Ungazazi Ukufakaza
1. Khuyini efuna isibindi, begodu kubayini?
1 Wakhe wazaza ukufakaza esikolweni ngombana usaba ukuhlekwa? Kwamambala ukukhuluma kufuna isibindi, khulukhulu nengabe umumuntu oneenhloni. Khuyini ezokusiza?
2. Nekuziwa endabeni yokutjhumayela esikolweni, ukwahlulela okuhle kubandakanyani?
2 Sebenzisa Ukwahlulela Okuhle: Nanyana isikolo singaqalwa njengesimakho, khumbula bona akukalindeleki bonyana ukhulume nawo woke umuntu njengombana ungenza newutjhumayela endlini nendlu. Sebenzisa ukwahlulela okuhle bona kunini lapho kufuze utjhumayele khona. (Mtj. 3:1, 7) Isihloko okukhulunywa ngaso eklasini namtjhana umsebenzi wesikolo kungakunikela ithuba lokuveza ikholo lakho. Namtjhana umuntu ofunda naye angakubuza bona kubayini ungahlanganyeli eentweni ezithileko. Amanye amaKrestu atjela abotitjhere bawo bona wona aboFakazi BakaJehova ekuthomeni komnyaka, bese abanikela iincwadi ezihlathulula ngeenkolelo zawo. Abanye batjhiya iincwadi edeskeni bona abafunda nabo babuze iimbuzo ngazo.
3. Ungakulungiselela njani ukufakaza esikolweni?
3 Lungiselela: Newulungiseleleko, uzokuba nesibindi. (1 Pit. 3:15) Ngalokho, linga ukucabanga ngeembuzo engabuzwa, bese ucabange bona ungayiphendula njani. (Iziy. 15:28) Nekukghonekako, esikolweni yiba neBhayibhili neencwadi ezimbalwa, njengencwadi ethi Ukubonisana, Intsha Iyabuza neencwadi ezikhuluma ngendalo bona uzokwazi ukuzisebenzisa nekutlhogekako. Bawa ababelethi bakho bona niphrakthise iingcenye ezithileko phakathi nokukhulekela komndeni.
4. Kubayini kufuze uragele phambili ufakaza esikolweni?
4 Yiba Nombono Omuhle: Ungacabangi bona abantu ofunda nabo bazokuhleka ngaso soke isikhathi newukhuluma ngeqiniso. Abanye kungenzeka bahloniphe isibindi sakho babe balalele. Kodwana ungapheli amandla nengabe akekho osabelako. UJehova uzowuthabela umzamakho. (Heb. 13:15, 16) Ragela phambili umbawa bona ‘ukhulume umlayezo wakhe ngesibindi esikhulu.’ (IZe. 4:29; 2 Thi. 1:7, 8) Cabanga ngethabo ongaba nalo nekwenzeka omunye akulalele. Umuntu loyo angagcina sele ayinceku kaJehova ekanye nawe!