“Ungasabi”
1. Ngiziphi iintjhijilo ezifana nezakaJeremiya esingaqalana nazo?
1 Lokha uJeremiya nakathunywa bona ayokuporofida, wazizwa angafaneleki ekuthomeni nakathola isabelo sakhe njengomporofidi. Kodwana uJehova wamqinisa wathi: “Ungasabi,” begodu ngomusa wamqinisa bona afeze ukuthunywa kwakhe. (Jer. 1:6-10) Esikhathini esiphila kiso, ukuba namahloni nofana ukutlhoga ukuzithemba kungathinta ukuhlanganyela kwethu esimini. Ukusaba bona abantu bazokusabela njani nofana bazosiqala njani kungasibangela bona singanikeli ubufakazi ngesikhatheso. Singakuhlula njani ukusaba okunjalo, begodu ngiziphi iimbusiso esizozifumana?
2. Ukulungiselela kuhle kungasirhelebha njani bona sinciphise ukusaba kwethu esimini?
2 Ukulungiselela Kuhle Kusesengaphambili: Ukulungiselela kuhle kungasirhelebha bona sinciphise ukusaba. Isibonelo, nengabe sibuyekeza kusesengaphambili ingcoco yalabo abafuna ukuvimba ingcoco, sizokghona ukuphendula ukuphikisa okujayelekileko. (Iziy. 15:28) Kubayini ningaberegisi indlela le ekuKhulekeleni koMndeni bona nilungiselele iindlela ezihlukahlukeneko zokuqalana neentjhijilo esikolweni nesimini?—1 Pit. 3:15.
3. Ukuthembela kuJehova kungasirhelebha njani bona sihlule ukusaba?
3 Thembela KuJehova: Ipengu eberegako yokuhlula ukusaba kuthembela kuZimu. UJehova uyasiqinisekisa bona uzosirhelebha. (Isa. 41:10-13) Lesi siphephelo esikhulu esingasifumana! Ukungezelela kilokhu, uJesu wasiqinisekisa bona ngitjho nalokha kuvela ubujamo esingakabulindeli, umoya ocwengileko kaZimu uzosirhelebha bona sinikele ubufakazi ngendlela ehle. (Mar. 13:11) Ngalokho-ke, kufuze sibawe umoya ocwengileko wakaJehova qobe.—Luka 11:13.
4. Ngiziphi iimbusiso esizozifumana nasiphikelela esimini naphezu kweentjhijilo?
4 Iimbusiso: Njengombana siphikelela esimini naphezu kweentjhijilo, siyaqina njengombana siqalana neentlhayiseko ezizako ngokuphumelelako. Siba nesibindi namandla—neemfanelo zalabo abazaliswe mumoya ocwengileko. (IZe. 4:31) Ngaphezu kwalokho, njengombana sihlula ukusaba esinakho ngerhelebho lakaJehova, siqinisa ikholo lethu nokuthembela kwethu emandlenakhe asivikelako. (Isa. 33:2) Sithabela ukuba nelemuko nokwaneliseka esikufumana ekwazini lokho okuthabisa uBabethu wezulwini. (1 Pit. 4:13, 14) Ngalokho-ke, akukafuzi sisabe ukurhuwelela umlayezo woMbuso ngesibindi, ngaso soke isikhathi kufuze sithembele erhelebhweni lakaJehova!