu umlaphile umfazi obekaphopha iingazi. Kutjho ukuthi uJesu angayisiza indodakazakhe, nanyana ngakelinye ihlangothi acabanga ukuthi ‘njenganje indodakazakhe kungenzeka seyihlongakele.’ (Matewu 9:18) Kghani ikhona into uJesu angayenza?

UJesu nakasakhuluma nomfazi amlaphileko, kufika amadoda athileko avela emzini kaJayirosi, athi kuye: “Indodakazakho ihlongakele!” Angezelela athi: “Usamtshwenyelani uMfundisi?”​—Markosi 5:35.

Ziindaba ezibuhlungu khulu lezo! Indoda le, ehlonitjhwa kangaka emphakathini, iphelelwa mamandla. Indodakazayo ekukuphela kwayo ihlongakele. Nokho, uJesu uyakuzwa lokho abakutjhoko, begodu ukhuthaza uJayirosi uthi: “Ungasabi, kholwa nje kwaphela.”​—­Markosi 5:36.

UJesu ukhamba noJayirosi kwakhe. Nabafi­kako, bafumana isiphithiphithi. Abantu ababuthene lapho bakhihla isililo esikhulu begodu bayazibetha ngebanga lesizi. UJesu ungena ngaphakathi bese ukhuluma amezwi ararako uthi: “Umntwana lo akakahlongakali kodwana ulele.” (Markosi 5:39) Nabezwa amezwakhe, abantu bayamhleka. Bayazi ukuthi umntazanyana lo uhlongakele kwamambala. Nokho, uJesu uzokusebenzisa amandla awathole kuZimu, ukubatjengisa ukuthi uyakghona ukuvusa umuntu ohlongakeleko, ngasuthi uvusa umuntu olele ubuthongo obukhulu.

Nje-ke uJesu ukhuphela boke abantu ngaphandle bese kusala uPitrosi, uJakopo, uJwanisi nababelethi bomntazanyana ohlongakeleko. UJesu ukhamba nabo baya ngapha kulele khona umntazana. Ubamba isandla sakhe, uthi: “ ‘Thalitha kumi,’ okutjho ukuthi, ‘Mntazanyana, ngithi kuwe, vuka!’ ” (Markosi 5:41) Khonokho, uyavuka bewuthoma nokukhamba. Cabanga ukuthi uJayirosi nomkakhe bathaba kangangani nababona lokhu! Ukutjengisa ukuthi umntazana lo uyaphila kwamambala, uJesu ubayala bona bamnikele ukudla.

UJesu utjela ababelethi bomntazana lo bona bangakhulumi tjhatjhalazi ngalokho abenzele khona, njengombana bekatjela abanye akhe wabalapha. Nokho, ababelethaba nabanye abantu abathabileko bayahluleka ukuzibamba, barhatjha iindabezi “kiso soke isifundeso.” (Matewu 9:26) Kghani wena bewungathula ubone umuntu omthandako ohlongakeleko avuswa? Kukwesibili imiTlolo isitjela ukuthi uJesu uvusa umuntu ohlongakeleko.