Ungazuza Njani Ngokufunda IBhayibheli?

Khewazizwa uphelelwa mamandla nawucabanga ngokuthoma umsebenzi omkhulu? Bona uwenze ube lula umsebenzi loyo, mhlamunye ungawuhlukanisa uwenze kancanikancani. Kunjalo nokufunda iBhayibheli. Ungazibuza, ‘Ngizokuthomaphi?’ Esifundwenesi, sizokufunda ngezinto ezilula ezingakusiza uthande ukufunda iBhayibheli.

1. Kubayini kufuze sifunde iBhayibheli qobe?

Umuntu ohlala afunda iBhayibheli namkha ‘umthetho kaJehova,’ uzokuthaba begodu uzokuphumelela. (Funda IRhubo 1:1-3.) Bona uthome, linga ukulifunda imizuzu embalwa qobe langa. Njengombana ujayelana neliZwi lakaZimu uzokuthabela ukufunda iBhayibheli.

2. Yini engakusiza uzuze nawufunda iBhayibheli?

Bona sizuze nasifunda iBhayibheli, kufuze sijame kancani begodu sicabange ngalokho esikufundako. Kufuze silifunde begodu ‘sizindle’ ngalo. (Jotjhuwa 1:8, umtlolo ongenzasi) Njengombana ufunda, zibuze imibuzo enjengale: ‘Lokhu kungitjelani ngoJehova uZimu? Ngingakusebenzisa njani lokhu ekuphileni kwami? Ngingawasebenzisa njani amavesi la bona ngisize abanye?’

3. Ungasenza njani isikhathi sokufunda iBhayibheli?

Kghani ukufumana kubudisi ukwenza isikhathi sokufunda iBhayibheli? Inengi lethu likufumana kubudisi. Linga ‘ukusisebenzisa kuhle isikhathi sakho.’ (Efesu 5:16) Lokhu ungakwenza ngokubeka isikhathi sokufunda iBhayibheli qobe langa. Abanye abantu benza isikhathi sokufunda iBhayibheli ekuseni khulu. Abanye bakhetha emini, mhlamunye ngesikhathi sabo sokudla. Abanye bakhethe ukufunda iBhayibheli ebusuku ngaphambi kokulala. Wena ngisiphi isikhathi esingakusebenzela?

FUNDA NGOKUNGENELELEKO

4. Indlela ongathabela ngayo ukufunda iBhayibheli

Kungenzeka kungabi lula ukuthoma ukufunda iBhayibheli. Nanyana kunjalo, singakwazi “ukululukela” ukulifunda, njengalokha umuntu angafunda ukuthanda ukudla angakhenge akudle phambilini. Funda yoku-1 kaPitrosi 2:2, bese nicoca ngombuzo lo:

• Nangabe ufunda iBhayibheli qobe, ucabanga ukuthi uzolithanda bewuthabele nokulifunda?

Dlala IVIDIYO ubone ukuthi abanye bathoma njani ukuthanda ukufunda iBhayibheli. Bese nicoca ngemibuzo elandelako.

IVIDIYO: Abantu Abatjha Bafuna Ukufunda iliZwi LakaZimu (5:33)

• Evidiyweni le ngiziphi iintjhijilo abantu abatjha abazihlulileko?

• Khuyini eyabasizako bona bahlale bafunda iBhayibheli qobe?

• Khuyini abayenzileko bona benze ukufunda kwabo iBhayibheli kube mnandi?

Izinto ezingakusiza uthome:

• Khetha iBhayibheli elithembekileko elisebenzisa ilimi lamva nje. Linga iBhayibheli ImiTlolo ECwengileko nayifumaneka ngelimi lakho.

• Thoma ngokufunda iingcenye zeBhayibheli ocabanga ukuthi ziyakukara. Bona ufumane indlela ongakwenza ngayo lokhu qala itjhadi elithi, “Thoma Ukufunda IBhayibheli.”

• Kutlole phasi okufundileko bona ukukhumbule. Sebenzisa itjhadi elisencwadini le elithi, “Tshwaya Izahluko Ozifundileko Njengombana Ufunda IBhayibheli.”

• Sebenzisa i-JW Library^® app. Ngayo ungafunda begodu ulalele iBhayibheli nanyana ukuphi usebenzisa ufunjathwako namkha esinye isisetjenziswa.

• Sebenzisa Iinthasiselo e-Bhayibhelini ImiTlolo ECwengileko. Zihlanganisa amamebhe, amatjhadi nehlathululo, ukwenza ukufunda kwakho kube mnandi khulu.

5. Lungiselela isifundo sakho seBhayibheli

Funda IRhubo 119:34, bese nicoca ngombuzo lo:

• Kubayini kuqakathekile ukuthandaza ngaphambi kobana ufunde iBhayibheli namkha ulungiselele isifundo sakho seBhayibheli??

Ungazuza njani engcenyeni ngayinye yesifundo seBhayibheli? Njengombana ulungiselela isifundwesi, linga okulandelako:

1. Funda iingaba zokuthoma zesifundo.

2. Qala imitlolo begodu uyifunde, linga ukuzwisisa ukuthi ihlangana njani nalokho okufundako.

3. Thalela amezwi namkha imitjho ephendula umbuzo lokho kuzokusiza bona ucoce ngesifundo osifumeneko nomuntu okufundisako.

Kghani bewazi?

AboFakazi bakaJehova basebenzisa amaBhayibheli ahlukahlukeneko. Nanyana kunjalo sithanda ukusebenzisa IBhayibheli ImiTlolo ECwengileko ngombana inembile, iyezwakala, begodu isebenzisa igama lakaZimu.—Qala isihloko esiku-JW.ORG “Kghani AboFakazi BakaJehova BaneBhayibheli Labo?”

ISIRHUNYEZO

Bona uzuze khulu nawufunda iBhayibheli, beka isikhathi sokulifunda, uthandaze bona uzwisise okufundako begodu ulungiselele isifundo sakho seBhayibheli.

Buyekeza

• Khuyini engakusiza ufumane okungeziweko eBhayibhelini?

• Ungasibeka nini isikhathi sokufunda bewuhlolisise iBhayibheli?

• Kubayini kuqakathekile ukulungiselela isifundo sakho seBhayibheli?

HLOLA OKUNGENZASI

Buyekeza ezinye izinto ezingakusiza ufumane okungeziweko nawufunda iBhayibheli.

“Ongakuzuza Ngokufunda IBhayibheli” (IsiThala No. 1 2017)

Funda ngeendlela ezintathu zokufunda iBhayibheli.

“IBhayibheli Lingangisiza Njani Mina?—Ingcenye 1: Hlolisisa IBhayibheli Lakho” (Isihloko esiku-jw.org)

Fumana iindlela zokuthabela ukufunda iBhayibheli.

“IBhayibheli Lingangisiza Njani Mina?—Ingcenye 2: Yenza Ukufunda IBhayibheli Kubemnandi” (Isihloko esiku-jw.org)

Fumana indlela ongathabela ngayo ukufunda iBhayibheli.

Ekufundeni IBhayibheli Ngokuphumelelako (2:06)